Fraccion MEP: Gobierno di Aruba ta falta respet na Parlamento y tin falta di transparencia pa comunidad di Aruba

Fraccion di MEP ta expresa su preocupacion pa e manera cu Gobierno no ta cumpli cu su obligacion pa contesta peticionnan formal for di Parlamento. Fraccion di MEP a entrega mas cu 30 peticion di pregunta oficial, cu un total di 350 pregunta, pero te dia di awe no a ricibi ni un contesta formal for di e Ministernan concerni.

Esaki ta un falta di respet pa e institucion di Parlamento y pa nos democracia, caminda transparencia y acceso na informacion ta fundamental pa un Parlamentario por cumpli cu su trabao debidamente, segun e fraccion a expresa den un comunicado di prensa. “Como parlamentario nos tin e deber y obligacion pa informa pueblo riba decisionan di gobierno cu ta toca pais Aruba y su hendenan.”

Den un video comparti cu medionan di comunicacion, lider di fraccion MEP, parlamentario Evelyn Wever-Croes, a bisa cu “un di e tareanan como parlamentario ta pa controla e gobierno aki. Y como tal, pa por controla gobierno, nos ta haci pregunta na gobierno, pa nos haya mas informacion. Esaki ta un derecho constitucional di cada parlamentario.” El a bisa cu den e cuadro aki, e parlamentarionan di fraccion MEP den ultimo simannan a manda mas di 350 pregunta pa gobierno, sin haya contesta.

“Pakico esaki ta importante? Tempo cu nos tabata den gobierno, den Gabinete Wever-Croes II, nos a bin cu e palabracion cu tur pregunta di parlamento mester wordo contesta dentro di tres siman. Si bo no logra contesta dentro di tres siman, bo ta informa e parlamentario cu bo mester mas tempo, anto bo ta traha riba e contestanan,” Wever-Croes a bisa.

Sinembargo, el a nota cu “e gobierno akinanan den campaña hasta a papia di contesta pregunta den dos siman. Pero aworakinan cu e realidad, nos ta mira cu tin siete siman caba den gobierno, anto niun contesta.”

“Tur tema ta hopi importante, pero algun tema ta sumamente urgente, anto si bo no haya informacion, tata dificil pa bo haci bo trabao como parlamentario.”

“Mi ta weita cu e prome preguntanan ya caba ta prome cu gobierno a huramenta. Ta preguntanan cu Sr. [Hendrik] Tevreden a haci na minister Geoffrey Wever tempo cu e tabata minister di Economia, y el a keda ta minister di Economia. Ta trata di e aumento di tarifa di gas domestico, sin cu a duna compensacion na comunidad. Ningun contesta,” Wever-Croes a nota.

“Tambe colega Rocco [Tjon] a haci pregunta ariba por ehempel e subsidionan cu no a wordo duna na fundacionnan cu mester di dje urgentemente. Ningun contesta.”

Wever-Croes a menciona cu “tambe colega Edgard [Vrolijk] a haci pregunta riba enseñansa, principalmente mirando cu riba un diabierna, e gobierno nobo a bin den parlamento, corta 10 porciento den enseñansa, y su dialuna, nan a anuncia cu nan kier inverti den enseñansa, den e caso aki, Reina Beatrixschool. Kiermen colega a puntra con esey ta bay cu otro.”

El a continua bisando cu “colega Dangui [Oduber] a enfoca riba Schiphol, e negociacionnan, y el a pidi copia di e MOU cu a wordo firma. Te awe nos no a haya esaki.”

“Colega Shailiny [Tromp] y ami a concentra mas riba trade war, e decisionnan di presidente Mericano, pa cu hisa e tarifanan na Merca, y e impacto riba Aruba. Nos no a haya contesta tampoco,” el a lamenta.

“Finalmente, nos a puntra tambe ken ta encarga cu kico na e gobierno aki. Pasobra nos ta ripara cu nan no ta actuando segun e ley di instelling ministeries. Nan mes a cambia e cos, e asunto, nunca nan a informa Parlamento. Pero mas aun bo ta weita cu un ta haci e trabao di otro, y esaki ta haci pa nos como parlamentarionan dificil pa nos por controla gobierno,” Wever-Croes a enfatisa.

“Mi ta haya cu e falta di contestacion aki di mas di 350 pregunta ta un falta di respet. Nan no por bisa mas cu nan ta nobo, pasobra cu ya caba nan tin siete siman gobernando. Esakinan ta preguntanan sensiyo cu bo mester por contesta lihe. Falta di respet. Pero mas principal, falta di transparencia pa cu e comunidad di Aruba,” el a finalisa.

Segun e comunicado di prensa, fraccion di MEP ta exigi pa Gobierno cumpli cu su deber constitucional y legal pa contesta preguntanan di parlamento den un periodo rasonabel. Ta mediante cuestionamento Parlamentarionan por eherce nan rol di control, y pa por haci esaki manera ta debe, acceso na informacion ta esencial.

E preguntanan presenta ta trata temanan cu ta relevante y urgente pa bienestar di nos pueblo, entre otro:

– Aumento di gas domestico;

– Aumento di suma pa seis fundacion;

– AAA y Schiphol;

– Efecto di Tradewar;

– Asunto di rijkswet nobo;

– Scarcedad di vivienda FCCA;

– Adaptacion lista positivo di remedi AZV;

– Eliminacion di arbeidsmarkttoets y;

– Ciere di frontera cu Venezuela.

Finalisando, Fraccion di MEP ta urgi Gobierno actual pa tuma responsabilidad y demostra nan compromiso pa traha den transparencia y colaboracion cu Parlamento, manera ta stipula den nos Constitucion y alabes den plan di Gobernacion 2025-2028. Pueblo ta merece claridad, y Parlamentarionan ta merece e respet institucional pa por eherce nan funcion como representante di pueblo.