Presidente di regulador di comunicacion Mericano a bisa cu e caida den servicio di T-Mobile na nivel nacional pa varios ora dialuna tabata ‘inaceptabel’ y cu e Federal Communications Commission (FCC) lo investiga.
T-Mobile, un di e tres proveedornan di servicio celular mas grandi di e pais, a bisa cu tabatin un ‘problema cu voz y texto wireless’ cu a cuminsa alrededor di merdia EDT dialuna. E compania a bisa pa 1am diamars cu tur problema mester a keda resolvi.
E compania a culpa un problema di trafico di internet cu a causa problema cu su red pa e caida di servicio.
AT&T y Verizon ambos a bisa cu nan red tabata operando normal. Pero yamada entre nan cliente y cliente di T-Mobile por a haya problema pa motibo di problema cu T-Mobile, creando e impresion di un fayo amplio den comunicacion.
FCC a duna un multa na compania di telecomunicacion den pasado pa caida den servicio. T-Mobile a paga un multa di $17.5 miyon pa dos caida di servicio nacionalmente riba e mesun dia na augustus 2014, cual hunto a dura tres ora y a preveni clientenan di por yama 911.
Oficialnan di siguridad publico tabata preocupa pa falta di acceso na 911 dialuna tambe. Por ehempel, departamento di polis na Redmond, Washington a tweet cu clientenan di T-Mobile lo mester tin ‘un plan alterno den caso cu mester yama 911’.
T-Mobile a bira un di e carrier mas grandi di e pais, hunto cu AT&T y Verizon, despues di cumpra su rival Sprint. E compania a cuminsa integra e dos red.
