Minister di Turismo, Transporte y Labor, Wendrick Cicilia (AVP) a anuncia mediante un comunicado di prensa e alocacion strategico di Fish Aggregating Devices (FADs) dentro di e awanan teritorial di Aruba. E iniciativa aki ta dirigi na sostene nos piscadonan local door di mehora acceso na mas pisca mientras ta mehora nan seguridad riba lama.

Fishing Aggregating Devices ta structuranan poni den lama pa atrae pisca. Door di instala e aparatonan aki mas cerca di costa y dentro di awanan teritorial di Aruba, piscadonan no mester bay distancianan leu mas of aventura den awanan stranhero, reduciendo riesgo significativamente y contribuyendo na practicanan di piscamento mas sigur.

Beneficia e piscado

E iniciativa aki ta beneficia tur esnan envolvi den actividad di piscamento, sea recreativo, comercial of profesional, mientras ta duna sosten particular na e piscadonan mas vulnerabel y humilde den e sector. A determina e localidadnan di e FADs den consulta cu e stakeholders, garantisando cu ta tene e necesidadnan di e piscadonan completamente na cuenta, segun e comunicado.

E accion aki ta bin despues di un reunion cu a tuma luga riba 20 di december 2025, caminda minister Wendrick Cicilia a topa cu e piscadonan y e representantenan di organisacion di pesca pa asina por a tende nan preocupacion y prioridad. Alinea cu e compromiso aki, minister Cicilia a indica tambe cu ta planeando mas sesion di dialogo cu e piscadonan pa garantisa compromiso y atencion continuo.

Segun e comunicado, e iniciativa aki tambe ta refleha e uso efectivo di recursonan relaciona cu turismo, cu financiamento brinda door di Aruba Tourism Authority, demostrando con fondonan di turismo por sostene e comunidad local directamente.

Ubicacion oficial aproba ta:

California: 12°41.286’ N, 70°05.266’ W (reemplaso di esun cu a perde).

Druif: 12°38.361’ N, 70°00.301’ W.

Eagle: 12°32.7’ N, 70°06.0’ W (na rand di e zona di cuarentena).

Zeewijk: 12°23.949’ N, 69°56.568’ W.

Seroe Colorado: 12°25.098’ N, 69°50.240’ W.

Juana Morto: 12°26.712’ N, 69°46.56’ W (localidad nobo).