Mi ta ripara den e dianan aki ainda tin hende cu no sa balor di nan propio capacidad. Berdad ta cu historicamente casi tur pais cu tabata colonia di un pais, esunnan cu a colonisa nan a hiba un maneho cu nos mes no por nada y pa tur cos lo mester keda dependiente di nan. Nan modus operandi ta: “crea constantemente division den e pueblo, usa satelite pa bruha cos, acusa bo propio hendenan tur ora cu nan tur ta incompetente, cu nan gobierno ta corupto, usa “souffleurnan“ pa bruha cos y trata constantemente pa dividi e pueblo”. Mi a experiencia esaki na varios ocasion.

 

Admiracion y sosten.
Si bo mira kico e gobierno aki a hereda na 2017 na Mega debe, unda na comienso di cada florin 97 cen tabata bay pa paga debe y ta resta solamente 3 cen pa tur otro cos. Bo no mester ta di acuerdo cu tur cos, pero un cos si mester admiti cu nos hendenan a tuma e curashi pa sanea cos y ya den 2 aña a logra baha e debe te na 80 cen di cada florin ta bay pa paga debe. Esaki siguramente mester nos admiracion y sosten. Hasta e aña aki a crea un surplus di casi  50 miyon florin cu ta un bon logro. Lamentablemente un Corona virus cu a origina te na China tin nos y casi henter mundo financieramente y economicamente na werki. Enbes nos cu tur e diferencianan cera cabes pa enfrenta Hulanda – cu tin e obligacion moral pa yuda den tur cos segun e Statuut cu nan mes a hinca nos aden na 1954 – nos ta mira un biaha mas oposicion cu nan weganan politico.

Instituto politico/colonial CAft

Nos por mira con hende a lanta como satelite di Hulanda pa bira municipio a la Boneiro, ta usa sindicatonan SPA, SIMAR y SEPPA pa roga Hulanda pa exigi di e gobierno actual pa kita 1500 ambtenaar for di trabao, lagando nan sin pan ariba mesa. Bo tin e instituto politico/colonial CAft – cu ta ilegal contra Statuut y contra nos constitucion – ta haci weganan politico pa yuda AVP cu deliberadamente ta “leak” tur cos. Prome cu gobierno mes ricibi nan caha di triki, nan ta trata na destabilisa nos pais. Esaki ta muestra cu berdad hopi hende aki ainda tin e mentalidad colonial di catibo y Calimero. Nada di nos propio hendenan no ta bon, hasta ta contra pa 70% di muchanan cu tin 3 luna sin haya les ser perhudica y ta opone pa nan bay scol porfin! Nos ta birando un pueblo cu kier bay cielo, pero no kier muri y ta buscando otro hende pa muri pa nos!

Exigencia pa masacra nos pueblo.
Mientras tanto Hulanda ta abusando di un situacion cu no ta nos a pidi pe y cu nan tambe sa di e efectonan dramatico pa finansas y economia di casi henter mundo y nan mes a caba di hinca 4 biyon Euro den  KLM, pero aki pa un par di miyon florin kier exigi pa nos gobierno masacra nos pueblo cu ayudo di su catibonan, souffleurnan, hibadonan di redashi cu tur clase di calumnia y ta yama tur politico pa corupto pa mediante CAft “strangula” nos isla. Nan  adagium ta: “Ban  caba cu e gobierno legitimo di Aruba y manda e gobierno den un posicion di mendiga y na rudia!” No lubida cu nos ta un isla cu ta depende completamente  di turismo y ta cu avion, barco etc. so bo por yega aki y no ta manera Hulanda cu tin yen di pais pega banda di otro, manera Belgica, Alemania etc. Nos ta nos so ariba e mundo aki como isla, pero a base di Statuut den Reino Hulandes normalmente nos lo mester tin un aliado den Hulanda pa yuda nos. Ainda hasta nos paspoort ta Hulandes, pero cu un ‘min’ den dje compara cu e Hulandesnan na Hulanda cu nan si ta haya tur ayudo!

 

Mentalidad colonial calimero.
Si nos sigui cu e mentalidad colonial calimero aki y nos mes hendenan a la catibo sigui yora cerca Hulanda pa tur cos, nos futuro lo ta hopi scur mes. Sea bo ta yuda bo pais pa progresa of bo ta bolbe traicion’e, manera den decadanan 50 cu e cadena di 12-8 of entrega y bira a la Boneiro como Hulandesnan di segundo categoria cu menos derecho den Reino. Aparentemente nos no kier siña di locual  Betico Croes y nos di MEP cu apoyo di pueblo e tempo ey a lucha pe, esta pa logra cosnan grandi y bunita pa nos pueblo cual tabata realisa e anhelo di nos pueblo cu ta su Status Aparte y a laga pa nos tur pa cuida y proteha e hazaña aki. Berdad ora bo no a lucha pa algo bo no sa su balor. Esaki ta un contribucion di curason a base di mi experiencia.

 

LEAVE A REPLY

Please enter your comment!
Please enter your name here