(AFP)—Un medio di transporte rapido pa algun hende, pero un plaga riba camindanan di bicicleta pa otro: den Amsterdam, unda tur hende ta core bicicleta , kehonan tocante “fatbikes” a obliga autoridadnan imponi un prohibicion sin precedente den un di e parkenan principal di e ciudad.
Hopi popular entre muchanan, fatbikes — asina yama pa nan tairanan diki — ta bicicleta electrico cu ta parce brommer chikito y cu por yega un velocidad di te 60 kilometer pa ora.
Competiendo pa espacio riba camindanan di bicicleta yen den Hulanda, hopi ciclista clasico ta mira fatbikes como un menasa pa motibo di nan velocidad y tamaño superior.
Kehonan di “gangnan di fatbike” di hobennan coriendo rond den ciudadnan Hulandes y causando caos tambe ta comun.
Un peticion contra “fatbikernan agresivo” na Amsterdam a reuni 2.400 firma, kehando: “E camindanan a bira pista di careda. Espacio publico no ta sinti safe mas.”
Asina cu autoridadnan di ciudad a dicidi pa prohibi nan den Vondelpark, un parke ocupa cu ta atrae localnan y multitud di turista cu bicicleta di huur of skate.
“Nos ta haya un cantidad enorme di keho,” Melanie van der Horst, e oficial di ciudad di Amsterdam cu a introduci e prohibicion, a bisa.
“Algun aña pasa, nos solamente tabata haya alrededor di 20 keho tocante fatbikes. Awor nos tin mas cu 2.000,” el a bisa AFP den un entrevista den e parke.
Banda di e molestia cu nan ta causa, tambe tin un aspecto di seguridad, considerando e popularidad di e fatbikes entre muchanan, e oficial a agrega.
Fatbikes supuestamente mester tin un velocidad maximo di alrededor di 25 kilometer pa ora, pero hopi biaha nan ta ser modifica ilegalmente pa yega entre 50 y 60 kilometer pa ora.
“Imagina un mucha di 11 aña coriendo den e ciudad na 50 kilometer pa ora riba un fatbike grandi y modifica. Esaki ta extremadamente peligroso,” Van der Horst a bisa.
Muchanan a ser hiba hospital cu heridanan serio despues di accidente cu fatbike, el a bisa, incluyendo heridanan di cerebro y ligamentonan di rudia kibra.
“Dokternan ta bisa cu esey ta e mesun nivel di impacto cu un accidente di brommer.”
Bishitantenan di Vondelpark generalmente a ricibi e prohibicion positivamente, cu un dosis saludabel di skepticismo liberal pa cual Amsterdam ta mundialmente famoso.
“Mi no ta kere cu bo mester prohibi nada pero mi ta kere si cu nan mester a cuminsa posiblemente door di prohibi muchanan bao di un cierto edad… pasobra mi ta pensa cu esey ta e problema principal,” Aleksandar Rankovic a bisa.
“Pa e parke y e hendenan cu simplemente kier tin pas, mi ta pensa cu e ta un bon stap,” e entrenador di futbol di 47 aña a bisa AFP.
Tanja Meuris, kende recientemente a muda pa e area, tambe a ricibi e prohibicion positivamente, pero a admiti cu e no ta mira e diferencia entre un fatbike y un bicicleta electrico clasico.
“Mi mes tin un bicicleta electrico y mi ta pensa cu e cos aki ta bay hopi rapido y por ta peligroso si no ser maneha corectamente,” Meuris, di 27 aña y psicologo, a bisa.
Oficialmente introduci riba 11 di mei, e prohibicion ta aplica pa tur fatbike cu motor electrico y cu tairanan mas hancho cu siete centimeter (aproximadamente tres duim).
Cuminsando otro siman, cualkier hende cu ser gara coriendo un fatbike den Vondelpark lo haya boet.
Personanan di mas cu 16 aña lo mester paga un multa di 115 euro ($133). Muchanan entre 12 y 15 aña ta paga mitad di esey.
Muchanan bao di 12 aña no mester paga multa, pero nan mayornan lo ser informa.
Autoridadnan di Amsterdam ta sigui observa cuidadosamente e efecto di e prohibicion, cual potencialmente por ser extendi pa otro parti di e capital.
Oficialnan na Enschede, oost di Hulanda, tambe a tuma accion contra fatbikes, prohibiendo nan den centro di ciudad.
“Nos nunca a mira algo asina prome. P’esey, pa protege nos muchanan, mi kier mira un ley nacional pasa,” Van der Horst a bisa.
“Actualmente mi simplemente kier yega na un situacion unda muchanan, specialmente esnan mas hoben, simplemente no ta permiti pa core e bicicletanan aki,” el a bisa.
