Partido Patriotico di Aruba (PPA) a presenta un nota di minoria integral unda ta critica fuertemente e Ley di Consenso di Reino pa Finanzas Publico Duradero pa Aruba (HOFA) cu ta riba mesa na e momentonan. Segun e partido, e proyecto di ley aki ta forma un menasa pa autonomia di Aruba, ta mina democracia, y ta impone obligacionnan financiero irealistico cu ta pone desaroyo economico y social di e isla na peliger.

Fraccion di PPA, representa pa Parlamentario Otmar Oduber, ta enfatisa cu su posicion ta motiva pa un conviccion fundamental: Aruba su futuro mester keda den man di e pueblo Arubano y su representantenan eligi, no di acuerdonan impone for di Den Haag.

Desde eleccion di december 2024, PPA a ocupa un asiento den Parlamento di Aruba. Y Oduber ta enfatisa cu a pesar di e tamaño limita di e fraccion, e ta sinti su mes obliga, como lider di fraccion, pa expresa un oposicion cla na e proceso di HOFA.

E nota di minoria a ser traha despues cu Presidente di Parlamento no a logra contesta na tempo riba un peticion di PPA pa convoca un reunion publico riba e Ley di Reino di Consenso. No a tene un reunion te siete luna despues, y el a ser posponi casi mesora. Esaki a stroba e debate parlamentario y a stroba e parlamentario di PPA di presenta su posicionnan na tempo.

Mas aleu Oduber a constata cu fraccion di PPA a ser exclui for di e Comision di Asuntonan di Reino y Relacionnan Exterior, kiermen su voz no ta ser scucha durante e Consulta Interparlamentario di Reino (IPKO), unda e HOFA ta riba agenda. Oduber ta yama esaki “un violacion inaceptabel di democracia parlamentario.”

Pa loke ta e obhecionnan principal, e oposicion di PPA na HOFA ta profundamente hancra y tin varios dimension.

Autodeterminacion

Den esaki Oduber ta splica cu Aruba a obtene su Status Aparte na 1986, sigurando su autonomia dentro di Reino. Segun e fraccion di PPA, e Ley di Reino nobo, HOFA, ta menasa di mina seriamente e logro aki.

Deficit democratico

Segun PPA, e proceso di Leynan di Reino di Consenso ya caba ta sufri di un deficit democratico. Parlamentario Oduber ta remarca cu door di impone reglanan for di Hulanda riba e politica presupuestario di Aruba, e rol di Parlamento ta ser erosiona.

Desigualdad

Oduber ta splica cu e Ley di Reino nobo ta crea desigualdad dentro di Reino, pasobra Aruba ta mara na normanan estricto cu no ta conta pa otro paisnan.

Fraccion di PPA ta argumenta cu consenso ta legitimo solamente ora e ser alcansa boluntariamente y a base di igualdad. Den e caso aki, PPA ta argumenta, tin un “consenso forsa.”

Un di dos punto clave den e nota ta e advertencia tocante e consecuencianan practico di e HOFA. PPA ta teme cu e ley lo limita severamente e capacidad di Aruba pa ehecuta politicanan economico y social independientemente.

“Reglanan presupuestario rigido no ta viable pa un nacion insular chikito dependiente di turismo,” e partido ta declara. Oduber ta subraya cu Aruba mester mantene e flexibilidad pa ahusta politica rapidamente den tempo di crisis—manera un pandemia of calamidad natural.

Continuando PPA ta adverti cu e ley por conduci na cortamento severo den presupuesto cu lo tin efecto riba servicionan social manera enseñansa, cuido di salud y rednan di seguridad social. Es mas, PPA ta señala cu e HOFA lo por trece Aruba den conflicto cu obligacionnan internacional, manera tratadonan social y di medio ambiente.

Fraccion di PPA ta enfatisa cu mientras cu e Statuut ta provee ​​pa Leynan di Reino di Consenso, e principio aki ta ser viola ora un partido ta dicta e terminonan. Segun PPA, e HOFA lo a conduci na un relacion di poder asimetrico den cual Hulanda ta pone e tono y Aruba so por bay di acuerdo of rechasa. “Esaki no ta consenso di berdad, pero un forma di coersion legal,” parlamentario Oduber ta bisa.

Tambe e fraccion ta señala cu Parlamento di Aruba tabata no tabatin suficiente input den e proceso. Segun e fraccion, ignora peticionnan pa un reunion publico ta un violacion directo di procedura parlamentario y ta mina confiansa den e institutonan.

E nota di minoria tambe ta pone e discusion den perspectiva historico. Oduber ta enfatisa cu semper cu Aruba a haya e oportunidad pa tuma responsabilidad independiente, el a desaroya den un sistema democratico mas fuerte cu un consciencia nacional creciente.

E introduccion di e HOFA lo constitui un stap atras, segun PPA, y ta recorda periodonan cu Aruba no tabatin palabra den su propio futuro. “E pueblo a bringa pa autonomia, y nos no por simplemente entrega esey,” Oduber a remarca.

A pesar di su critica skerpi fraccion di PPA no solamente ta trece obhecion pero tambe ta propone alternativanan concreto.

Ley di Stabilidad Financiero Nacional

Aruba lo establece su propio ley cu normanan presupuestario cu ta tene cuenta cu e realidadnan economico di un estado insular chikito.

Fortalece instancianan local

Instancianan manera Algemene Rekenkamer Aruba, Raad van Advies y Banco Central lo haya un rol mas extenso den supervision financiero.

Cooperacion Internacional

Oduber ta splica cu por busca conseho y guia independiente cerca organisacionnan manera IMF, Banco Mundial y ECLAC. Esaki ta preveni dependencia riba supervision unilateral Hulandes.

Dialogo structura

Esaki ta nifica cu lo tin un mesa rondo anual di consulta dentro di Reino, den cual tur partido – incluyendo oposicion – ta totalmente representa.

Segun fraccion di PPA, e alternativanan aki ta garantisa tanto stabilidad financiero como e preservacion di autonomia, y ta ofrece miho garantia pa politica social y desaroyo sostenibel.

Fraccion di PPA ta enfatisa cu su oposicion na HOFA no kiermen cu e ta rechasa cooperacion cu Hulanda. Al contrario: e fraccion ta reconoce e balor di un relacion fuerte y e necesidad pa cooperacion den asuntonan financiero y administrativo.

E diferencia, segun e fraccion, ta sinta den e forma di e cooperacion ey. Caminda Hulanda ta opta pa supervision y sancion, PPA ta opta pa partnership y igualdad. “Un relacion saludabel por existi solamente a base di respet y boluntario,” Oduber a bisa.

E nota di minoria ta termina cu un mensahe cla di parti di fraccion PPA: HOFA no mester ser implementa den su forma actual. Aruba mester tuma responsabilidad pa su propio politica financiero, sin sacrifica su autonomia.

PPA ta boga pa un paro na e proceso actual di HOFA, inicio di un proceso nobo den cual Aruba lo entrega su propio proposicion pa legislacion nacional’, y consulta amplio dentro di Reino, involucrando tur actor politico y sosial.

“Solucionnan sostenibel pa finanzas publico ta solamente posibel ora nan ta surgi di cooperacion boluntario y respet mutuo”, e fraccion a enfatisa. “No ta trata solamente di cifra y presupuesto. E ta tocante ken nos ta como pueblo, y ken ta dicidi nos futuro,” parlamentario Oduber a finalisa.