Fraccion di MEP a haci preguntanan oficial na Gobierno riba e renobacion di Aruba Huis. Cu esaki, nan ta pidiendo claridad y transparencia total riba e gasto di placa publico, e proceso di destaho publico y e compania cu a keda selecciona pa e trabao.
Den su preguntanan dirigi na minister Gerlien Croes, Fraccion di MEP ta pidiendo pa informa cuanto placa a presupuesta, y con e destaho a tuma lugar, y principalmente ta cual partido a gana e licitacion publico, mirando e speculacionnan aki na Aruba cu ta un persona cerca di e minister cu ta biba na Hulanda awor, lo ta esun encarga. Tambe a pidi pa tur documentacion relevante wordo entrega na Parlamento, incluyendo e documentonan di destaho, decision di destaho, contractnan y documento di inscripcion di Camara di Comercio di Hulanda di e compania cu a gana e destaho.
Transparencia no ta opcional, ta un obligacion segun Fraccion di MEP. Specialmente ora tin speculacionnan den comunidad cu ta circula, Gobierno tin e deber di aclaria tur cos na forma cla, completo y documenta. E unico manera pa elimina duda y proteha confianza publico ta cu apertura total. Cu e paso aki, Fraccion di MEP ta cumpli cu su tarea di control como parlamentarionan y ta bolbe subraya e importancia di bon gobernacion, dunamento di cuenta y respet pa ciudadano.
