Famia di victimanan di accidente fatal di hit and run ta reacciona riba declaracion di famia di Chania Fernandes-Pedra

Seis luna despues di e accidente fatal di hit and run cu a cobra bida di Yosely Vasquez Gonzalez y Carlos David Viales, yiunan di e victimanan a dicidi di bin dilanti y duna un declaracion publico. Yhoely Willems y Edwin Willems, a tene un conferencia di prensa den cual nan no solamente ta reacciona riba e conferencia di prensa cu famia di Chania Fernandes-Pedra, e chauffeur acusado responsable pa e accidente, pero tambe a comparti con e tragedia a afecta nan bida, nan famia y nan perspectiva riba e proceso hudicial cu ta sigui contra e acusado.

E declaracion di e Yhoely y Edwin ta bin poco tempo despues cu algun miembro di e famia di e acusado a comparti nan propio punto di bista cu medionan di comunicacion. Segun Yhoely, e ta considera cu a bira necesario pa comunidad tambe por tende e storia di e famia di e victimanan.

Yhoely a cuminsa su declaracion splicando cu e tambe ta un victima di e accidente, pasobra e tabata presente e anochi cu e accidente fatal a tuma lugar. Tanto e como su casa tabata hunto cu su mayornan na e momento ey y por poco nan tambe a ser alcansa pa e chauffeur.

Yhoely a expresa cu durante e ultimo seis luna despues di e accidente, su famia no a ricibi ningun expresion directo di simpatia of disculpa di parti di e famia di e acusado. El a expresa cu, al contrario, durante e periodo aki a sali diferente declaracion den algun medio di comunicacion cu no ta cuadra cu e realidad.

El a referi na specificamente na un publicacion di dia 5 di januari den un medio di comunicacion den cual tabata indica cu e famia di e acusado a tuma contacto cu su famia pa expresa nan disculpa y ofrece cubri gastonan. Tocante esaki, Yhoely a declara: “Publicamente awe mi kier bisa cu esaki no ta berdad. Mi nunca a tene contacto cu ningun famia di e chauffeur.”

Yhoely tambe a menciona declaracionnan publica cu, segun e, a contribui pa aumenta e dolor di e famia. El a referi na comentario haci durante un programa di transmision di un medio di comunicacion, na unda tabata discuti, entre otro, cu e victimanan no a crusa caminda riba zebrapad, of cu e velocidad di e auto na momento di impacto no tabata asina duro, of cu e nivel di alcohol di e chauffeur no tabata asina halto.

Yhoely a enfatisa cu durante e periodo ey su famia a scoge pa no reacciona publicamente y laga Ministerio Publico continua cu su investigacion. Pero aworaki, cu audiencia programa pa diabierna dia 3 di juli, y despues di declaracionnan di e famia di e acusado, el a subraya cu ta momento pa nan duna nan declaracion. “Mita pensa ta corecto pa pueblo tambe scucha di nos banda cu nos ta e victimanan y famia di e personanan cu a fayece,” el a bisa.

Den su declaracion, Yhoely a menciona e declaracionnan haci durante e conferencia di prensa di e famia di Chania Fernandes-Pedra tocante representacion legal di e acusado. El a indica cu e famia a declara cu e acusado no tin abogado. Sinembargo, el a señala cu durante e prome audiencia pro forma di 10 di april e acusado tabatin mas cu un abogado presente den su defensa.

“Kico por a pasa cu awor e no tin abogado mas, esey mi no sa y honestamente mi no ta preocupa mi cabes pa esey,” e a bisa.

Despues di e conferencia di prensa di e famia di e acusado, OM a saca un comunicado aclarando algun punto cu e famia di Fernandes-Pedra a menciona. Yhoely a expresa satisfaccion cu e aclaracion cu OM a publica subrayando cu tur acusado tin derecho na representacion legal y cu e derecho ey mester ser garantisa dentro di marco di ley.

El a reacciona tambe na e comentario cu a insinua cu no tabatin investigacion suficiente den e caso. Yhoely a enfatisa cu OM si a conduci un investigacion amplio y e famia di e victimanan deliberadamente a evita haci declaracionnan publica pa no interveni cu e proceso.

Un gran parti di su declaracion tabata dedica na e impacto emocional cu e tragedia a causa den su bida personal. Yhoely a relata e imagen cu ainda e ta carga cune despues di mira su mama y su tata sin bida riba caminda inmediatamente despues di e impacto. El a conta cu personalmente el a baha e pia di carson di su mama pa evita cu otro hende a mira cu su mama tabata falta un pia debi na e impacto.

Yhoely tambe a comparti cu aworaki e tin siete luna na estado, pues na momento di e accidente e tabata na estado caba pero e famia ainda no tabata sa. Awor dentro di poco tempo e lo bira mama pa prome biaha y ta un experiencia cu semper el a spera di por comparti cu su mama, pero cu awor no lo por sucede mas.

“Mimama nunca haya e chance di haya sa cu e lo bira wela di mi prome yiu. Aki dos luna mi lo trece mi prome yiu na mundo y mi no lo tin mi mama pa compaña mi na e momentonan ey. Pero aki dos luna, Chania su mama si por bay KIA bishit’e, dun’e un brasa y papia cune. Esey ta algo cu ami ni mi yiu nunca mas lo tin e privilegio ey,” el a expresa.

El a expresa tambe su conviccion cu e acusado mester permanece deteni den KIA mientras e proceso penal ta sigui.

Na final di su declaracion, Yhoely a enfatisa cu su famia ta pidi respet pa nan derecho humano y pa un proceso hudicial husto. “Chania su mama ta pidi derecho humano y un husticia sano pa su yiu, mi tambe kier y ta pidi esey pa mi sernan keri cu a ser ranca for di e mundo aki mi dilanti,”el a declara.

Segun Yhoely, e consecuencia di e accidente no a limita na e dos personanan cu a perde nan bida. El a señala cu e mes a resulta herida, mientras cu diferente miembro di e famia ta sigui biba cu e trauma emocional cu, el a enfatisa, lo compaña nan pa resto di nan bida.

Den su declaracion el a expresa gradicimento na e polis cu tabata bahando for di su warda na momento cu e accidente a tuma lugar y cu a reacciona inmediatamente. Segun Yhoely, e accion rapido di e agente a contribui pa localisa e acusado e mesun anochi.

Edwin Willems tambe a comparti su punto di bista durante e conferencia di prensa. El a enfatisa cu e ta sali duna un declaracion publico pa defende memoria di su mama y su padrastro.

“Awe mi t’ey pa saca cara di mi mama y stiefvader. Husticia mi ta pidi pa e difuntonan,” el a declara.

Edwin tambe a expresa cu te dia di awe, nan no a ricibi un disculpa directo di parti di e acusado ni su famia. Aunke el a bisa cu un disculpa no lo por cambia loke a pasa ni trece su mama back, e ta considera cu un “sorry” por mustra caracter di un persona.

Segun Edwin, durante e audiencia pro forma anterior e no a percibi arepentimento di parti di e acusado. Al contrario, for di su punto di bista diferente declaracion publica a causa mas rabia den comunidad y mas dolor den e famia.

Un otro punto cu Edwin a menciona tabata e asistencia psicologico. Segun su declaracion, e acusado a ricibi diferente bishita di un psicologo durante e prome dies dianan di detencion. Contrario na su propio experiencia. El a splica cu el a ricibi su prome cita cu un psicologo seis luna despues di e tragedia.

Edwin tambe a comparti e impacto cu e accidente tin riba su propio famia. El a conta cu su yiunan regularmente ta puntra pa nan wela y cu nan ta haya falta di e momentonan cu anteriormente nan tabata comparti hunto. El a indica cu un di su yiunan tambe lo mester asistencia psicologico como consecuencia di e sucedido.

“E victimanan real ta e difuntonan y nos como famia cu a keda cu e dolor inmenso,” el a enfatisa.

Na final di su declaracion, Edwin a expresa gradicimento na Ministerio Publico y na e fiscal cu, segun e, ta conduciendo un investigacion serio y profesional.

Por ultimo el a expresa speransa cu e caso lo manda un mensahe cla na comunidad cu Aruba no mester tolera mas caso di hit and run cu ta resulta den morto y trauma profundo pa famianan inocente.