Cu cooperacion tecnico di Elite Productions Aruba recientemente Aruba a ricibi un promocion impagabel cu un transmision riba youtube di e Dj Alex Sensation. Sensation ta un figura conoci internacionalmente pa su programanan radial rond Merca y Puerto Rico. Tambe e ta conoci como DJ na conciertonan international y a canta cu artistanan manera Luis Fonsi, Ozuna, Jeon y otronan.
Desde cu e pandemia a cuminsa Alex Sensation tur diasabra tin un programa riba youtube unda e ta mix un variedad grandi di musica. E programa ta hiba e nomber ‘Party de Cuarentena’. Mirando cu hopi lugar rond mundo ainda no ta permiti pa hende fiesta, Alex ta trece e fiesta na nan cas. Diasabra ultimo e ‘Party de Cuarentena’ tabata bibo for di nos dushi isla Aruba. Den e balcon luhoso di The Ritz Carlton Hotel Aruba cu un bista unico durante bahada di solo e dj a entretene miles di persona rond mundo cu a sigi e transmision. Constantemente Alex tabata menciona nos isla Aruba cual ta un promocion hopi bon pa nos isla durante aproximadamente 5 ora di transmision. Na banda di e programa aki Alex a percura pa bishita diferente parti turistico di nos isla y a comparti esaki riba su rednan social cual tambe a haya un alcance grandi mundialmente. Hunto cu Alex Sensation tambe tabata na Aruba e artista / influencer Brazil 21. Brazil tin mas di 3 miyon siguido riba Tik Tok y ta conoci pa e.o su exito hunto cu e artista Bulin.
Comosifuera cu tur e promocion aki no tabata suficiente Alex Sensation a transmiti su programa radial tambe for di Aruba dialuna mainta. E programa aki tin un sintonia hopi grandi tanto na New York ( Mega 97.9), Miami ( El Zol 106.7), Puerto Rico (Play 96), Los Angeles (Mega 96.3 ) y riba e app La Musica App.
Aruba sigur mester ta contento di por a haya un cobertura internacional cu lo yuda cu e recuperacion turistico pa nos isla. Un danki na The Ritz Carlton Aruba pa e hospitalidad y Elite Productions & Entertainment cu a percura pa e set up tecnico cu efectonan di luz, ekipo di zonido, diferente camara y sistema di streaming.
