Fidel Castro su morto no ta nifica libertad di pueblo Cubano

Cubano na Aruba y fidel su morto 1.jpg

Cantidad di comentario a produci e noticia di e fayecimento di e Tata di e Revolucion Cubano, Fidel Castro, diabierna ultimo: Nan ta sentimentonan mixto di admiracion y di rechaso.

Sigur e Cubanonan cu mester a bandona nan isla natal y nan famia pa realisa nan soño di libertad; y pa busca un miho futuro, nan opinion contra Fidel Castro no por ta otro sino di odio y rencor contra un dictador cu a castiga henter un pueblo cu su ideologia comunista socialista.

Cubano na Aruba

Na Aruba e comunidad Cubano a crece durante e ultimo añanan y nan ta alrededor di 500 Cubano. Mayoria di nan manera Dr. Ernesto Rodriguez ta hendenan cu un bon formacion profesional cu mester a bandona Cuba, ya cu e bida cu nan tabata hibando tabata uno imposibel, yen di limitacion, carencia, necesidad y principalmente falta di libertad.

Tur esakinan independientemente di tur e facilidadnan cu e gobierno Cubano ta ofrece riba tereno di salud, educacion y deporte, cu a bira e tres principal logro di Cuba cu no mester neglisha nan, pero nan a mester a paga un prijs hopi halto pa nan, segun Dr. Rodriguez.

Dr. Ernesto Rodriguez ta un dokter cu tin basta aña residencia na Aruba. El a casa cu un dama Arubiano y hunto a crea un bunita famia.  El a emiti su opinion di un forma masha reserva y conservador pa no crea un impresion eroneo como un persona extremista y desagradeci.

E no ta nenga cu ora cu e noticia di Fidel Castro su morto a wordo divulga internacionalmente, tabata un motibo di celebracion pa mayoria di Cubano den exterior, specialmente esunnan bibando na Miami.

“Si, hopi Cubano ta celebra e noticia aki. Pero no celebra morto, ya cu niun hende ta alegra di e morto di un hende, pero si nan ta celebra e echo cu e persona aki cu a causa tanto daño na e pueblo specificamente di Cuba. Un hende cu a asesina, cu a duna ordo pa mata hendenan cu a fusila, no ta existi mas. Aunke esaki no ta nifica e libertad di e pais di Cuba.

Exilio Cubano

Nan ta hendenan exilia cu mester bandona Cuba ya cu e pais aki no a brinda nan oportunidad pa crece. Manera e oportunidadnan cu Aruba si ta brinda pa su pueblo pa bay studia profesionalmente y bin bek pa traha na bienestar di e isla aki. E salario di un profesional Cubano ta un miseria cu no ta garantisa un bon calidad di bida. Mayoria di e famia Cubano ta logra sobrevivi danki na e ayudonan cu nan ta ricibi for di nan sernan keri residencia den exterior.

Segun Dr. Rodriguez si na Cuba e por a haya e oportunidad cu e tin na Aruba aworaki, nunca e lo bandona su pais pasobra e ta stima su isla natal. “Pero e posibilidad na Cuba ta depende di e pensamento totalitario di un hende”.

Dr. Rodriguez a bisa cu e sentimento cu un personahe asina ta lanta ta uno hopi contradictorio. Ademas mester wordo mira for di diferente perspectiva. El a wordo educa y forma profesionalmente na Cuba cu un sistema di educacion excelente y gratis. “Tin hopi cu mester gradici riba esaki”, el a bisa. Sinembargo e ta indica cu nan mester a paga un prijs hopi halto pe.  Ainda tin hopi Cubano preso na Cuba pasobra nan ta pensa diferente na e regimen Castrista. 

Dr. Rodriguez a bisa cu unabes cu el a bandona Cuba mescos cu otro Cubano exilia, nan no sa cual ta nan status na nan pais natal. E mes mester a sufri 10 aña sin por a wak su mayornan y te hasta sin por a biaha pa su propio isla, ya cu su derecho di Cubano a wordo kita y trapa.

Hopi dolor y no cambio

“E ta un prijs hopi halto cu ta yama libertad. E libertad a bay perdi na Cuba”,  el a declara na Bon Dia Aruba. Ademas el a bisa cu e balornan a bay perdi locual a produci hopi dolor cerca e famia Cubano. Ya cu e famia a kibra ya cu hopi di nan a bira desespera pa bandona Cuba, pasobra nan no a wak un horizon pa desaroya nan mes.

Di otro banda e ta haya cu Fidel Castro a exporta su ideologia comunista creando hopi diferencia na Latino America. E no sa con e exportacion di e tipo di pensamento aki tabata uno positivo considerando pa ehempel e situacion di e pais bisiña di Venezuela cu ta pasando den un situacion similar cu e pueblo Cubano a sufri tambe.

“E exportacion di e tipo di sistema aki cu na mi opinion personal no ta funciona. E no a funciona na Rusia, incluso na China cu ta un pais socialista a bin cu hopi cambio den nan modelo socialista”, el a bisa.  Igualmente e ta haya cu e sistema socialista cu ainda ta vigente na Cuba no ta funciona. P’esey cantidad di Cubano cu ta bandona nan pais ta halto pa exilia nan mes den otro pais.

Na final Dr. Rodriguez a laga sa cu e no ta kere cu Fidel Castro su morto lo trece mas apertura democratico y cambio substancial pa Cuba, ya cu no ta existi libertad di expresion cu ta fundeshi di un democracia berdadero.

E ta haya cu mas bien e fayecimento di Fidel Castro lo trece un reafirmacion di su pensamento comunista. Ya cu e Cubanonan cu ta bay participa den e acto oficial den cuadro di Fidel su morto, mayoria di nan ta di caracter obligatorio dor di militancia di e partido Comunista. Nan lo purba di move masivamente tur hende posibel pa traha un documental caminda esun cu ta participa mester reafirma cu nan kier revolucion, comunismo y socialismo.

Ademas e dirigentenan Cubano ta asina pega na nan poder y nan ta asina namora di dje cu nan no lo bandona nan poder libremente.

You May Also Like

Robertico Inesia (2).jpg

Polis di henter Reino Hulandes ta buscando Robertico Inesia

Den e programa Hulandes Opsporing Verzocht cu a tuma luga diamars ultimo, polis di ...

Lesamento no ta un costumber pa Aruba

ORANJESTAD – Papiamento como idioma materno den e parti di enseñanza di Aruba ta ...

Amienda 7 na caminda bek pa parlamento

E amienda destina pa garantisa derechonan di igualdad civil di entre otro parehanan di ...

Liderazgo nobo na KPMG Dutch Caribbean y na oficina di Aruba

Mientras cu na nivel di Caribe Hulandes a bin cambio den liderazgo den KPMG, ...

Mocion di desconfiansa contra Paul Croes den prome reunion di parlamento nobo

Ayera a tuma luga e prome reunion publico di parlamento nobo riba e status ...