Fraccion di MEP a manda preguntanan na e minister di Asuntonan General,Prome Minister, relaciona cu un articulo cu a sali recientemente den Bon Dia Aruba, unda e minister a bisa cu un miembro di e Staten, Mike de Meza, ta yuda e minister di Energia cu idea y conseho.

Esaki ta un preocupacion grandi pa fraccion di MEP pa motibo cu esaki, segun articulo III.7 di nos Constitucion, por compromete e principio basico di separacion di poder. E articulo aki ta bisa claramente cu un miembro di Staten no por tin ningun parti den loke ta e maneho ni ehecucion di gobierno.

E preguntanan cu MEP a haci ta lo siguiente:

Ta importante pa gobierno identifica si tin un base legal cu gobierno ta usa pa hustifica cu un miembro di Parlamento por duna conseho cu por influencia e maneho den un ministerio, mirando cu articulo III.7 ta prohibi esaki sin excepcion legislativo;

Tambe ta importante pa sa riba ki manera e minister lo percura cu e rol di Mike de Meza como consehero no influencia e control democratico di Parlamento;

Tambe e fraccion di MEP a puntra cuanto reunion of consulta a tuma lugar entre e minister y e miembro di Parlamento de Meza;

Finalmente e fraccion kier sa ki mecanismo e minister a implementa pa garantisa cu e proceso ta publico y verificabel, y con ta preveni conflicto di interes y proteha e transparencia pa pueblo di Aruba.

Fraccion di MEP ta spera di haya contesta riba e preguntanan aki dentro di dos siman, pa asina garantisa cu nos democracia y e separacion di poder ta wordo respeta.

Declaracionnan di prome minister Mike Eman
 E comunicado aki di partido MEP ta basa riba varios articulo cu a sali den corant Bon Dia Aruba, unda a pone atencion riba declaracionnan di prome minister Mike Eman.

Na comienso di luna, mientras cu e tabata duna comentario na prensa anunciando cu tabata buscando un candidato pa minister pa reemplasa parlamentario De Meza, Eman a indica cu toch De Meza tabata involucra den maneho di e ministerio, cual tabata den man di minister Arthur Dowers.

Durante e entrevista en cuestion, Eman a bisa cu pa loke ta trata Energia y Infrastructura, “minister Dowers ta atendiendo cu nan, pero logicamente cu Sr. De Meza lo nos tabatin e input importante di su conocemento.” El a indica ademas cu a pesar cu De Meza no tabata minister, si e tabata duna “idea” na minister Dowers tocante e carteranan. El a bisa cu “a consulta continuamente [cu De Meza] si riba kico mester haci riba e tereno cu el a haci hopi trabao adicional, y minister Dowers ta den contacto cune riba e ideanan cu e tin pa locual ta trata e diferente portefeuille y awo cu e ta bisto cu nos tuma e siguiente paso pa yena e buraco den e portfolio aki, nos ta bay ta canando e caminda ey.”