Fraccion di AVP ta condena medida anti democratico contra periodista Andrade

Parlamentario Marlon Sneek AVP)

Lider di e fraccion di AVP den Parlamento Marlon Sneek a mustra enfaticamente  cu ningun momento fraccion di AVP a bay di acuerdo cu e decision anti-democratico di prohibi un periodista di drenta Parlamento pa un periodo di tres luna.

Sr Sneek a mustra cu den nomber di fraccion berde y kier a coregi un informacion cu ta coriendo rond cu tur lider di fraccion lo a bay di acuerdo cu e carta cu a wordo traha dor di Presidente di Parlamento, Ady Thijsen  y manda pa e periodista  Nelson “Speed” Andrade.

Diabierna ultimo e lider di fraccion di AVP a mustra cu Presidente Thijssen a convoca un  Senioren Convent caminda a trata e tema di e periodista  Speed Andrade.

“Esaki ta algo cu nos ta lamenta y a expresa esaki tambe den e reunion ey. Parlamento a manda un carta na sr. Andrade bisand’e cu no ta permiti su persona pa haci entrevista den sala di Parlamento si e no ta compaña pa un miembro di Parlamento.

Esaki ta un punto cu a wordo treci dilanti door di Presidente di Parlamento pero aki nos tin cu mustra cu cada periodista tin su forma peculiar di trece nan noticia dilanti y pa haci’e interesante pa nan siguidonan.

Den temporada di campaña mes  tabatin diferente grabacion cu a tuma luga den sala di Parlamento y hasta tabatin sacamento di potret di un forma cu hopi hende no a aprecia e potretnan. Pero niun dia un carta a wordo manda pa nan.

Y awor cu presentacion di un noticia a wordo haci, sin cu niun caminda a insulta  ningun persona den e entrevista cu a tuma luga den sala di Parlamento y ningun caminda a uza palabra insolente ta core tuma un medida cu no ta na su luga.

Pero nos a tuma nota c’un otro carta mas a sali despues di Senioren Convent.

Fraccion di AVP ta uno cu ta respeta libertad di prensa y nos tur por corda cu cierto prensa a lastra e Parlamentarionan y Presidente di Parlamento tempo cu AVP tabata den Gobierno. Ningun dia ningun carta a sali for di Parlamento pa bisa e radio of television kico nan haci of no. Nos a drenta un era di dictadura, un era caminda cu si bo no ta comparti mesun opinion cu gobierno, bo no ta conta y nan ta bay censura bo.”
Si tabatin insulto of algo incorecto, por bay Corte pa pidi rectificacion pero pa Parlamento di Aruba censura prensa, anto nos ta hopi leu di cas.

Na Aruba nos a mira diferente medio di comunicacion cu no ta comparti e mesun opinion cu AVP den e periodo di su Gobernacion, y den ningun forma nos a mira censura a wordo implementa di un forma.

Nan tur tabatin acceso na Gobierno of Parlamento pa por haci nan trabou. Nos ta lamenta cu e coalicion aki ta scoge e rumbo aki di purba di censura prensa,” lider di fraccion Marlon Sneek a mustra.

Fraccion di AVP ta bay manda un carta pidiendo copia di e corespondencia aki pasobra hopi biaha nan ta pone nan conferencianan di prensa den Parlamento y ta via medionan di comunicacion nan a bin tende di e prohibicion aki.  El a sigura cu nan fraccion sigur no a haya e carta en cuestion y tur decision manera e prohibicion pa drenta Parlamento mester pasa via di Comision Central loke no a sosode den e caso aki.

E ta un carta cu tur Parlamentario mester haya bista y duna su aprobacion riba dje. Nan mester por participa den decisionnan asina, pa nan no pasa berguensa si un caso asina resulta te den Corte.

Si Parlamento perde un caso asina, e ta un berguensa pa e organo aki cu ta cara di e instancia cu ta pasa leynan.

 

You May Also Like

‘Con IMF a spierta gobierno di AVP for di 2013?’

Dialuna ultimo den conferencia di prensa di Fraccion di MEP, parlamentario Setty Christiaans-Yarzagaray a ...

‘Partido ABO si ta duna transparencia financiero y e bon ehempel’

Desde 2014, partido ABO ta bogando pa transparencia den politica. Transparencia den tur sentido. ...

Curtis Fraser (POR): Danki pa Acepta mi

Tin momentonan den bida unda bo ta realisa cu di berdad tur cos ta ...

PPA su masterplan pa desaroyo di Oranjestad lo ehecuta maneho y proyecto ‘strategico’

E actual gobierno di AVP a haci Oranjestad ‘prioridad number uno’ di su maneho ...

Posibel mocion di desconfiansa contra Minister Paul Croes na caminda

Relaciona cu tur locual ta pasando rond di minister Paul Croes a bin dilanti ...

‘IMF preocupa cu implicacionnan di promesanan di campaña’

Parlamentario, Richard Arends a mustra cu durante reunion cu delegacion di fraccion di AVP ...