Diaranson ultimo den sala di Dr. Edward Cheung Center of Innovation a firma e acuerdo. Presente na e evento aki tabata tur lenders cu a participa na yega na e montante importante aki y esunnan envolvi pa logra e acuerdo.

Segun un comunicado di prensa, despues di un mocion den Parlamento cu a pidi pa un ‘merge’ entre Utilities Aruba, WEB Y Elmar, e importancia di un prestamo consolida tabata crucial.

Asina e proceso a cuminsa na mei 2018, momento cu Utilities Aruba a firma cu e compania Finance Quest, pa fungi como Arranger y subi mercado financiero pa busca financiamento pa e cifra total di 503 miyon florin. E compania Finance Quest, consistiendo di 3 consehero financiero local, hunto cu mas di 75 aña di experiencia, a logra na cera un acuerdo unico cu interes y condicionnan di mas abou cu a yega di keda logra, segun e comunicado. E mesun compania aki a logra un deal unico pa Aeropuerto di Aruba caba y cu e acuerdo aki, a bolbe demostra nan capacidad.

 

E financiamento aki tabata importante pa e alrededor di 13 proyecto pendiente cu ta resorta bou di Utilities, WEB y Elmar. Entre otro e proyecto di un edificio di laboratorio nobo, un sistema di battery energy storage, water reroute via Watty Vos Boulevard, VFD Pumps Alto Vista y Sero Preto, Smart Metering di awa y coriente pa menciona djis algun, tur cu e meta principal di baha prijs di awa y coriente.

 

Total a participa 10 lenders, local y internacional; Caribbean Mercantile Bank NV, First Caribbean International Bank (Curacao), RBC Royal Bank (Trinidad & Tobago), Fatum Life Aruba NV, Ennia Caribe Leven NV, Stichting Bedrijfpensioenfonds Aruba, Stichting Fondo di Pensioen di Trahadornan di Empresanan di Fundacionnan Publico, Algemeen Pensioenfonds van Curacao, Stichting Vidanova Pensioen Fonds, Foundation Pensioen Fund Isla Curacao. Como Agent den e acuerdo aki ta United International Bank NV.

Oficina di abogado cu a keda encarga cu aspectonan legal di contracto aki tabata Spigt Dutch Caribbean.

 

E acuerdo necesario y crucial aki awor lo percura pa continuacion y realisacion di plannan cu tabata pega pa un tempo caba pa logra e meta di gobierno cu ta pa baha prijs di awa y coriente pa nos comunidad.

LEAVE A REPLY

Please enter your comment!
Please enter your name here