Ocho acusacion, dos victima menor di edad, pornografia infantil y arma di candela sin permiso. Esakinan ta e elementonan cu a sali dilanti den sala di corte durante tratamento di e caso penal contra Siegfried Raymundo Koolman, un persona conoci pa su trabao na aeropuerto y como chauffeur di ex-prome minister.
Fiscal di Ministerio Publico (OM), fiscal Van der Biezen, a pidi un castigo di dies aña prison. E defensa, dirigi pa abogado Rosenstand, a insisti cu e declaracionnan di e victimanan no ta consistente y cu su cliente no por a comete e actonan di cual e ta ser acusa. Hues lo duna su veredicto dia 10 di october.
Segun declaracionnan, Koolman tabata un figura familiar den bario. El a traha como na aeropuerto y pa ex-prome minister di Aruba. E tabata biba den un trailer cu, segun e victimanan, tabata caminda nan tabata bay pa usa wi-fi y wak television. Tur cos tabata mustra normal. Pero tras di esaki, segun victimanan, tabata tuma luga abuso cu lo marca nan pa resto di nan bida.
Victima R. menor di edad, kende ta e victima principal, a indica cu e abuso a cuminsa tempo cu e tabatin cinco aña di edad. Su tata a entrega un keho na polis di Hulanda den november 2024, despues cu R. a durf bisa kico a sucede.
Den su declaracion, R. a conta cu Koolman – su bisiña – a cuminsa mishi cune na su parti intimo y pecho, cu y sin paña y poco poco el a cuminsa bay mas leu te ora cu tempo cu e tabatin siete aña, penetracion sexual a tuma luga. Esaki a sigui te ora el a cumpli 13 aña.
R. a indica cu el no tabata durf bisa nada na su mayornan pasobra e tabatin miedo cu si e bisa algo, Koolman lo haci algo malo na su mama.
Un detaye cu a duna peso na su declaracion ta cu e victima a describi un cicatriz riba bil di Koolman, un cicatriz cu polis a logra confirma cu potret. Na e punto aki, hues a puntra e sospechoso kico su reaccion tabata, pero Koolman no a duna ningun contesta.
No solamente R. tabata victima di e sospechoso Koolman, pero su amiga, W., tambe a conta cu abuso contra dje a cuminsa tempo cu e tabatin ocho of nuebe aña.
Segun su declaracion, Koolman a haci “tur cos” cu e dos mucha. Den un relato impactante, W. a bisa cu ora Koolman tabata tene relacion sexual cune, R. mester a tene su mannan pa yud’e soporta e dolor.
W. tambe a bisa cu un momento el a pidi un bikini color neon cu Koolman lo pidi p’e online. Segun e, Koolman a insinua cu si e no por paga pa e bikini, e lo tin cu tene relacion sexual cune. W. a nenga esaki, pero e indicacion a pone mas luz riba e manipulacion cu tabata sucede.
Durante e combersacion cu victima R., autoridadnan a puntra con el a laga e sospechoso abusa di dje y dicon e tabata sigui bay cerca dje. Su respuesta tabata cu e no tabata sa miho y cu nan un edad asina hoben, el kere cu tur e cosnan ey tabata normal.
Victima R. a agrega cu Koolman tabata tin “sex toys” den su trailer. Den su declaracion el a describi un aparato preto cu tabata parce un vagina, cu e victima a yama un “penis pump”, cual e tabata usa pa haci su penis mas grandi. Koolman supuestamente tabata usa esaki tambe riba dje, un experiencia cu, segun R., a causa trauma cu ainda ta afecta su bida awendia.
Fiscal di OM a presenta potret y video cu ta mustra e dos victima den trailer hunto cu Koolman. Den un di e videonan, e muchanan tabata huma vape hunto cu e sospechoso.
Ademas, polis a descubri seis arma di candela den cas di Koolman. Aunke e tabata miembro di un club di tiro, por lo menos un arma no tabata registra na su nomber. Segun fiscal, manera cu e arma tabata ser warda tampoco no tabata sigur, y esey a pone e menornan di edad den peliger. Victima R. mes a conta cu el a haya arma den trailer y a traha video cune.
Un punto fuerte den acusacion ta un link di pornografia infantil cu polis a descubri den telefon di Koolman. Koolman a insisti cu e nunca a busca ni cumpra tal material, solamente pornografia di adulto. Segun su splicacion, el a ricibi un link, pero no a logra habrie, y nunca a mira kico e tabata.
No obstante, polis a haya material pornografico infantil y tambe potret y video intimo di victima R. tambe den su posesion, loke a reforsa e acusacion di posesion ilegal di material explicito cu menor di edad.
Un punto cu hues a resalta tabata e silencio persistente di Koolman. Ora hues a puntr’e directamente, el a scoge pa no reacciona. Pero ora su abogado haci e mesun pregunta, Koolman a contesta, locual hues a remarca den sala.
Na momento cu hues a duna sospechoso Koolman un ultimo oportunidad pa duna un splicacion di su banda, e sospechoso a scoge pa no bisa nada.
Durante e sesion, tata di R. y mama di W. a usa nan derecho pa papia. Cu emocion hopi halto, nan a conta con e abuso no solamente a perhudica e muchanan, pero tambe a causa daño profundo pa henter famia.
Ambos a presenta peticion pa compensacion. Famia di R. a indica cu gastonan material y inmaterial ta keda rond di 85 mil florin.
Fiscal Van der Biezen a insisti cu declaracionnan di e victimanan ta creibel y consistente. El a enfatisa cu nan testimonio ta cla, ta cuadra cu e luga y tempo di e suceso, y ta reforsa cu evidencia visual. Pa e motibo ey, Ministerio Publico ta para firme riba su peticion di castigo di 10 aña di prison.
Abogado Rosenstand, di su banda, a ataca e testimonio di e victimanan y nan famia. Segun e, hopi parti no ta consistente, victimanan supuestamente tabata inventa of exagera, y nan relato no ta identico. El a trece dilanti cu stiefmoeder di R. supuestamente a bisa cu R. tabata sexualmente activo y cu tabatin hopi problema familiar pa motibo di un amigo nobo cada siman.
Rosenstand tambe a señala cu Koolman tin problema serio cu su pia, loke a causa e cicatriz riba su bil. Segun e, su cliente no ta fisicamente capaz di tene relacion sexual den posicion cu victimanan a describi.
Despues di oranan largo di tratamento, argumento y contra-argumento, hues a indica cu veredicto lo ser pronuncia den tres siman, riba 10 di october. Un decision crucial pa e victimanan, nan famia y comunidad, den un caso cu a move hopi emocion y discusion riba seguridad di mucha y maneho di ley na Aruba.
