Despues cu ayera riba medionan di comunicacion a circula e noticia cu Gino Goeloe a keda reemplasa como lider di fraccion den Parlamento pa colega Ruthlyn Lindor, ayera Lindor a confirma esaki mediante un comunicado di prensa.

E noticia di e aparente reemplaso di Goeloe tabatin algun dia caba ta circula. Entre otro, fraccion MEP a hala atencion na e noticia, door di señala den un comunicado di prensa e reemplaso di Sr. Goeloe. Segun MEP, “tin un grupo” den partido Futuro “cu no ta gusta cu Goeloe ta drumi hopi durante reunion y ta sinta hari cu oponentenan.” Den nan comunicado, MEP tambe a indica cu “segun fuente cerca di partido Futuro, nan no a keda mucho contento cu e cambio,” incluyendo e nombramento di Lindor, ya cu nan lo a “prefera pa Muzannin (Wever) ta lider di fraccion, pero no por pasobra Muzannin ta vice-presidente di Parlamento caba.”

Bon Dia Aruba a purba tuma contacto cu parlamentario Goeloe, como tambe minister Gerlien Croes, lider y fundador di partido Futuro, si por splica e motibo pakico a remplasa parlamentario Goeloe como lider di fraccion di Futuro, pero no a ricibi un contesta.

Eleccion di 2024 ta prome biaha cu parlamentario Goeloe ta subi un lista politico despues di a traha pa hopi aña como director di Fundacion Wit Gele Kruis. Parlamentario Goeloe tabata number tres riba lista di partido Futuro y a logra ricibi 297 voto.

Manera a keda confirma ayera mediante un comunicado di prensa, Ruthlyn Lindor a ser nombra como e lider nobo di fraccion. Esaki ta di dos biaha cu Lindor ta participa den eleccion. Na aña 2021 Lindor tabata candidato number cinco riba lista di partido RAIZ y a logra 170 voto . Den eleccion di 2024 Lindor a ricibi 176 voto.

Sinembargo, ayera Lindor mes a confirma e noticia den un comunicado di prensa, indicando cu e motibo ta “responsabilidad comparti” den e partido.

“Contrario na locual por ta pasa den otro partido, lider di partido Futuro tin ful confiansa den  tur miembro di e Fraccion Futuro den Parlamento y no ta sinti cu e mester micromanage  posicionnan,” aludiendo na e posible motibo pa e cambio. El a continua bisando cu “Fraccion Futuro ta kere den un estilo nobo di politica, uno basa riba rotacion  di posicionnan y responsabilidad comparti. For di e comienso, nos fraccion a scoge pa  haci cosnan diferente: liderazgo no ta exigi of mantene un puesto, sino pa pasa e baston,  comparti responsabilidad y mustra cu por hiba politica di un manera diferente.”

E comunicado di prensa a confirma cu pa e aña parlamentario 2025–2026, e carga di lider di fraccion Futuro lo ser ocupa pa  Ruthlyn Lindor, Master den Criminologia y eerstegraads docent.

“Cu e siguiente prioridadnan nos ta sigui cu nos trabao: educacion di calidad pa un y tur,  oportunidadnan den deporte, musica, arte y STEM, miho cuido medico, promove seguridad di cuminda, acceso na un vivienda digno y pagabel pa nos ciudadanonan, mas proteccion,  mas seguridad: pa nos hobennan, nos famianan, nos comunidad y un Aruba mas sigur pa  un y tur. Na mes momento, Fraccion Futuro lo sigui haci su trabou den Parlamento, pa controla  gobierno, pa responsabilisa gobierno y pa sigura cu cada decision berdaderamente ta  contribui na un miho calidad di bida pa nos pueblo. Fraccion Futuro lo sigui sirbi comunidad di Aruba pa un mihor futuro pa nos tur,” e comunicado a conclui.