Formacion Social ta un proyecto di Gobierno di Aruba dedica pa hende homber entre 18 y 24 aña. Nan a informa inscripcion ta habri ainda pa asina cuminsa cu e grupo nobo di participantenan dia 8 di maart proximo.

Asina a duna di conoce Jessica Ras, ken ta trahado social na SVT Formacion Social. Ademas di e proceso di inscripcion cu a cuminsa caba, el a comenta cu esunnan interesa mester pasa un proceso di seleccion, y tambe mester haci un test medico na Svb. Tambe tin algun reunion den cual nan mester participa, y combersacionnan cu mester tuma luga cu e organisacion pa asina nan por participa den e grupo cu ta bay cuminsa na maart.

Esaki ta un tema conoci pa algun mayor cu kier pa nan yiu forma parti di esaki. Ras a bisa cu hopi biaha hobennan mes no ta wak e importancia pa participa den e trayecto, pero mayornan si of famia tambe. Di mesun manera ta existi persona cu nan mes ta yega pa busca informacion, pa motibo cu nan ta gusta e programa y nan kier participa.

Ras a expresa cu nan meta ta pa yuda e hobennan entre 18 pa 24 aña. No ta importante si por ehemplo, algun di nan a cay cera, ta den mal caminda of pa algun of otro motibo no a termina scol. Tambe por tin e caso cu e hoben a caba scol pero no ta haya un oportunidad pa traha, segun loke Ras a sigura. “Nos t’ey pa yuda nan, duna nan un second chance y ademas duna e hermentnan necesario pa ora nan caba, nan por ta miho para den comunidad di Aruba”, el a expresa.

Otro rekisito cu un hoben mester pa drenta den programa aki ta cu si tin nacionalidad stranhero, e mester tin un permiso valido y mester percura pa su seguro AZV ta valido. Den transcurso di tempo ora cu e hoben ta drenta den e programa tin mas exigencia cu e hoben mester adapta na dje, “vooral den e bida militar cu tin cuminsa adapta su mes na dje”, Ras a informa.

Igualmente, el a detaya cu nan a yuda mas di cien hoben caba. Y normalmente, na momento cu nan ta wak e hobennan cu a finalisa e trayecto completo, nan ta considera esaki un exito. Pero tambe tin hobennan cu ora nan ta mira e trayecto kier bay nan scol back, pa motibo cu nan no ta gusta e parti militar.

Tambe Ras a menciona cu tin otronan cu a haya cu mester di un motivacion pa sigui un scol back of pa bay busca un trabao si nan no a kier a sigui cu e programa, loke ta nifica cu nan a haya un ‘push’ pa nan sigui bay dilanti y mehora nan bida.

Di mesun manera, un hoben cu a cuminsa e trayecto na augustus di aña pasa y cu tin 20 aña di edad, a conta cu su experiencia den SVT “tabata uno unico” na unda el a siña basta. El a siña di su mes tambe, pa motibo cu eynan e ta haya training disciplinario cu ta bon pa e hobennan.

El a afirma cu prome cu el a drenta den e programa aki e tabata cera den KIA y e ta considera “cu mi tabata den mal caminda y awor, danki na e opleiding aki, mi ta full liber di e bida di caya na unda mi tabata”, el a expresa.

Nan a agrega cu esaki ta un programa cu famianan stranhero cu a bin biba na Aruba for di algun tempo por haya un bon iniciativa pa nan yiunan y asina nan por integra den e comunidad na unda nan ta wordo capacita cu Enseñansa pa Empleo, Gobierno ta aporta un subsidio cada luna pa nan gastonan, di esaki nan a comenta cu den tempo di pandemia Covid-19 e programa aki ta basta faborabel pa un hoben por ta den e parti di formacion social.

A anuncia cu pa luna di augustus di e aña aki nan lo cuminsa cu un programa pa hende muhe, di mesun edad di 18 pa 24 aña. Pa motibo cu esaki ta un peticion cu a wordo haci pa Marinierskazerne y minister di Asuntonan Social y Labor, Glenbert Croes, pa asina tin formacion social pa hende muhe.

“Esaki ta pa e bienestar di e hubentud” cu hunto cu e entrenamento y capacitacion di Enseñansa pa Empleo, lo ta pa nan futuro. Y di e manera ey nan por forma nan curriculum pa e dia di mañan nan por tin un miho forma pa por defende nan mes den area laboral.

Ta conoci cu na Aruba tin personanan cu ta haci bida riba caya y cu no tin un cas na unda nan por biba. Ta p’esey cu nan tin e idea di rescata e hobennan cu ta den mundo di adiccion, pa asina nan por drenta den e programa y haya capacitacion.

Instancianan como FADA y otronan cu ta bin for di Hulanda ta bin Aruba pa capacita e hobennan, entre otro con nan por maneha nan finanzas, “pa e dia di mañan e hobennan aki por haya un trabao y nan por tin un hogar mas factibel”, nan a finalisa.