Maneho di otorgamento di tereno di huur no ta muestra di integridad

DIP lo no coregi un fout y si e damnificado dicidi pa demanda nan derecho, lo kita e tereno cu a haya pa planta y cria bestia. Esaki ta e situacion dificil cu un famia a haya su mes den dje y a acerca Bon Dia Aruba. Y e motibo di e problema? Maneho di tereno domein, esta huurgrond.

Manera ta conoci den su programa di gobernacion, Gabinete Wever Croes a pone como obhetivo cu otorgamento di tereno ta pa sigura cu den e demanda ta usa e Ordenanza Teritorial, ROP, como base pa asina garantisa bienestar social y economico duradero. E maneho di Ministerio di Ordenanza Teritorial, Infrastructura y Medio Ambiente ta dirigi pa permiti cu e proceso di otorgamento di tereno ta cana transparente, di forma integro, eficiente y efectivo pa contraresta abuso. E forma con kier a logra esaki ta pa medio di depolitisa e proceso di otorgamento di tereno, apunta DIP como unico instancia autorisa, defini y publica di antemano e puntonan di maneho. Door di pasa e proceso y decision completo den man di DIP, ya ciudadano no ta dependiente di e Minister, y ta DIP tin cu duna cuenta di su maneho tur luna na Gobierno.

Tambe, segun e website di DIP, a simplifica e proceso di otorga tereno, ademas cu e supervision, control y implementacion ta mehora. E ultimo aki ta particularmente importante pa esnan cu no ta cumpli na e condicionnan pa cua nan a ricibi nan tereno, sea ta den erfpacht of huur.

Na 2020, Gobierno a keda confronta cu e pandemia cu a afecta economia, cu a subraya e dependencia di Aruba riba importacion di cuminda. Y asina a dicidi pa revisa e maneho di huurgrond y pa tur hende bolbe registra pa pidi tereno pa asina facilita e proceso di otorgamento di tereno di huur.

Sinembargo, pa algun hende cu ya tabatin tereno di huur pa cria y agricultura, e maneho aki a trece hopi problema. Particularmente pa un tereno na Catiri di 16.630 meter cuadra. E tata di e famia, C.N.T. (identidad ta conoci pa redaccion) a firma e acuerdo di huur, cu ta di Januari 2017 te cu fin di 2021, pero tin e tereno den uso desde 1962. Gobierno ta permiti uso di tereno pa cinco aña y ta renoba esakinan cada cinco aña. E tereno ta pa agricultura y cria, algo cu henter famia ta envolvi den dje, hasta e nietonan.

 

E yiunan di C.N.T a lanta cu e tradicion di planta y cria di bestia, for di cabrito te baca. Y tabata bende e carni di bestia chikito, webo fresco y otro produccion di e labor. “Henter famia tabata traha hunto, a inverti hopi placa, pero mas cu tur cos tabata haci esaki cu amor,” a bisa Bon Dia Aruba. “Yiunan chikito a lanta ta duna bestia cuminda, baña nan, yena awa y yuda planta.” E amor pa e trabou pisa aki a motiva e yiu mas chikito di T. pa specialisa den e sector y a bay studia na Hulanda den e direccion di Cria di Bestia. E intencion ta pa bolbe y sigui cu e tradicion di famia y innova e actividad di cria di bestia y agricultura. Mientrastanto, nietonan y un bisanieto a tuma e encargo di cuida e bestianan na Catiri. “Ta un tradicion di cuater generacion caba activo riba e tereno aki.”

Erfpacht

Pero, experiencia di ultimo aña a trece hopi insiguridad si e tradicion por continua. Algun aña prome DIP a kita un pida grandi di e tereno di huur, pa motibo cu tabatin mester di tereno erfpacht pa traha cas. DIP mes a kita tur e transhi cu e famia T a pone rond di e tereno. “Nan a rosa un tereno grandi cu tabata usa pa planta maishi pa asina por a verkavel un tereno erfpacht.” DIP a kita e transhi, pero nunca mas a bolbe pon’e otro na su luga. E famia mes a cuminza bolbe pone den otro. Mientrastanto a traha un cas riba locual tabata e parti di e tereno pa planta, cu awor a bira bisiña.”

E problema a bira mas grandi ora cu Minister Marisol Lopez Tromp a anuncia cu a habri e inscripcion y re-inscripcion pa tereno huur. Atrobe, manera a haci na 2016 (pa extende e huur entrante 2017), famia di C.N.T. a yena e formularionan y a paga e 50 florin “manera debe ser y na tempo.”

Ora a kere cu nan tereno ta sigura, a tuma nota cu e bisiñanan cu a haya parti di e tereno pa planta den erfpacht pa asina nan por a traha nan cas, a cuminza usa e tereno di huur di famia C.N.T. pa kima mata, basha awa di pos y kap mata. Ora cu C.N.T a acerca nan, a constata cu nan tambe tin derecho riba parti di e tereno cu ta riba su nomber. A cera un acuerdo di huur cu e bisiñanan aki tambe, tambe cu e obhetivo pa agricultura. E bisiña mes a dicidi pa acudi na DIP, y aki, un trahado di e seccion di control di DIP, R.G. a admiti cu a comete un eror. E tabata un fout di DIP, segun admision di e propio G. na C.N.T. Pero ta locual a sacudi henter famia T tabata mensahe cu a ricibi esta cu si hiba e caso na un abogado, DIP por dicidi pa kita henter e tereno cu ta den posesion di e famia pa planta y cria bestia desde 1962, ‘pasobra ta DIP ta dicidi.’ Den un caso extremo, berdad cu un Minister encarga y Director di DIP tin autoridad pa kita tereno di huur si no ta us’e pa locual a hay’e, un persona cu conocemento di DIP a bisa. “Pero no por kita un tereno di huur sin mas.”

Contesta di DIP

E famia mes a dicidi di haci su investigacion, y a conclui cu e bisiñanan a haya parti di e tereno di huur, durante e periodo cu Marisol Lopez Tromp, na October 2020, algun tempo prome cu el a baha como Minister di Infrastructura. Segun famia T, e bisiña en cuestion ta yega na ex Minister Otmar Oduber y tabata traha den su despacho. Bon Dia Aruba no por a confirma si esaki ta e caso. Pero, problema segun e persona cu a acerca nos redaccion ta cu ora cu a acerca e Minister actual encarga cu DIP pa wak si por haci algo, esta Minister Presidente, kende tin e cartera di Infrastructura, a resulta cu e bisiña a bira campañador di Minister Dangui Oduber. “E caso aki ta ilustra con a haci fout y ta sigui cu corupcion. Nos kier wak si Prome Minister berdad ta para riba integridad y haci lo corecto. Kizas e ta un accion no mucho popular, pero e ta e corecto si.” Locual kier ta pa e tereno den discusion y cu DIP a duna na dos persona, keda pa famia T por sigui nan actividad di agricultura y cria bestia.

Marisol Lopez Tromp

Bon Dia Aruba a acerca ex Minister Marisol Lopez Tromp pa puntra kico tabata motibo cu por a tuma un decision cu a perhudica un famia, y e ex Minister a manda e decreto ministerial, cu ta mustra cu no ta e como Minister a kita of duna ningun tereno. Berdad ta cu hende mester a registra, pero esnan cu tabatin nan tereno caba, lo a keda cu nan tereno. Pues den e caso aki, e famia C.N.T. no mester a registra.

E decreto ministerial tabata netamente pa fortifica e pensamento cu e proceso di otorga tereno keda depolitisa y cu ningun Minister ta tuma decision segun su gana. Consecuentemente e decreto di 28 di Maart 2020, ta bisa entre otro cu tin un maneho nobo pa otorga terenonan di huur pa stimula actividad agrario. Pero mirando cu ta trata di propiedad scars di Pais Aruba, mester garantisa cu tur e terenonan aki cu ta otorga pa actividad agrario ta keda usa conforme nan destinacion y cu mester bin control rigoroso. Asina a lanta un grupo di trabou cu ta consisti di Hefe di DIP, como Presidente, Director di Direccion Natuur en Milieu, Director Santa Rosa, Director Bureau City Inspector y un representante di e Minister. E grupo di trabou aki mester a inspecciona y controla si e terenonan di huur cu tabata otorga caba, tabata cumpli cu e condicionnan pa cual a duna nan. Ademas e grupo di trabou mester a conseha y raporta na e Minister riba locual a keda constata y si mester, tuma medidanan contra uso inapropia di e tereno. E grupo di trabou mester a percura cu tabatin por lo menos 10 inspeccion pa dia, e miembronan mester formula e conseho pa e Minister y pone nan firma.

“Ta na DIP nan sa ken tin tereno, y ta e grupo di trabou mester a controla. Ta e grupo di trabou aki a conseha ami tempo cu mi tabata Minister. No ta ami a kita ni duna ningun tereno. Al contrario. Cu e decreto ministerial, mi a pasa e responsabilidad completo pa e grupo di trabou cu ta inclui Director di DIP,” Lopez Tromp a bisa.

Bin cu solucion

Bon Dia Aruba a tuma contacto cu Director di DIP dr. Haime Croes, pero no a ricibi ningun reaccion. For di despacho di Prome Minister a haya e declaracion cu a informa famia di C.N.T cu el a bisa di lo laga DIP studia e caso y bin cu solucion.

Mester bisa cu algun siman pasa DIP mes a informa Bon Dia Aruba cu e trabou pa controla ta dificil pasobra e departamento ta chikito y mester controla no solamente terenonan, pero tambe e permisonan di precario. E declaracion aki ta bay contra locual ta skirbi den e decreto ministerial, entre tanto ya no ta valido, pero cu tabatin opcion di a extende su validez.

Tanto e persona cu a acerca Bon Dia Aruba y website di DIP ta papia di integridad. E persona a inclui un splicacion di integridad cu el a cita for www.juridischwoordenboek.nl cu ta bisa cu integridad di un ambtenaar ta husticia, cu e funcionario ta ehecuta su funcion adecuadamente y cu cautela den luz di su posicion y tur locual por ta den disputa. Y riba e website di DIP tin e dicho cu ta bisa cu: ‘integridad real ta haci lo corecto, sabiendo cu ningun hende lo sa si bo a haci’e of no.’ Ta un citacion di Oprah.