Ta parce cu nos ta asina enfoca riba e actual situacion, cu nos no ta pagando tanto atencion na loke ta e perspectiva pa e aña entrante y despues. Esey di un banda no ta asina straño ya cu na nivel gubernamental no tin un presupuesto ainda, no pa publico en todo caso, y hasta tratamento di presupuesto complementario 2020 no a tuma lugar ainda. Nos tin algun indicacion si kico lo por sucede otro aña, riba tereno di recuperacion di economia pa loke ta turismo, pero ultimamente e pregunta ta surgi si no mester adapta e pronostico aki. Ta conoci cu Ahata tin pronostico pa aumento di cantidad di camber di hotel durante 2021, cual ta un averahe anual di 45%, compara cu e ocupacion maximo. Compara cu e averahe real di 2019 esaki lo ta mas o menos 55% di loke 2019 a duna.

Sin embargo, mirando e situacion na nos mercado principal, Merca, cu ta bay pasa den un periodo dificil cu Covid-19 den e invierno aki, cu por bira algo di ‘infierno’, no ta asina sigur cu nos motor economico principal ta duna e perspectiva aki. Y simplemente bisa, mas laat e motor economico cende atrobe, mas nos recuperacion lo bay tarda. Y esey lo tin consecuencia pa nos tur, sin excepcion. Esey ta conta pa gobierno, cu lo mira entrada mas abao ta drenta caha den forma di impuesto, menos prima pa AZV y SVb, y menos dividendo di e empresanan estatal, cu ta den problema serio, sin excepcion. Aki nos ta toca un tema importante.

Nos ta mira e promer señalnan di austerisacion forzoso caba na por ehemplo AAA NV, unda e ministro encarga ta purba scapa voto pa 2021 ainda, pero no por haci nada otro cu reconoce e realidad economico cu e compania tin su dilanti. E acuerdo pa e aña aki ta cu no lo tin retiro forzoso, pero ta ken ta hura cu e situacion pa otro aña lo drecha di tal forma cu retiro di cualkier forma no ta necesario? Al contrario, esun cu nenga retiro voluntario awor talvez ta hay’e den un situacion di retiro forzoso den condicion menos faborable. E perspectivanan pa e aeropuerto no lo ta di tal indole cu por carga e peso di e actual payroll.

Di igual manera nos ta mira y scucha e promer señalnan di austerisacion na un compania manera Setar NV, cu tin un problema compleho di desaroyo desfaborable mundial den sector di telecomunicacion. Nos tur por a mira con e fenomeno Whatsapp a cambia hopi cos den telecomunicacion y e desaroyo ey ta sigui. Anto riba esaki ta bin e problema cu Covid-19 a ocasiona. Ademas e compania ta carga e peso di dos sistema di cable cu ta bira obsoleto cu tempo, pero cu awor mester mantene por lo pronto. Anto riba tur esaki ta bin e necesidad di continua cu inversion den un sistema pa futuro di glassfiber, cu cual a inicia pero cu no ta avanzando mas. For di bon fuente nos a haya di tende cu ta pensando den direccion di un reduccion di salario di 20% ‘across the board’.

Practicamente tur empresa estatal lo mester revisa nan operacion, mirando cu nan benta a cay hunto cu e economia. Banda cu cada un mester resolve nan problema pa mantene cabez riba awa, esaki tin consecuencia tambe pa gobierno, cu no por spera practicamente nada mas di e empresanan aki na 2021 di ganashi cu por comparti cu gobierno, al contrario, por presenta caso unda gobierno lo mester pone placa pa mantene e empresa riba pia. Ta trata aki por ehemplo di Serlimar y Arubus. Den caso di Serlimar no tin fin di regla pa cu e compania por cobra tur usuario; den caso di Arubus nan tin e peso di Arutram y Aruparking. Tin mas ehemplo, pero ban lag’e te aki.

Y kico tur esaki ta bay significa pa gobierno anto? Cu un economia cu den su mihor scenario a bolbe na mitar di loke e tabata, por spera solamente entrada cu ta coresponde cu e mitar ey. Si no por fia pa sigui paga e payroll di mas di 8.000 cupo, anto ta dos opcion so tin: retiro di parti di e empleadonan o ta corta tur salario cu un porcentahe hopi mas grandi cu e reduccion di e aña aki. Nos tin un tarea grandi nos dilanti den cual e actual gabinete mester demostra cu nan tin e curashi y sabiduria pa haci loke mester haci, y esey ta corta gasto pa crea espacio. Nos ta contento di tende cu ya ta yegando na un acuerdo cu Hulanda, pero cada luna cu ta pasa sin cu di berdad tin un acuerdo, ta laga tur hende colga den laira, tanto empleado como desempleado, empresario y hasta e empleado publico cu no sa kico ta bay pasa. En berdad lo tin eleccion aki menos cu un aña, pero pa cualkier partido esaki no ta un momento pa soño di color extravagante, pasobra no tin nada di parti. Hasta e campaña lo ta diferente pasobra nos ta observa e promer señalnan di cu pueblo a cuminza mira tambe cu cos no por sigui asina. Si algun sindicato ta kere cu no mester reconoce e realidad aki, e fantasma di 20% ta bin pa nan tambe.