FCC, lidera pa republicano, lo evalua un propuesta pa debilita proteccionnan di responsabilidad di companianan di rednan social cu ta fact-check e postnan di e presidente.


Presidente di Comision Federal di Comunicacion (FCC), Ajit Pai tin plan pa bay dilanti cu reglanan nobo tocante proteccion pa responsabilidad legal cu Facebook, Twitter y otro companianan di red social tin, un movida cu lo por tene nan responsabel pa moderacion di contenido riba nan plataformanan.

FCC tin e ‘autoridad legal’ pa interpreta ley, conoci como Seccion 230, Pai a bisa den un declaracion diahuebs, citando e conseho general di e agencia. El a rasona cu ‘miembronan di tur tres brasa di gobierno federal a expresa preocupacionnan serio’ tocante con e proteccionnan, cu esencialmente ta duna inmunidad na companianan di rednan social, a ser interpreta.

Decision di Pai ta yega na momento cu administracion di Trump ta aumenta presion riba companianan grandi di tecnologia den e ultimo simannan di carera presidencial 2020 na Merca. Un dia prome, presidente Donald Trump a tweet: “Rechasa Seccion 230!” despues cu Facebook y Twitter a slow e transmision di un storia di New York Post tocante declaracionnan no verifica tocante yiu di Joe Biden, su rival democratico den proximo eleccion. Legisladornan di ambos banda a haci un yamado pa reforma Seccion 230, cual ta parti di e Ley di Decencia di Comunicacion 1996.

“Mientras oficialnan electo ta considera si mester cambia e ley, e pregunta ta keda: Kico Seccion 230 ta nifica actualmente?”, Pai a puntra den su declaracion. “Hopi ta avansa riba interpretacion extremadamente amplio cu den algun caso ta protege companianan di red social contra leynan di proteccion di consumidor den un forma cu no tin base den e texto di Seccion 230.”

Jessica Rosenworcel, un comisionado democrata di FCC, rapidamente a tweet: “FCC no tin nad’i haci como polis di discurso di e presidente.”

Companianan tecnologico ta bisa cu proteccionnan den Seccion 230, cual ta protege nan di responsabilidad for di postnan di nan usuarionan y tambe ta permiti nan modera contenido dañino sin enfrenta repercusion, a permiti plataformanan online florece durante inicio di internet.

Mientras e influencia y tamaño di companianan manera Twitter y Facebook a crece, legisladonan a cuestiona si mester mas regulacion pa controla nan poder. Democratanan ta preocupa pa e fluho rampante di lenguahe di odio y desinformacion, incluyendo interferencia di paisnan stranhero den eleccion presidencial Mericano 2020. Republicanonan, lidera pa Trump, ta alega cu rednan social ta censura nan expresion. No tin evidencia cu esaki ta berdad, y e companianan ta rechasa e acusacion fuertemente.

Na mei, Trump a firma un orden ehecutivo solicitando pa FCC, cu nunca a regula companianan di contenido online, pa haci esaki. E orden ehecutivo a yega despues di decision di Twitter pa pone labelnan riba dos tweet di Trump tocante votacion via post, bisando cu nan tabata contene ‘informacion potencialmente engañoso’.

 

LEAVE A REPLY

Please enter your comment!
Please enter your name here