Aruba ta preparando pa un di e eventonan mas spera di aña, unda cu hopi animo y orguyo Rotary Club of Aruba ta anuncia nan Fiesta Rotaria pa asina recauda fondo cu nan ta bay reparti entre numeroso instancia den comunidad di Aruba.

Esaki ta bay tuma luga diadomingo 14 di april proximo riba e parkeerplaats pafo di Stadion Guillermo Prospero Trinidad na Oranjestad.

Nan ta señala cu esfuersonan di Rotary Club rond di e proyecto, manera semper, a cuminsa for varios luna pasa unda no solamente tin un comision trahando riba e parti organisatorio y logistico cual ta crucial, pero tambe tur e miembronan ta activo bendiendo carchinan di e tradicional rifa.

Igualmente por a mira nan riba e ruta di Carnaval, cu nan tabata canando banda di e prome premio cu ta un auto Chevrolet nobo.

Manera ta custumber, e feria lo cubri un espacio grandi pa asina por crea seccion cu ta interes di tur bishitante, ademas lo tin un feria di cuminda y bebida, un kids corner cu diferente wega pa e muchanan. Naturalmente tambe lo tin e area di mercado popular cu producto nobo of den excelente condicion na prijsnan accesibel, den esaki publico por spera un variacion di paña, comestibel, articulo di cas, hardware, homeware, articulo pa mucha y mata.

Tanto e rifa como e feria tin como obhetivo principal y unico pa recauda fondo cu posteriormente Rotary Club of Aruba ta reparti entre numeroso instancia den comunidad, aportando asina na diferente meta y proyecto social, e ganadonan di e premionan cu ta inclui tambe pasashi, estadia na hotel, telefon celular, diferente certificado y premio cash, ta keda anuncia durante un sorteo cu ta tuma luga pa 5’or di atardi na e feria y den presencia di notario.

Carchi pa e rifa ta obtenibel tur dia na diferente punto rond di Aruba, cerca miembro di Rotary Club of Aruba y si resta, e dia di e feria tambe, pa e lista completo di punto di benta, por mira esaki riba e profiel di Rotary Club of Aruba riba Facebook y Instagram.

Rotary Club Aruba ta probecha e oportunidad aki pa yama danki na tur boluntario cu ta coopera cu e realisacion di e feria, pero sigur un danki di curason tambe ta bay na tur patrocinado y socio comercial cu ta aporta sea financieramente, cu ekipo, producto of labor.

E invitacion ta keda na Aruba henter pa asisti masalmente na Feria Rotaria 2024 y asina yuda otro y yuda isla di Aruba.