(AP) — Fiscal di Districto di Manhattan, Alvin Bragg ta para firme contra e retorica cada biaha mas hostil di Donald Trump, bisando su personal cu e oficina no ta bay ta intimida of disuadi mientras ta acerca un decision riba acusacion formal di e ex-presidente.
Bragg a manda un memo interno diasabra laat despues cu Trump a lansa un post den tres parti riba rednan social den cual el a bisa cu por arest’e den proximo dianan, a critica e fiscal y a curasha su sostenedornan pa protesta y “tuma nos nacion back!”
Bragg, ken su oficina ta yamando testigo na un hurando investigando placa pa silencio paga den nomber di Trump durante su campaña na 2016, no a menciona e Republicano su nomber, pero a laga cla cu ta di dje e tabata skirbi. E memo a yega mientras agentenan di ley na New York City ta preparando seguridad pa e posibilidad cu ta acusa Trump y e presenta den corte na Manhattan.
Mientras Bragg a busca pa alivia preocupacion tocante potencial menasa, postnan tocante protesta a cuminsa aparece online, incluyendo un rally awe contra Bragg organisa pa Club Republicano Hoben di New York.
Oficialnan di ley na New York tambe ta monitoreando di cerca e combersacionnan online advertiendo cu protesta y violencia si aresta Trump, segun cuatro agente a bisa AP. E menasa cu agentenan di ley ta vigilando ta varia den specificidad y credibilidad, segun e agentenan. Principalmente publica online y den chat group, e mensahenan ta inclui yamado pa manifestantenan arma blokea oficialnan di ley y purba di stop cualkier potencial aresto.
Bragg, un Democrata, a hereda e investigacion di Trump na momento cu el a asumi su cargo na januari 2022 y rapidamente a ricibi critica – no di Trump, sino di fiscalnan pa hala atras di e plannan di su predecesor pa acusa e ex-presidente cu fraude relaciona cu negoshi.
Bragg a bin cu condena pa compania di Trump, Trump Organization, y su hefe financiero pa un schema di fraude di impuesto no relaciona prome cu bay na loke ta yama “e siguiente capitulo” di e investigacion – trece scrutinio di nobo riba e pago di placa pa silencio, cual ta suheto di investigacionnan federal y estatal ripitidamente durante ultimo seis aña.
No a haci ningun anuncio publico na ki tempo por spera un decision riba si ta bay acusa Trump formalmente, y ta spera cu al menos un testigo adicional ta bay testigua, probablemente awe dialuna, dunando mas indicacion cu ainda no a tuma un voto pa enhuicia.
Den un post ayera, Trump a critica Bragg – e prome fiscal color scur na Manhattan – como un “racista den reverso” y a acus’e, sin evidencia, di tuma orden di Departamento di Husticia y ta un pion pa donador Democrata biyonario, George Soros, kende a sostene campaña di Bragg durante e Color of Change PAC.
