Un siman so falta pa gobierno di Aruba reuni cu Hulanda den cuadro di proximo reunion di Conseho di Reino dia 20 di september awor.

Esaki ta e fecha cu durante e ultimo reunion di Conseho di Minister di Reino a wordo duna gobierno di Aruba pa atende cu e cambionan cu Parlamento, y muy particularmente fraccion di MEP, a introduci den e ley di supervision financiero (Landsverordening Aruba financieel toezicht) cu no a cay den bon tera cerca Hulanda. Hulanda ta haya cu e cambionan introduci den e ley di LAft -cu ainda no a haya e firma di Gobernador- ta disminui tarea di control di e colegio di supervision CAft.

Prome Minister, Evelyn Wever, a bisa cu e agenda di e reunion di e Conseho di Ministernan di Reino no tin di haci cu e echo cu ainda gobierno no a entrega su presupuesto 2020 cu mester produci un surplus di 20 miyon florin. El a clarifica cu e reunion di diabierna otro siman ta ainda riba e topico di supervision financiero. Pues e ta un tema cu ainda faltando un siman pa e reunion aki, nan ta den deliberacion cu otro, y e ta spera cu den otro siman nan lo mester por sali afo.

Premier Wever-Croes a bisa cu dia 20 di september pais Aruba mester bin cu un alternativa riba asunto di supervision. Y esey ta locual gobierno di Aruba ta trahando riba dje. “Mi no tin un consenso ainda cu Hulanda y cu Parlamento ariba dje,” el a bisa. Unabes cu gobierno lo por logra e consenso aki y tin un proposicion cla, mesora nan lo informa comunidad riba esey, asina e mandatario a priminti.

E reunion no tin di haci –segun nos prome mandatario- cu e discusion cu tabatin y tin ainda, encuanto si e social crisis plan mester ta aden of no di e presupuesto 2019 pa loke a wordo presupuesta den gasto di personal. Tampoco riba e punto si e gasto di gobierno y particularmente di personal no ta bahando structuralmente.

E mandatario a indica cu e puntonan cu CAft a trece dilanti den su ultimo rapport ta discusion andando. Pero el a bisa cu e puntonan aki no ta tampoco den e agenda cu nan lo trata otro siman den seno di Conseho di Minister di Reino. E no ta descarta si cu eventualmente lo por tin cambio den e agenda aki.

 

LEAVE A REPLY

Please enter your comment!
Please enter your name here