Foxy Rox-cey: ‘Mester educa mas hende tocante comunidad LGBT’

‘Foxy Rox-cey’ manera e ta presenta su mes, ta un persona transgenero cu a logra cambia su nomber oficialmente un par di aña pasa. Pero segun e mes a sigura, te ainda sociedad no ta acepta esaki 100%.

Bon Dia Aruba a haci un entrevista special cune y el a splica cu na momento cu el a logra di cambia su nomber legalmente, esey tabata pa e mes, pero tambe tabata un paso pa habri e porta pa e proximo generacion cu lo bin su tras, cu lo kier su identidad sea di homber pa muhe of di muhe pa homber.

Asina mes, Foxy a conta cu na momento cu el a cuminsa busca trabou, el a haya un den un casino cu supuestamente tabata ‘LGBT friendly’ segun e mes a sigura. Pero na final nan tabata tin nan reglanan, cu el a bisa cu su mes tabata sinti discriminacion.

Foxy a expresa cu ta existi hopi hende di comunidad LGBT na Aruba. Tambe el a relata cu prome cu el a haci e peticion pa corte cambia su nomber, tabatin e caso di un persona di 16 aña cu tambe a haci e mesun proceso cune. Pero cu su mayornan a laga e caso confidencial, pa motibo cu tabata trata di un menor di edad.

Di mesun manera, el a laga sa cu e proceso pa por cambia di nomber ta hopi largo. “No ta cuestion cu bo ta lanta un dia y ta bisa a mi ta un transgenero y mi kier cambia mi nomber. Asina e no ta bay.” Cuminsa cu un dokter internista, un psicologo y minimo ta dura 3 aña pa haci e peticion.

Tocante Aruba, el a comenta cu mester tin mas respet pa comunidad LGBT. Companianan ta mustra cu nan ta acepta esaki den nan regla, pero hopi biaha no ta implementa esakinan “Ta facil pa pone den e reglanan, pero si nan no implementa, ta keda mesun cos”, el a sigura.

“Mester educa hende, educa e muchanan cu ta mas grandi den Mavo por ehemplo, di loke ta trata sexualidad y comunidad LGBT. Pa motibo cu esaki ta birando mas grandi dia pa dia na Aruba”, Foxy a manifesta.

El a conta cu sosten ta hopi importante pa henter e proceso. El a haya sosten di su mama principalmente, Desiree Croes cu ta su abogado y consehero, como tambe di Monica Janssen cu ta su sistema di apoyo.

Di esaki, Desiree Croes, abogado y defensor di derechonan di comunidad LGBT na Aruba, a manifesta cu na aña 2018 tabatin 16 persona cu abiertamente a demostra cu nan ta transgenero. Mayoria di nan tabata biologicamente masculino y tabata identifica nan mes como femenino.

Na e momentonan aki, el a menciona cu no tin e cifranan actualisa, pero loke e ta hayando mas awor ta e mayornan cu ta busca di su asesoria pa motibo cu yiunan kier cambia nan nomber. “Esey si ta posibel den nos leynan, cambia e nomber, pero no e genero” Croes a relata.

Na Hulanda esaki ta posibel caba. E proceso ta mas simpel segun el a declara, aunke e mester tin un aña bibando eynan. E persona ta bay censo y ta solicita un formulario y hunto cu un carta di su specialista – cu ta afirma cu ta bou tratamento of a haya tratamento caba – mas cu cinco aña bibando como persona di otro sexo, e ta haya su identidad oficialmente.

Di esaki, el a bisa cu na Tweede y Eerste Kamer na Hulanda tambe e topico aki lo bin dilanti pronto, pa asina e persona por biaha eynan y den un par di siman e por regla su identidad.

Croes a comenta cu Aruba ta hopi leu di esaki y cu pronto e lo kier trece dilanti, pa motibo cu un persona ta cambia su nomber, pero si e ta keda cu e sexo cu el a nace cune, no ta un proceso completo. Na Aruba tin mesun cos cu tin e casamento na Boneiro, pero eynan pronto esey por cambia y e ora ey e Arubianonan cu lo kier haci cambio oficial di identidad y genero mester biaha eynan y bin back na Aruba.