Recientemente a tuma luga un reunion den parlamento unda minister di Finanzas, Asunto Economico y Sector Primario Geoffrey Wever a duna un actualisacion tocante e trabaonan andando den e maneho financiero di Aruba. El a splica cu ta importante pa informa parlamento y pueblo di tur loke ta den proceso mientras tambe ta tuma e oportunidad di contesta cualkier pregunta cu por surgi.

Aruba tin e tarea di haci cierto reforma structural cu ta detaya den landspakket y parti di esaki ta tema A, unda ta trata finanzas publico y di acuerdo cu esaki a duna informacion amplio tocante e trabao andando pa cu e implemenacion di Three Lines Model, cual ta un parti clave ora ta papia di ehecuta Landspakket Tema A.

Durante e reunion, e minister a menciona y splica varios diferente punto di interes publico. El a splica cu entre otro a haci un ‘nulmeting’ unda a duna mas di 300 recomendacion di con pa mehora e facilidad cu cual por controla e cuenta anual di Aruba, cual ta un topico algo controversial, pa motibo cu manera ta conoci e cuenta anual di Aruba tabatin un retraso sumamente grandi, aunke e minister a detaya cu trabao a cuminsa cana inmediatamente y awo tur jaarrekening te cu 2024 ta entrega. Segun e ta splica, e plan ta cu lo entrega e jaarrekening di 2025 na tempo conhuntamente cu e presupuesto pa 2027 y asina cuminsa cumpli cu loke ley ta stipula.

Mirando cu organisacion di gobierno ainda no tin henter e capacidad di controla e jaarrekening a dicidi di yega na un solucion temporal y esaki ta parti di landspakket, e minister a splica cu trata di “cosnan cu nos a palabra cu Hulanda y na mei a cuminsa cu e proceso di destaho pa yega na accountant externo pa haci e trabao aki. A haya reaccion di mas o menos 8 compania y aworaki ta den e ronda final di yega na e accountant externo cu eora lo controla e jaarrekening, cual ta prepara pa e departamento di finanzas y na momento cu e cambio di ley drenta na vigor y e accountant ta scogi, nan lo cuminsa di biaha cu controle durante e aña pa ora cu e aña sera nan por haci nan trabao final, pa asina por entrega e jaarrekening cu un control aproba.”

“E focus all around ta di haya un goedkeurende jaarrekening y esaki ta rekeri un dedicacion. E idea ta pa bo confia riba locual ta presenta y cu tur locual cu ser haci ta na un forma rechtmatig. Paso atrobe bo por tin tur procesonan aki in place pero bo mester make sure tambe cu e alocacion y e uso di e fondonan ta bay segun nos reglanan y nos procesonan,” e mandatario a declara.

Esaki no ta algo facil y segun e mandatario no ta un garantia cu lo ricibi e ‘goedkeurende verklaring’ pero si “ta trahando pa purba di logra esaki.” Segun el a informa, a haci un inversion substancial den e cadena di e pilar financiero di 4 miyon florin adicional pa 2026 “pa personal y pa loke ta goederen en diensten, paso ta necesario pa cumpli cu tur e metanan cu nos a impone riba nos mes.”

Pa loke ta trata e implementacion di Three Lines Model, e minister a splica cu esaki ta un representacion di e paso structural den direccion di e modernisacion di gobierno, cu un enfoke riba e responsabilidad y control efectivo ademas di transparencia riba e procesonan financiero.

Den siguiente edicionnan di Bon Dia Aruba, lo drenta den mas detaye tocante e Three Lines Model y e progreso cu a logra haci te cu awo pa cu esaki.