Den e siman cu a pasa, pueblo di Aruba a mira claramente con oposicion (MEP y PPA) ta sigui opta pa teatro politico, grito y desinformacion.

E realidad ta cu loke nos ta enfrenta awe no ta nada nobo, sino e consecuencia di decisionnan tuma for di 2018 caba. Esey ta ora cu parlamentarionan di MEP mes a bin cu mocion pa cambia e Landsverordening, habriendo caminda pa e trayecto cu nos ta topa awe.

Despues, den e mes periodo bou di un gobernacion dirigi pa MEP, no a cumpli cu e condicionnan estableci. E falta di cumplimento ey a empeora e situacion y provoca Hulanda pa bin cu un Rijkswet. Ta for di e tempo ey e trein aki a sali y MEP a forsa henter Aruba pa subi, sin alternativa.

E sesion publico di diabierna ultimo tabata un ehempel cla: un sesion cu MEP y PPA a pidi, cu a haya tambe, pero bo ta mira hopi cla cu nan meta nunca tabata pa bin cu algo concreto pa Aruba. Nan no ta interesa pa lesa y debati serio riba e propuesta di ley, sino pa haci show.

Loke nos ta mira ta cu oposicion tabata mas interesa den grita y interumpi. Presidente di Parlamento, Marlon Sneek a actua den e limitenan di su autoridad y cu respet pa e institucion, y a pospone e sesion pa duna tempo na tur miembro pa lesa e documento, analisa y bin cu argumento serio den nomber di henter pueblo.

Ta importante pa pueblo comprende. No cay den e trampa di grita pafo di Parlamento y manipula sentimento. E proceso no a cambia. Un propuesta di ley ta pasa prome na Raad van Advies, cu ta duna su observacion y sugerencia. Djey ta bay bek na gobierno pa haci ahuste y despues ta yega parlamento pa debate.

Sinembargo, oposicion no ta interesa den proceso, ni den resultado; solamente den hunga wega di politica barata pa schuif e responsabilidad di e debacle aki pa e gobierno actual. Pasobra realidad ta keda, cu si MEP a cumpli cu su obligacion na 2018, awe Aruba no tabata den e situacion aki cu Hulanda.

Fraccion AVP ta carga su responsabilidad cu e seriedad maximo. Nos ta analisa e documento presenta pa gabinete AVP/FUTURO, y lo bolbe den sala cu pregunta y argumentonan realmente importante, na nomber di pueblo di Aruba.

Loke a pasa diabierna tabata nada mas cu un acto di populismo: un intento pa manipula patriotismo, mas di e mes politica bieu cu cada dia mas hende ta rechasa. MEP y PPA ta esunnan cu a cende e candela y awe kier punta dede riba un otro.

Fraccion AVP lo sigui defende pueblo di Aruba y su interesnan cu integridad, seriedad y compromiso.

Nota di redaccion: E articulo aki ta opinion di e autor y no ta representa opinion di Bon Dia Aruba.