Den e temporada aki nos corant ruman Aruba Today ta para keto tambe na e fundacionnan cu ta haci trabou social necesario pa diferente grupo den nos comunidad. Bon Dia Aruba tambe kier pone atencion riba nan y e biaha aki nos ta publicando e storia riba Fundacion Pa Nos Comunidad (FPNC).

Meta di e fundacion ta combati pobresa, emergencia mental y exclusion social. Nan ta yuda no obstante nacionalidad, religion of cultura. FNPC ta e unico ‘foodbank’ oficialmente riba nos isla. Jareth Vermeulen ta e coordinador di proyecto y negoshi na e fundacion.“Tin pobresa y e ta creciendo riba e isla. No tin alegria so. Hopi cliente a perde nan trabou y ta cay duro. Hoben, bieu, crisis den famia, tur ta pasa akinan.”

E fundacion ta un organisacion cu ta opera profesional y ta haci hopi mas banda di partimento di cuminda. “Nos ta duna nos clientenan registra pakete di alimentacion. Pero tambe pakete na esunnan cu mester di dje urgentemente y nos tin proyectonan di participacion pa yuda nos clientenan reintegra den nos comunidad”, segun sr. Vermeulen.

E ultimo ta un meta importante pa e fundacion. “Clientenan por cuminsa cerca nos como boluntario pa asina siña e proceso di traha atrobe y despues nos ta yuda nan pa haya trabou bek. Si nan ta cla p’e, nos ta yuda nan cu trabou inmediatamente. Nos tin nos mesun tienda Cosoma unda nos ta bende paña y cuminda cu prijsnan abou. Tur e ganashi ta bay bek na e fundacion pasobra nos ta un organisacion non-profit y no gubernamental.” Sr. Vermeulen ta sigui conta cu nan tambe ta ofrece curso pa reintegra manera curso pa siña ta mas asertivo.

E fundacion tin dos trahado cu tabata cliente antes y un di nan, Edison Asprilla, ta nomina pa e ‘Volunteer of the Year Award’. E coordinador ta conta cu nan tambe ta haci bishita na cas pa asina keda den contacto cu nan clientenan y wak kico nan mester.

Lista di spera
“Tres biaha pa siman nos ta parti pan, un donacion di e supermercadonan Superfood y Save-A-Lot. Ademas nos tin pakete cu productonan basico. Sinembargo nos mester di hopi mas ayudo.” Tin un lista di spera cu dobel mas cliente cu ta registra awor. Cu mas sosten e fundacion por yuda mas hende obviamente. FPNC ta colabora tambe cu Departamento di Asuntonan Social y tambe ta e overall pa otro fundacionnan social.

Esunnan cu kier duna, por tuma contacto cu FPNC: 588-0002 y riba nan website www.fnpcaruba.com y Facebook. Nan mester entre otro paña netchi tambe pa asina nan clientenan por bisti adecua durante solicitud pa trabou. Tambe tin un necesidad di sapato,den tur size. Sr. Vermeulen: “Pero nos por uza tur cos y esun cu kier bishita nos, ta masha bonbini.”