Federacion Dutch Caribbean Mental Health (DCMH) a presenta e prome Estudio Regional di Salud Mental pa e area di Caribe Hulandes di 2024. E rapport ta duna pa prome biaha un bista di e situacion di salud mental den e parti di Reino Hulandes den Caribe.
E analisis ta mustra cu traha hunto y colecta data ta posibel y ta duna informacion valioso pa yuda stipula maneho y practica. A pesar di e diferencianan den registracion y forma di financiamento, a logra pone un base solido pa un sistema structural pa monitoria salud mental riba e islanan.
Resultadonan principal:
- Den 2024, mas o menos 8.400 cliente a ser trata door di 5 instancia participante den e investigacion den 5 isla.
- 56% di e clientenan ta hende muhe.
- 30% ta menor di 25 aña y 30% ta mayor di 55 aña.
- E diagnostico mas comun ta trastornonan psicotico (por ehempel schizofrenia), sigui pa trastornonan depresivo, trastornonan di desaroyo neurobiologico, y trastornonan relaciona cu trauma y stress.
E resultadonan ta enfatisa e importancia di sigui traha hunto, mehoracion e calidad di e data y hiba maneho cu ta acapara e necesidadnan specifico pa e comunidad Caribense.
Instancianan cu a participa:
Den e estudio regional aki a participa e siguiente instancianan di salud mental:
- Fundacion Salud Mental Aruba Respaldo (Aruba)
- Stichting Geestelijke Gezondheidszorg Curaçao (GGZ Curaçao)
- Stichting Opvangtehuis Brasami (Clinica di adiccion Brasami)
- Fundashon Perspektiva i Sosten Integral (PSI) – Skuchami – (servicio ambulante di salud mental)
- Mental Health Caribbean (MHC) di BES
E rapport ta un paso importante pa logra un sistema sostenible pa colecta data y desaroya maneho riba e area di salud mental den e region di Caribe. E ta stimula colaboracion entre instancianan, desaroyadornan di maneho y profesionalnan den cuido, pa traha hunto pa e Reino Hulandes den Caribe ta mas saludable y resistente.
Bishita Respaldo su website www.respaldo.aw y lesa e rapport completo – “RapportRegiobeeld GGZ CaribischGebied 2024”.
