Fundacion Anti Droga Aruba (FADA) a lansa nan video mas nobo di nan campaña Amigo DIDI pa temporada di fin di aña cu ta carga e slogan “Un bitter di mas por stroba bo di yega cas!”
Amigo DIDI ta un campaña nacional cu tin como meta conscientisa comunidad completo ariba e peliger- y consecuencianan di stuur auto bou influencia di alcohol of otro substancianan. E campaña aki a inicia oficialmente na 2016 y ta un iniciativa di FADA y Fundacion Zinnia, den colaboracion cu cuerpo policial di Aruba.
FADA su obhetivo a traves di e campaña Amigo DIDI ta pa informa y educa personanan ariba kico Amigo DIDI ta. Amigo DIDI ta e persona cu na un fiesta of celebracion ta e persona designa cu no ta bebe alcohol pa asina por hiba e personanan cu si a bebe alcohol pa nan cas sano y salvo. Alcohol tin influencia den e comportacion di un persona den diferente manera y pa e motibo ey e Amigo DIDI no ta bebe alcohol.
Esaki ta di seis aña cu FADA ta activo cu e campaña di Amigo DIDI y durante henter aña nan ta traha pa conscientisa pueblo. Recientemente e fundacion a sali riba caya y a pasa na diferente bar- y restaurantnan rond di Aruba pa asina hiba e mensahe positivo di Amigo DIDI.
Diabierna Amigo DIDI a lansa nan videoclip nobo pa temporada di fiesta di fin di aña pa asina un biaha mas recorda comunidad ariba e consecuencianan grave cu por tin na momento cu un persona no haci uso di un Amigo DIDI y dicidi di stuur bou di influencia di alcohol.
Fundacion Anti Droga Aruba ta traha henter aña pa asina brinda informacion y conscientisa comunidad di Aruba tocante e consecuencianan di uso y abuso di droga, alcohol y otro tipo di adiccion.
FADA ta duna informacion necesario na diferente companianan na Aruba, e ta duna sosten tambe na mayor- y docentenan pa guia mucha- y hobennan y e ta duna mucha- y hobennan tambe e hermentnan necesario manera conocemento, experiencia y comportacion pa tuma e decisionnan corecto y asina crece bira adultonan saludabel liber di cualkier adiccion.
FADA ta brinda diferente programa cu tin como meta pa yuda e mucha- y hobennan na un manera efectivo y strategico pa preveni e uso di droga y ta organisa diferente campaña cu ta duna informacion pa preveni e uso y abuso di droga, alcohol y otro substancianan.
