(AP) — Facebook a perde un bataya legal ayera cu vigilante di privacidad di data di Irlanda, tocante un decision di privacidad di Union Europeo cu por resulta den obligacion di e red social pa stop di transferi data na Merca.
Corte Supremo Irlandes a rechasa esfuerso di Facebook pa blokea un decision di e Comision di Proteccion di data di e pais pa investiga, y duna orden pa suspende, e fluho di data di e compania entre Union Europeo y Merca.
Hues David Barniville a skirbi den su veredicto cu el a conclui cu Facebook ‘mester fracasa riba e base aki di e reto y cu pa e motibo aki no tin derecho na ningun di e alivionan cu ta reclama den e proceduranan’.
E vigilante Irlandes a lansa su investigacion aña pasa, tiki despues di un veredicto di corte supremo di UE rechasando un acuerdo cubriendo transferencia di data entre UE y Merca, conoci como Privacy Shield, bisando cu e no ta haci suficiente pa protege usuarionan contra spionahe cibernetico di gobierno Mericano.
Comision di Proteccion di Data tabata complaci cu e veredicto, segun vocero Graham Doyle.
Facebook a bisa den un declaracion cu ta anticipa ‘defende nos cumplimento’ dilanti di e comision, ‘ya cu nan decision preliminar por ta dañino no solamente pa Facebook, sino tambe usuarionan y otro negoshinan’.
E veredicto den corte ta e suceso mas recien den un guera largo entre Facebook y activista di privacidad Austriaco, Max Schrems, kende a entrega un keho na 2013 tocante e maneho di Facebook di su data despues di revelacionnan di ex-contratista di Agencia di Seguridad Nacional (NSA) Mericano, Edward Snowden.
Facebook tin centronan di data rond mundo, y cumpli cu e orden por nifica un remodelacion caro y compleho di su operacionnan pa sigura cu data di usuarionan Europeo ta fuera di alcance di Merca. No ta cla, sinembargo, ki impacto – si algun – lo tin pa usuarionan di Facebook.
Mientras e caso specificamente ta enfoca riba Facebook, e por tin ramificacionnan mas amplio pa transferencianan di data trans-Atlantico. Esaki pasobra vigilante Irlandes ta e lider regulador pa cumplimento di reglanan estricto di privacidad di UE pa cantidad di otro gigantenan tecnologico di Silicon Valley cu tambe tin nan sede na Irlanda, incluyendo Google y Twitter.
