Minister Geoffrey Wever (Futuro) tabata na Hulanda e siman aki pa participa na un congreso relaciona cu 70 aña di Statuut di Reino. Presente tabata tambe representantenan di gobierno y parlamento di Aruba, Corsou y Sint Maarten.
Su presentacion tabata tocante e relacion cu CAft, cu segun Wever ta un hopi bon relacion.
Na final di su presentacion el a informa cu gobierno di Aruba ta trahando riba un rijkswet cu mester duna Aruba mas flexibilidad. Esey tabata e momento cu e sala a practicamente rementa y di tur skina a cuminsa cuestiona minister Geoffrey Wever si e ta realisa kico e ta haciendo. Con bo kier mas flexibilidad y bo ta opta pa un ley di reino, cu ta e instrumento di ley mas inflexible den Reino!
Parlamentario Edgard Vrolijk (MEP) tambe a haci pregunta, na momento cu e minister a bisa cu por sali di e rijkswet despues di 7 aña, siendo aki na Aruba a bisa cu por ta 3 aña. Eynan parlamentario Vrolijk a pidi e pa splica articulo 42 di e ley di reino cu ta stipula cu mester cumpli cu 20 condicion prome cu por sali.
Minister y Parlamentarionan di Corsou tambe tabata hopi skerpi den nan preguntanan na minister Geoffrey Wever, varios pregunta e no por a contesta, segun un comunicado di MEP. Minister Geoffrey Wever tabata hopi nervioso y a haci un hopi mal papel na Hulanda. El a bandona e congreso mesora tambe y no a bolbe mas. Ta di spera cu e experiencia aki por cuminsa habri wowo di esnan cu ainda ta bringa pa e ley di reino, pa realisa cu nos mester keda mas leu posibel di e ley aki.
Nota di redaccion: E articulo aki ta opinion di e autor y no ta representa opinion di Bon Dia Aruba.
