E operacion di e ferry di e compania Venezolano, Naviera Paraguana ta un realidad. Representante di e compania aki a bin Aruba pa participa den e rueda di negoshi di dos dia entre Venezuela y Aruba, cu a tuma luga na Holiday Inn y cu a clausura diabierna ultimo.
Capitan di e ferry di Naviera Paraguana, Sr. Pedro Jimenez a declara cu nan plan ta di cuminsa opera entre Guaranao-Aruba-Guaranao, na fin di october venidero. El a bisa cu entre 20 y 25 di october nan lo cuminsa nabega e ruta aki den su prome fase. E di dos fase ta inclui Corsou. Lo ta asina: Guaranao-Aruba-Aruba-Corsou-Corsou-Aruba-Guaranao.
Nan tin un di tres fase cu ta inclui Bonaire pa cubri e islanan ABC, pero esaki ta depende di e comercialisacion y movemento di carga y pasahero entre Venezuela, Aruba y Corsou. Si e ta cana bon, e ora nan ta contempla e posibilidad di inclui Bonaire. E waf di explotacion comercial pa e otro islanan manera Corsou y Boneiro, lo bay ta Aruba. E prijsnan lo bay ta hopi competitivo, tanto riba nivel di pasashi como nivel di carga.
Ya caba e ferry ta den operacion entre e islanan Azores. Y nan tripulacion ta den formacion pa atende e rutanan nobo, asina el a laga sa. E ferry ta traha di hero, specialmente pa soporta e awanan di Caribe. E tin un capacidad di 600 pasahero, 120 auto, seis container di carga y un espacio di carga di 250 palet. Den e fase inicial lo bay traha cu pasashi y carga. E parti vehiculo lo bay ta exclusivo pa e uzo di e estadonan di Venezuela y di Aruba.
Segun Sr. Jimenez, e demanda pa bin cu e servicio aki ta hopi positivo. E compania ta evaluando pa ofrece nan servicio tur dia, cu excepcion di dialuna, cu lo wordo dedica pa mantencion preventivo di e ferry. E ferry lo sali den oranan tempran di mainta y lo regresa atardi.
E frecuencia aki lo resulta atractivo tanto pa e sector exportado, como esun importado di e region aki di Caribe.
