“Yakari, happiness is a state of mind” mi juffrouw di MAVO tabata bisami y ami como hoben cabes duro tabata bringa cu ne bise cu no ta asina. Pero, e siman aki mi a ripara cu podise mi juffrouw tabata tin rason. Felicidad ta den bo mente y abo tin cu scoge p’e.
Mi hendenan! Pa ora e columna aki yega den boso man ami lo ta paketando maleta pa bay bek Hulanda sigui studia. Cansa, pero satisfecho mi por bisa cu e zomer aki a cambia mi bida por completo. Ta hopi sa cu e zomer aki mi a mira un soño bira realidad. Ami cu un amiga dimi y un team di hende mesun apasiona cu nos a logra cera cabes hunto y trece dilanti e evento titula “Poetry is an island” dedica na elogia 10 aña di poetry nights riba e isla. Pa reforsa evento nos a manda busca mi escritora favorito Alysia Harris di Merca como nos international guest.
Un parti hopi intimo di tur e proceso, cu mino a broadcast mucho hopi ta cu hunto cu Alysia nos a prepara dos tayer di poesia pa comunidad. Uno a wordo duna na e hobennan na Orthopedagogische Centrum na Dakota, mientras cu e otro a wordo na duna na e un grupo di ser femenino cera na Korrektie Instituut Aruba. Cua di dos tabata mas impactante ami no sa. Cua di dos a yenami cu mas alegria ami no sa. Pero mi hendenan, tabata tin asina tanto emocion y asina tanto cos a wordo comparti cu ta te hasta duro pa pensa cu tanto e muhenan cera na KIA como e muchanan na Orthopedagogische Centrum ta eyden pasobra nan a comete delitonan pisa of nan ta mala mucha.
E muchanan di Orthopedagogische Centrum tabata un reto na cuminsamento, hopi di nan tabata tin actitudnan hopi skerpi y a yega un momento cu mi a pone man riba curason y pensa “Dios, si nos por djies yega na e muchanan aki awe sin cu cos tin cu bay fo’i man, mino ta pidibo nada mas”. Comentarionan fo’i sla, tenta otro, tenta nos, mi tabata tin miedo cu nos no lo logra nada. Alysia ta bakia caba, na Merca su bida ta consisti di duna tayernan asina aki dia aden y dia afo te hasta na hombernan grandi den prisonnan peligroso. Pero pami, tur cos tabata asina nobo, asina spannend. Tur locual e tabata bisa e hobenann na Ingles ami tabata traduci na Papiamento y asina nos tabata rotate. Alysia a pone e muchanan skirbi tres rij di palabra riba un papel. Nan tabata dedica pa alegria, tristesa y finalmente amor. Boso por kere cu mayoria di e cos chikito ney di 14, 15, 16 aña tabata mal namora? Mi hendenan! Un tabata asina inspira cu el a te hasta bay sinta su so den un huki y bin bek cu asina un carta di amor. Nos a gewoon descubri un Romeo. Un di su frasenan tabata bisa “Pasobra ora mi a wak e mi curason a bati manera e ta un drum y mi ta duna Dios danki pa pone den mi bida y cu e ta aceptami manera mi ta” Dios tata! Aunke hopi di e muchanan a skirbi y a expresa nan sentimentonan, hopi tabata esunnan cu no tabata kier lesa locual nan a skirbi si.
E ora ey locual nos a haci ta cu nos tabata laga e juffrouwnan lesa locual nan a skirbi pa nan mirando cu nan tabata mas comodo cu esey. E ta complica pa describi pakico un mucha no ta mind otro hende scucha su sentimentonan, pero no lo kier scucha nan den su mesun stem. Alysia ta bisa cu ora bo ta lesa algo out loud den bo mesun stem e ta bira dibo, bo ta dune un color cu bo voz y esey ta locual hopi hende tin miedo di dje. E bunita ta cu despues e ambiente a bira leuk y apesar di e circumstancianan tur mucha tabata por pensa riba un hende cu nan stima, tur a hari, tur a klap man pa otro. Si bo lo por a peek door di e porta, pa un momento bo lo a pensa cu e djies tabata un reunion familiar cu tur bo prima y primonan sinta den un sala ta haci joke.
Awo, e tayer na KIA a laga hopi di nos cu lagrima na wowo. Apesar di ta den un situacion dificil, como mayoria ta muhenan adulto e tabata mas facil pa traha cu nan ya cu nan tabata un poco mas open cu e muchanan na ricibi e tayer. Pa break di ice, mi a bisanan pa nan bisa nos nan nomber y conta nos tocante algo cu nan gusta haci. Claro mi por a puntranan pa bisami pakico nan ta eyden cera, pero esey no tabata e proposito. Kico yiu, den bon ingles nan “stunt” riba nos! Nan ta muhenan cu careranan, yiunan y full un bida biba of pa biba ainda cu a comete un error. Esey nan tur ta y esey nan tabata kier pa nos sa tambe. Nos a pone e muhenan haci diferente excercise di skirbi pero esun cu mas a impacta ta ora Alysia a bisanan pa nan skirbi 3 carta. Un dedica na e muhe cu nan tabata den pasado, un na e muhe cu nan ta awo y un pa e muhe cu nan ta spera di ta den futuro. Den e grupo tabata tin muhenan Latino, Hulandes, Arubiano y te hasta un di nacionalidad Chines. E sisterhood entre tur e muhenan ey y e forsa di nan tur ta algo inexplicabel mi hendenan. Pa acomoda mayoria, Alysia tabata papia Ingles, ami tabata traduci na Spaño y e otro miembro di e team a yuda cu e Hulandes. E señora Chines tabata papia Papiamento pero no por a skirbi esaki, pues el a skirbi su carta na Chines. Despues di encurashe un tiki nos a puntre pa e lese pa nos. E di “boso no tabay comprende”. Nos a bise esey ta berdad pero tin ora bono mester comprende, bo djies tin cu sinti. Wel, nunca mi a yega di scucha algo mesun bunita cu e zonido di e idioma Chines ora e señora aki a lesa su carta. Lagrimas, emocion, e energia den e cantina di KIA. Tur cos tabata djies dimas pa mi curason.
Kisas locual tabata mas remarcabel ta e echo cu varios di nan a expresa tanto positivismo. Cu bo ta pensa cu pasobra un hende ta cera bo tabay haya nan cara abou. Wel, e muhenan aki tabata bon cla riba unda nan ta para. Hopi a bisa cu e experiencia ta simplemente un les di bida y cu nan ta agradecido pa e amistadnan fuerte cu nan a cera na KIA. Cu apesar di tur cos nan ta feliz no solamente pasobra nan ta scoge pa felicidad sino pasobra cu segun nan tin Dios, speransa, yiunan na cas cu ta wardanan. Si hendenan cu a pasa den tanto dificultad, cu a perde tanto cos incluyendo nan libertad por haya felicidad den nan tragedianan kico ta para di nos cu ta liber aki fo? Kico nos ta scoge?
