“Mi no tin e intencion di sinta sin haci nada.” Asina Secretario di Estado pa Asuntonan di Reino, Eddie van Marum a bisa na final di su bishita na Aruba. Van Marum ta referi na e hecho cu e ta demisionario y cu tin un eleccion pa Tweede Kamer na Hulanda november proximo.
E titular a sigura cu e lo no sinta keto (particularmente pasobra “nos tur sa con largo formacion ta tuma na Hulanda”) y lo haci su maximo pa ehecuta maneho cu ta na interes di relacion di tur e paisnan di Reino y sigur stimula progreso pa nan. Particularmente e ta referi na e trabaonan cu ta tumando luga pa Aruba cumpli cu condicionnan di e landspakket. Van Marum no a duna ehempel concreto, pero a urgi pa conclui e palabracionnan di proyectonan mas lihe posibel pa den caso cu un of mas no logra den e tempo stipula, tin e argumentacion pa splica di con.
“Mi a papia cu dirigentenan, parlamentarionan, pero tambe representantenan di comunidad pa asina haya un miho idea kico tur ta biba aki, pasobra mi no ta kere den impone loke Hulanda kier, sino mira kico ta e posibilidadnan cu tin aki mes. Nos mester fortifica otro. Esey ta e forma cu mi kier duna contenido.”
Van Marum a complimenta e trabou cu tur hende na Aruba ta haciendo (den luz di e palabracionnan cu Hulanda), cu a dun’e un miho impresion di e colaboracion cu ta existi. “E ta crea un bon brug pa continua traha riba asuntonan pendiente.”
Ta netamente e colaboracion aki cu van Marum a considera como e punto mas impresionante di su bishita, ya cu aunke e discusion ta ‘placa,’ e realidad ta cu e ta implica mas tanto hende. “Mas miho conecta cu otro, mas facil e proceso lo sigui cana. Tur hende, incluso esnan den servicio publico cu ta traha den e cuadro aki a haci nan maximo pa presenta proyectonan cu por ta basta dificil.”
“Kico mi kier”
Eddie van Marum a bisa cu un di e pasonan pa yuda desaroyo economico ta pa stimula comerciantenan chikito y mediano pa inverti mas. Pero, un di e retonan pa inversionistanan ta e financiamento necesario. Consequentemente, Hulanda a bay de acuerdo pa e asina yama BMKB regeling (Borgstelling Midden en Klein Bedrijf) cu a firma e siman aki. E areglo aki ta brinda empresarionan local e oportunidad pa logra financiamento mas facil na banconan danki na un fondo di garantia. “Empresaria chikito y mediano ta e curazon di economia y cualkier estorbo cu por kita pa e empresarionan lo yuda na desaroyo, y ta locual nos kier sostene.” Van Marum a pidi instancianan financiero manera banconan na Aruba pa bira parti di e areglo aki.
E Secretario di Estado a sigura cu locual e kier ta pa Aruba y e otro islanan bira mas resiliente riba tereno economico, finanzas publico, bon gobernacion y reformanan di enseňansa, salud publico y estado di derecho (red. puntonan di e Landspakket). Esey ta e enfoke.
RAft
Van Marum a bisa di a tene bon combersacion cu Gobierno riba e rijkswet cu mester duna Parlamento Hulandes mas di bisa den maneho financiero di Aruba, esta e Rijkswet Aruba Financieel Toezicht, Raft. Pero kico exacto, e no a defini y a bisa cu finalmente Parlamentonan di Hulanda y Aruba lo determina kico ta e texto final. “Mester busca kico ta e decision final, ya cu ta Parlamentonan finalmente ta duna Gobiernonan e instruccionnan. Tin biaha un partido ta sufri mas ‘dolor,’ tin biaha e otro. Pero e obhetivo ta pa yega na otro, pasobra tin beneficio grandi pa ambos.” Van Marum ta convenci cu e trabou ta casi cla y cu pronto lo por informa Parlamentonan y tur actor envolvi riba e ley y su implicacion.
