Den un ambiente di union, emocion y orguyo cultural Fundacion Lanta Papiamento (FLP) y e comunidad Arubiano a celebra 22 aña di oficialisacion di Papiamento, e idioma cu ta simbolo di nos identidad y nos lucha.
E evento, cu tambe a marca 16 aña di existencia di FLP, a tuma lugar den un sala completamente yen di publico na Biblioteca Nacional di Aruba y por a sinti un amor berdadero pa nos idioma durante cada momento di e celebracion.
E programa cultural y educativo cu a caracterisa e anochi a conta cu declamacion di Selvia Lumenier y Carlos Croes, presentacion musical di e conocido Johnny Scharbaay y e talentoso hoben pianista Gian Giel, locual a duna un toke artistico na e evento.
Den su charla inspirador dr. Joyce Pereira a trata e tema importante “Kico a logra te awor y kico falta?” destacando e balor di Papiamento den nos desaroyo como pueblo. Tambe, Ramon Todd Dandaré Mag. Ling. a comparti un reflexion profundo den su charla “Di fruta pa raiz – Encuentro cu origen”, cu a laga hopi hende pensa riba nos raiz linguistico y cultural. Un momento special tabata e presentacion di e representantenan di Wikipedia Papiamento, Ginelly Quandt y Ricardo Arends, tocante e importancia di presencia di nos idioma den e mundo digital, un paso importante pa e futuro di Papiamento.
Literatura na Papiamento ta un muestra importante di e rikesa di nos idioma. Un momento di sorpresa tabata ora na un manera original diferente persona den audiencia a gana un buki. Tres titulo tabata trata buki pa mucha cu Departamento di Enseñansa di Aruba a publica pa scol basico. E di cuater titulo ta “Mi memorianan”, un autobiografia di Chinto Erasmus, obsekia pa su yiu muhe di Etty Erasmus cu ta biba na Corsou.
Durante e celebracion FLP a rindi homenahe na algun persona cu a dedica nan esfuerso pa defende y promove Papiamento, nombrando nan como miembro honorario di e fundacion. E anochi a culmina cu un brindis yen di speransa y inspiracion pa sigui cu e lucha pa un reconocemento y aceptacion completo di nos idioma nacional.
E evento tambe tabata un oportunidad pa enfatisa cu e lucha pa Papiamento no a caba. Ta necesario pa sigui traha pa un Aruba caminda Papiamento por tin e lugar mereci den tur aspecto di nos bida. Un celebracion cu a reafirma e poder unificador y cultural di Papiamento den nos comunidad.
