(NLTimes) – Meta Platforms, e compania doño di Facebook, a oficialmente para nan plan pa crea un centro di dato na Zeewolde.
Pa motibo di un gran cantidad di oposicion na e centro di dato, Gobierno recientemente a dicidi di no duna e tereno. E compania anteriormente a suspende plan pa e centro di dato.
“Ora nos considera un localidad pa un centro di dato, nos prioridad ta pa esaki encaha cu e ambiente. Na final, nos a dicidi cu crea e centro di dato aki na Zeewolde no ta e miho inversion,” e compania Mericano a bisa. “Nos ta finalisando nos plan di desaroyo y lo traha di cerca cu e municipalidad y provincia pa caba cu e proyecto aki.”
Tom Zonneveld, president di partido Leefbaar Zeewolde, a bisa cu e tabata un sorpresa plasentero ora el a ricibi e noticia. “Nos no a premira cu Meta no yega na un decision asina lihe, sino cu nan lo pone e bala den man di gobierno nacional.” E partido tin hopi tempo caba ta lucha contra di e yegada di e centro di dato aki. Den e eleccion municipal na maart, e partido a logra haya dobel cantidad di asiento den e Conseho di e ciudad, aumentando di 5 pa 10.
Conseho di ciudad di Zeewolde tabata sostene e centro di dato aki, sinembargo e sosten aki a disminui na momento cu e oposicion a haya e victoria den eleccion. Nan tabatin preocupacion cu e centro di dato lo ta demasiado grandi pa e area chikito di Zeewolde. Tambe nan tabatin preocupacion tocante consumi di poder y e cayente cu lo sali di e luga.
