Explosion na un planta kimico diahuebs na China a laga 62 persona morto, y cantidad di herido, 90 di nan di gravedad.
E explosion a tuma luga na un parke industrial, segun e gobierno di ciudad di Yancheng den provincia di Jiangsu. Un declaracion riba su rednan social oficial a bisa cu e explosion a origina na e facilidad di produccion Tianjiayi Chemical, y cu su causa tabata bou investigacion.
Un video riba e website di noticiero estatal CCTV ta mustra nubianan grandi di huma saliendo di un fabrica y plamando riba e area. Bentana y portanan di garage ta mustra di a kibra na e momento di e explosion, cu a causa un shock sismico di magnitud 2.2.
Scolnan a wordo cera trempan, y casi mil residente a wordo evacua como precaucion contra lek y explosionnan adicional, segun e gobierno di e ciudad.
E explosion a crea un crater, y mas di 900 bombero a wordo manda pa e sitio.
Drenahe y via di awa coriendo na y for di e planta a wordo blokia, pa preveni kimiconan toxico di core pa e Lama Geel cercano, bou orden di ministerio di ecologia y medio ambiente.
Presidente Chines, Xi Jinping, na un bishita estatal na Italia, a exigi ‘esfuersonan completo’ pa haya y rescata e victimanan. “Esfuerso di rescate mester ta bon haci pa mantene stabilidad social. Mientras tanto, monitoreo ambiental y alerta trempan mester wordo mehora pa preveni contaminacion ambiental, como tambe desastre segundo”, Xi a bisa.
Xi a bisa cu oficialnan local mester siña for di un serie di accidente industrial pa scapa bida y propiedad, señalando un probabel campaña contra violacionnan di siguridad, na un ocacion unda hopi compania Chines ta luchando cu un caida di benta cu ta causando caida den ganashi.
