Manera ya caba publica den nos edicion di ayera, Gobierno di Aruba a publica su uitvoeringsrapportage pa e di dos kwartaal di 2025, cu ta duna un bista claro riba e situacion financiero di e sector colectivo. E rapport ta inclui institucionnan esencial manera AZV, SVB, ATA, Serlimar, SEPB y Universidad di Aruba, hunto cu mesun gobierno.

E uitvoeringsrapportage ta mustra un panorama mescla di progreso y reto. Mientras cu algun institucion a logra stabilidad, otro tin un desafionan creciente entre gasto y ingreso. Aruba mester busca un balansa duradero pa proteha servicio publico vital sin pone risiconan a largo plaso riba su stabilidad financiero.

E sector colectivo ta forma parti di tur cos cu tin impacto directo riba bida di pueblo Arubano: salud, pensioen, turismo, limpiesa publico y educacion. Esakinan no solamente ta absorbe gran parti di e presupuesto nacional, pero tambe ta garantisa bienestar social y desaroyo humano.

E rapport ta señala cu e cifranan preliminario pa e prome mita di 2025 ta refleha tanto fortalesa como fragilidad. Gobierno a admiti cu no tur entidad a manda na cifranan completo. Serlimar, por ehempel, no a entrega informacion actualisa, loke ta limita transparencia den maneho di desperdicio.

Den contraste, AZV, SVB y ATA a duna un descripcion mas profundo, un paso pa trece mas claridad y confiansa.

AZV: Gastonan di salud ta sigui subi

Segun e rapport ta indica sistema di seguro di salud na Aruba, cual ta ser maneha pa AZV, ta sigui carga hopi peso riba finanzas publico. Gasto ta sigui subi mas lihe cu ingreso, principalmente pa motibo di demanda grandi pa cuido medico specialisa y cambionan demografico.

Gobierno ta adverti cu sin medidanan structural — manera revisa tarifanan medico, promove cuido preventivo y posiblemente ahusta contribucion — e sostenibilidad di sistema por keda den riesgo.

SVB: Pensioen y beneficionan social bou di presion

Banco di Seguro Social (SVB) ta otro pilar cu ta sinti presion grandi. Cu mas hendenan ta retira y menos hendenan ta contribui, e balansa entre ingreso y gasto ta bira mas dificil pa sostene.

Den e rapport, SVB a mustra algun mehoramento den coleccion di contribucion y maneho interno. Pero realidad demografico ta cla, e sistema tin mester di reforma. Discusion ta keda abierto tocante posibel ahustacion di edad di pensioen, cambia formula di beneficio, of busca otro modelo di financiamento.

ATA: Turismo ta sigui duna stabilidad

Aruba Tourism Authority (ATA) ta mustra un panorama mas positivo. Turismo, cu ta motor principal di economia, a sigui genera ingreso fuerte durante e dos kwartaal di 2025.

Bishitanan di Norte America y Europa a sigui crece, y e ta refleha den mas coleccion pa toeristenheffing y otro contribucion. Esaki a permiti ATA inverti mas den campañanan promocional y proyectonan pa sostene turismo duradero.

Pero e rapport ta adverti cu dependencia exclusivo riba turismo ta fragil. Shock externo — economia mundial, politica internacional — por afecta e ingreso rapidamente. Pa e motibo ey, gobierno ta insisti riba diversificacion di economia.

Serlimar: Falta di transparencia

Un punto preocupante den rapport ta cu Serlimar no a entrega datonan actualisa pa e periodonan reporta. Esey ta pone un sombra riba un servicio publico vital, maneho di desperdicio.

Sin claridad den finanzas, e nivel di responsabilidad ta limita. Gobierno a urgi Serlimar pa sigui e mesun regla cu otro institucion — publica dato completo y na tempo. Problemanan den coleccion y eficiencia no ta nada nobo, y sin accion concreto e riesgonan por sigui crece.

Educacion: SEPB y Universidad di Aruba

Segun e rapport ta indica institucionnan educativo manera SEPB y Universidad di Aruba ta keda den un situacion mas modesto, pero cu retonan cu ta keda presente. Gastonan ta bay surpasa e ingreso, y esey ta pone presion riba e presupuesto di e institucionnan.

Gobierno a reitira cu educacion ta un pilar pa futuro. Proyectonan ta keda den marcha pa adapta curiculo na necesidad di mercado laboral y pa fortalece relacion entre universidad y sector priva.

Un tema cu ta ser ripiti den tur seccion di e rapport ta cu mester di mas claridad, mas transparencia. Gobierno a admiti cu falta di datonan completo ta limita debate publico y decision politico.

E uitvoeringsrapportage di e dos kwartaal di 2025 ta mustra progreso, pero pa logra un politica financiero fuerte, tur institucion mester publica nan data completo. Reglanan mas estricto pa reporta y un sistema digital standard ta den preparacion.

E balans mescla ta cla: turismo ta duna stabilidad, pero gasto na salud y pensioen ta pone presion riba e presupuesto. Si no tin reforma, riesgonan ta cu otro sector — manera infrastructura y innovacion — lo no haya basta recurso.

Expertonan ta adverti cu depende di debenan exterior pa tapa deficit por pone Aruba mas vulnerabel na fluctuacion di tasa di interes mundial. Pero tambe tin oportunidad. Cuido mas eficiente, coleccion di contribucion mas fuerte y uso mas strategico di ingreso di turismo por trece un cambio positivo.

Segun e uitvoeringsrapportage di e di dos kwartaal di 2025 ta enfatisa, sector colectivo ta na un crusada. Institucionnan vital ta sinti presion, pero cu reforma y mas transparencia, un futuro sostenibel ta posibel.

E riesgonan ta real, pero solucionnan tambe tin na man. Pa gobierno, e documento ta un yamada pa accion — no mas solucion temporario, pero mester medidanan structural cu ta proteha stabilidad financiero di Aruba riba termino largo.

Drentando e di dos mitar di 2025, decisionnan cu gobierno tuma riba salud, pensioen, educacion y servicio publico lo determina no solamente balans di e aña aki, pero tambe resiliencia social y economico pa futuro di Aruba

Aunke Aruba ta haci paso den direccion di mas transparencia y control financiero, hopi di e medidanan – manera regla pa destaho, sistema di rapportage y regla pa propiedad – lo solamente bira realidad entre 2025 y 2026. Mientras tanto, atrasonan den reportahe y falta di capacidad humano ta keda un gran deficiencia.