Durante un conferencia di prensa ayera tardi Fundacion Cas pa Comunidad Arubano (FCCA) a anuncia un pakete di hipoteca nobo pa nan clientenan. Julie Wever, Director Tecnico y Comercial di FCCA, a splica kico e pakete nobo aki ta encera y con e clientenan por ebenficia di esaki.

FCCA ta existi mas di 40 aña y tin como meta yuda tur ciudadanonan yega na nan mesun cas, sea ta traha, cumpra of huur casnan traha door di FCCA. Cu nan pakete nobo ‘Nos tey pa yuda bo’, FCCA ta introduci un hipoteca atractivo y na un interes reduci.

Durante e añanan di existencia FCCA a duna hopi famianan di Aruba e oportunidad pa yega na un cas conforme nan entrada. Actualmente, Wever a remarca, FCCA tin un gerencia nobo cu hunto cu su personal ta trahando diligentemente pa ofrece un miho servicio y producto na comunidad di Aruba.

“Nos ta consciente di e situacion economico cu e pais ta pasando aden actualmente y pa cumpli cu deseo di FCCA su clientenan, FCCA ta presenta e pakete atractivo nobo di hipoteca ‘Nos t’ey pa yuda bo’”, Wever a indica.

Segun el a splica e pakete atractivo aki ta encera un interes reduci di hipoteca, un seguro na alcance di cada cartera y un aprobacion hopi lihe riba e peticion di hipoteca. Ademas FCCA ta ofrece conseho y yudansa na momento di construi un cas, y alabes el a menciona cu nan ta traha tambe cu varios partner cu ta ofrece descuentonan atractivo na e clientenan di FCCA.

E pakete aki su beneficio, Wever a remarca, ta cu e cliente ta paga un suma mensual mas abao. E pakete aki ta pa clientenan nobo y existente di FCCA, ciudadanonan cu kier cumpra un cas, tereno, remodela of renoba nan cas por aplica pa e pakete ‘Nos tey pa yudabo’ di FCCA.

Wever a sigura cu cada caso lo wordo analisa y lo ofrece un interes reduci na cada cliente. Pa aplica pa e pakete aki e cliente mester bin cu algun documento, ID valido, salaris slip, papel di censo y taxatie rapport.

“Di e manera aki FCCA ta contribui tambe na bienestar di economia di Aruba. Ya cu e cliente por spaar mas placa y tin mas espacio financiero. FCCA ta conoci pa su guia den henter e proceso pa construi of remodela bo cas. Nos profesionalnan ta cana man den man cu nan cliente. Ademas FCCA ta inverti tambe pa mehora nos servicio y aworaki por ofrece un servicio mas rapido na comunidad di Aruba”, Wever a remarca,

Pa loke ta trata e porcentahe di interes reduci cu Wever ta menciona, el a indica cu nan papiando di un porcentahe substancialmente mas abao compara cu locual nan ta ofrece aworaki. “E pakete aki ta un pakete special pa cada un famia, hogar na Aruba. Tambe e pago pa luna nos ta bisa e ta esun di mas abao riba mercado”, el a agrega.

Mayra Janga, Hoofd di Hipoteca, a splica cu tin algun rekisitonan pa por aplica pa e pakete nobo aki. Pa por aplica ta depende di e entrada di e persona, ta depende tambe di e tipo di financiamento, e suma cu ta pidi, e balor di e cas y e añanan cu e prestamo lo dura. A base di esaki FCCA ta haci un calculacion dependiendo tambe di e risico di e financiamento y kico ta e cliente su necesidad. Basa riba e tur e rekisitonan aki, FCCA ta duna un interes cu ta pas cu e situacion di e famia ey.

Den caso cu un cliente tin mas prestamo, mas debe, Janga a remarca cu e prestamo por wordo consolida hunto cu e hipoteca y nan ta reduci e interes tambe a base di e entrada y gastonan di e cliente. “Nos semper ta screen nos clientenan pa wak kico ta e debenan cu nan tin na otro institucionnan financiero. Di mes nos ta papia cu e clientenan y nos ta verwacht cu nan ta duna e informacion”, el a comenta.

Na mesun momento Janga a subraya cu como FCCA ta na altura cu e situacion financiero actual ta dificil pa hopi y p’esey FCCA ta scucha e necesidadnan di e clientenan y nan ta analisa e situacion basa riba loke e cliente tin rond y asina wak di ki forma nan por yuda nan.

“Tin ora no ta logra di consolida tur cos, pero nos ta yuda. Esey ta locual FCCA ta haci, nos ta pensa cu nos clientenan, nos ta coach nan y wak pa nan situacion por wordo drecha pa nan por biba trankil”, el a agrega.

Wever a remarca cu FCCA semper tabatin su team cu ta guia e personanan den construccion y nan ta duna nan conseho tambe ariba e tipo di materialnan pa nan por baha nan gastonan tambe. “Nos tin acuerdo cu cierto partnernan cu ta yuda nos pa duna oferta na nos clientenan cu nan por haci nan construccion miho y nan ta bay controla tambe e calidad di e construccion y con e construccion ta bayendo pa e cas por keda cla”, el a menciona.

Por ultimo el a comenta cu FCCA ta hayando peticionnan aworaki di clientenan cu no por a logra caba nan construccion. Den casonan asina nan ta wak e situacion, wak e balor unda e cas ta actualmente, kico mester pa caba cune y di e forma ey wak si FCCA por duna e clientenan loke falta na e interes reduci di manera cu nan por caba nan cas y spaar pa nan por biba trankil den nan cas.

LEAVE A REPLY

Please enter your comment!
Please enter your name here