(AP) – Departamento di polis a entrega diahuebs su resultadonan di investigacion tocante fayecimento di cinematografo ken a ser tira pa Alec Baldwin na fiscalnan,
Santa Fe Cheriffs Office su vocero Juan Rios a bisa cu dos map yen di informacion a ser entrega na Santa Fe su oficina di abogado, sin cu a entrega ningun recomendacion pa posibel cargonan criminal. El a bisa cu e informacionnan entrega ta delinea evidencia colecta, incluyendo entrevistanan di investigacion y analisis forensico di evidencia fisico di FBI. Abogado di districto Mary Carmack-Altwies a bisa via vocero cu e investigadornan y fiscalnan awo lo cuminsa cu un reviso profundo pa asina yega na un decision si lo bini cu cargonan, sin menciona cualkier deadline.
Cinematografo Halyne Hutchins a fayece poco despues cu el a ser herida pa un tiro durante grabacion di un escena pa e pelicula “Rust” na Santa Fe dia 21 di october den aña 2021. Baldwin a punta e scopet na Hutchins ora cu e arma a dispara, causando herida mortal na Hutchins y heridando e director Joel Souza.
Santa Fe Cheriffs Office tin un gran cantidad di documento tocante e tiro aki, incluyendo video camara di e fayecido, interogacion di testigonan, e-mailnan, combersacionnan via mensahe di texto, inventario di amunicion y centenares di fotografia.
Adan Mendoza a describi un “grado di negligencia” riba e sitio di grabacion di “Rust” sinembargo lo laga e decision di cargonan criminal potencial na e fiscalnan. E famia di Hutchins, su casa Matthew y yiu homber di 9 aña Andros, recientemente a yega na acuerdo den demanda cu e meta di bolbe cuminsa grabacion cu Matthew como productor ehecutivo.
Baldwin a declara cu e arma a tira su so y cu e no a haci esaki. Sinembargo reportahe recien di FBI a haya cu e arma no por a tira su mes sin cu el a haci esaki. New Mexico Office of Medical Investigator a determina cu e tiro tabata un accident despues di a completa un autopsia y reviso di e reportahenan di autoridadnan.
