Recientemente Fundacion Arubano di esnan Visualmente Incapacita (FAVI) a tene un conferencia di prensa durante cual nan ta informa comunidad di nan actividadnan recien y esnan na caminda pa yuda FAVI sigui eherce nan trabao.

FAVI ta celebrando 51 aña di existencia y di brinda guia y sosten na e hende cu algun of otro limitacion visual. Den e ultimo temponan FAVI ta hopi activo. En conexion cu esaki FAVI a lansa nan video promocional pa informa y conscientisa comunidad.

Sary Wernet-Kelly, Terapista di Revalidacion di FAVI a conta di algun di e actividadnan recien cu e fundacion a tene pa nan clientenan.

Wernet-Kelly a splica cu aworaki FAVI a habri periodo di augustus te fin di aña, cu ta un periodo druk pa e fundacion, pero prome cu continua cu esaki nan wak back na e cosnan positivo cu ya a sucede. El a sigui splica cu un di e actividadnan recien tabata un curso exitoso di massage unda cu siete persona cu limitacion di bista a participa, di cual seis a logra gradua. Ademas di esaki tabatin e charla y anochi informativo hunto cu ImSan y diferente otro actividad, sobre todo pa clientenan di FAVI cu ta impacta e clientenan den forma social. Un di e actividadnan cu Wernet-Kelly a menciona tabata e charla social pa esnan grandi unda nan ta bin hunto y por a papia di nan problema di bista.

“Nos ta para cla pa e periodo nos dilanti y nos no ta para keto. Limitacion di bista no ta defini nos. Kizas despues di mira e video y kizas si conoce un hende cu tin problema di bista cu ainda no a acudi of kier djis combersa cu nos, nos ta akinan pa scucha bo y responde e preguntanan cu bo por tin. Ban mira riba un vision pa futuro y un bienestar unda cu tur persona cu tin limitacion di bista ta inclui. Nos no ta biba mas den un mundo scur, pero un mundo unda tecnologia ta crea oportunidad y FAVI ta brinda e oportunidad,” el a remarca.

Cetty Baarh Directora di FAVI a splica cu e meta di e video promocional cu FAVI a caba di lansa ta pa conscientisa comunidad di Aruba cu FAVI t’ey pa brinda servicio y e t’ey pa sostene cada persona cu limitacion di bista den e comunidad.

Pa loke ta estadistica el a informa cu FAVI tin registra 465 persona cu tin un of otro limitacion di bista na Aruba, mientras cu Censo ta bisa cu tin 1795 persona cu tin un of otro problema di bista. “Esey kiermen cu nos tin trabao pa haci, pa sigui haci y nos ta kere cu un video promocional manera esaki ta yuda pa conscientisa y yuda pa hendenan keda registra nan mes na FAVI,” el a indica.

Baarh a indica cu luna di augustus ta un luna super importante pa FAVI pasobra ta e luna di accion di donacion di e fundacion cu ta core di augustus pa december na unda FAVI ta recauda fondo pa sigui brinda servicio na nan clientenan.

El a splica cu e luna aki e accion di donacion ta cuminsa dia 28 di augustus. Pa esaki cada colectante di FAVI por pasa busca nan lista y cuminsa colecta e fondonan pa FAVI. Alabes el a remarca cu si tin persona of negoshi cu no ta riba un lista di un colectante, por tuma contacto cu FAVI pa asina haci nan donacion.

Pa loke ta trata e retonan, e directora di e fundacion a splica cu tin diferente reto, no na Aruba so pero mundialmente, manera entre otro leynan cu por ser cambia pa asina beneficia e hendenan cu algun limitacion visual.

Na mesun momento el a enfatisa cu como FAVI nan ta keda stimula nan clientenan, y ta haci’e hunto cu nan tambe, pa sali den comunidad. El a subraya cu unabes nan keda sali den comunidad y keda mira cu nan como cliente ta ser mira, e ora ey nan ta bay crea cambio.

Saarh a agrega cu e fundacion a sinta den combersacion cu diferente minister na unda cu nan a papia tocante e reto diario di nan clientenan, pero di otro banda tambe a cuminsa traha riba e parti di muchanan.

“Nos tin cu cuminsa eynan pa train nos muchanan cu limitacion di bista, pero tambe e muchanan cu ta lantando awor pa nan tambe por trece e cambio hunto cu nos clientenan. E combersacionnan aki ta keda hopi importante pa asina poco poco nos por crea cambio,” el a remarca.

El a sigui splica cu tin problemanan diario manera por ehempel cu clientenan ta cana y no tin acera cu ta adecua, cu no tin asfalt y nan mester cana den santo, of no tin un liña cu ta haci cu nan por sinti unda e acera ta caba y caminda ta cuminsa. Eseynan, el a señala, ta retonan cu tur aña ora nan ta riba caya nan ta keda conscientisa y el a sigura cu nan lo keda haci esaki tambe.

“Nos kier keda stimula nos clientenan pa sali y no pensa cu nan no por haci’e sin FAVI. Nos kier stimula esaki. P’esey e actividanan cu nos tin anualmente ta keda sumamente importante. Nos no kier pa e cliente depende riba FAVI pa hopi cos. Nan ta e persona cu ta den situacion y nan ta e personanan cu ta indica unda nan tin problema pa e ora nos por bay papia den nan nomber,” el a enfatisa.

Rafael Barragan tabata e persona encarga cu e video promocional di FAVI. Durante e conferencia el a splica cu desde cuminsamento e idea di e video tabata pa expresa e sentimento di e clientenan riba e importancia di FAVI, pa brinda inclusion den comunidad pa hendenan cu limitacion visual.

Barragab a yega di traha caba cu e fundacion y a desaroya algun proyecto exitosamente y pa e momento aki pa su persona tabata algo natural pa forma parti di e iniciativa aki.

E mensahe di e video, el a señala, ta pa e demostra e sentimento di empoderamento, cu e persona por biba su bida su mes y haya independencia. “Pa e motibo ey nan a crea nan propio mundo, esey ta e mensahe final di e video. Mundo ta mas consciente di e comunidad di hende cu limitacion visual y pa compronde cu e ta un hende normal,” el a remarca.