Fraccion di MEP a presenta preguntanan na Minister di Finanzas tocante e manera con a maneha e evaluacion fiscal di e candidato pa bira minister, parlamentario Sr. Mike de Meza (AVP). E motibo pa e preguntanan aki ta e señalnan preocupante di presion politico y di medionan di comunicacion cu supuestamente a eherce riba Departamento di Impuesto y otro instancianan.

Segun e informacion cu e fraccion tin, e candidato no ta cumpli aparentemente cu tur rekisito pa por bira minister. Entre otro, Departamento di Impuesto (DIMP) lo a duna un opinion negativo tocante su comportamento fiscal. Loke a resalta ta cu e candidato – hunto cu dos miembro di prensa – a eherce un presion grandi riba DIMP y Gobierno. Segun algun fuente, e tactica usa ta parce di ta intimidante y ta yega cerca di practica mafioso, segun e fraccion a bisa den un comunicado di prensa

“Ni Minister President ni Minister di Finanzas no a tuma accion pa stop e situacion. DIMP a tuma e paso pa contrata un abogado externo, pero e abogado ey a retira su mes despues di solamente dos dia. Ta kere cu e decision aki tin di haci cu presion indebido den e caso aki,” e fraccion a bisa den e comunicado.

“Si esaki ta berdad, nos ta drenta un tereno peligroso, caminda integridad di nos institucion ta wordo comprometi. Departamento di Impuesto mester por traha sin ningun tipo di presion politico of personal. No ta aceptabel si funcionarionan di gobierno ta wordo intimida of experto externo ta sinti obliga pa retira. Nos mester para firme pa proteha nos estado di derecho.”

Den e preguntanan, e Fraccion kier sa si e minister a tuma contacto cu DIMP tocante e caso, si el a tuma contacto cu e abogado, y ki medida e ta tuma pa salvaguardia e integridad di Departamento di Impuesto. E minister tin 2 siman pa duna respuesta por escrito riba e preguntanan aki.

Mientras tanto, e caso cu parlamentario De Meza a entama contra DIMP ta programa den corte pa diaranson proximo. Tin un expectativa enorme pa e caso aki den ambito politico di Aruba, mirando cu decision di hues lo tin impacto directo riba e composicion di Gabinete AVP-Futuro.

Mientras tanto Gabinete AVP-FUTURO keto bay ta funciona cu seis minister y e carteranan cu inicialmente tabata di bay pa de Meza a ser reparti entre e ministernan cu si a pasa screening y a huramenta.

Caso den corte

De Meza ta exigiendo pa DIMP dun’e un evaluacion positivo di comportamento fiscal, alegando cu DIMP ta strobando e di bira minister. Entre tanto, e posicion di DIMP ta cu no por otorga esaki. Loke ta conoci ta cu De Meza no a pasa e screening pa bira minister den Gabinete AVP-Futuro relaciona cu su comportamento fiscal, e parti di e screening cu ta cay bao DIMP. De Meza a confirma cu e ta pega cu screening pa bira minister pa motibo di DIMP.

Ta supone cu e motibo ta problemanan pendiente cu impuesto vincula na un compania di cual antes e tabata propietario, cu, maske inactivo pa añas, ta parce di a laga asunto sin resolve, segun departamento di Impuesto (DIMP).

Team legal di De Meza ta argumenta cu e compania tabata inactivo desde 2009, hinca den un fundacion sin operacion activo ni benta. Nan ta insisti cu e preocupacion di DIMP ta bin di tecnicidad for di 2006 – casi dos decada atras – y ta insisti cu De Meza a cumpli cu tur obligacion necesario. Nan ta argumenta cu DIMP ta violando proceduranan legal door di mira mas leu cu e bentana di cinco luna pa revision fiscal usa tipicamente den screening.

Agregando na e controversia, anteriormente De Meza a pasa screening y a keda aproba pa un cargo publico durante su terminonan anterior como minister y parlamentario. Toch awo, e mesun problemanan – supuestamente resolvi – ta siendo revisa.

Su sostenedornan ta cita esaki como evidencia di trato inhusto of prehuicio politico, mientras criticonan ta argumenta cu cualkier asunto sin resolve den e tratonan financiero di un figura publico merece scrutinio completo, sin importa cuanto tempo a pasa.

Abogado di De Meza a bisa medionan local anteriormente cu “a pesar di splica directora di DIMP na placa chikito cu cliente Mike de Meza tin derecho di haya un verklaring omtrent het fiscale gedrag, mirando cu no tin ningun debe di impuesto, no a logra convenc’e di esaki.” Pues a dicidi pa hiba e departamento corte. “Ta laga e decision den man di hues,” segun abogado Croes.

E desaroyo aki ta bira interesante, pa motibo cu si hues interveni den e proceso di screening, e ora e lo habri caminda pa intervencionnan similar den otro casonan di screening, cu por perhudica cierto persona. Un precedente legal asina por trece diferente consecuencia, pues mester keda pendiente na e decision di hues den e caso aki.

Durante proceso di formacion, formadornan Mike Eman (AVP) y Gerlien Croes (Futuro) a dirigi e proceso di screening di tur candidato. Manera a reporta e tempo aya, e proceso ta largo y hopi profundo, y ta tuma su tempo. Entre tanto, tur candidato pa minister di ambos partido a pasa e screening y a asumi nan posicion como minister – cu excepcion di Mike de Meza. Mientras cu e situacion di De Meza no ta resolvi, Gabinete AVP-Futuro a reparti e carteranan cu tabata destina pa De Meza, Infrastructura, Energia y Telecomunicacion, entre otro ministernan, por ehempel, lagando minister Arthur Dowers a cargo di e cartera di Infrastructura, cu speransa cu lo bin apertura den e caso di De Meza.

Sinembargo, e postura aki di e gabinete nobo ta trece duda riba nan integridad na momento di insisti riba un persona cu tin problema pa pasa screening. Hopi ta cuestiona si partido AVP no tin otro candidato cu si por pasa screening y asumi e carteranan importante aki sin ningun cuestionamento, sobre todo mirando cu ta carteranan cu ya den historia di Aruba a bira victima di mal maneho y corupcion.

Luna pasa, prome minister Mike Eman a remarca cu ta importante pa realisa cu ora ta papia di reputacion di un persona, e ta algo hopi grandi y e persona tin no solamente e derecho, pero e obligacion pa lucha pa mustra kico realmente a tuma luga. Den e caso aki, el a menciona, De Meza y su fiscalistanan a produci hopi documento pa mustra cu en realidad locual tabata e inkietud pa su posicion, den e forma con nan ta articul’e, nan ta mira cu e no ta algo cu mester impedi De Meza pa bira minister.

Pero manera Bon Dia Aruba a publica anteriormente, e proceso alarga a conduci na speculacion cu ta mina confiansa no solo den DIMP, sino den gobierno y integridad institucional.

Hasta si e logra legalmente pasa e proceso, e preocupacion mas amplio tocante responsabilidad, caracter y su aptitud ta bay keda. Aruba no por afford pa baha standard di esnan cu ta goberna den nos nomber. Integridad mester ta mas cu un palabra, e mester ta e expectativa minimo.