Manera ta conoci, diabierna ultimo Parlamento di Aruba a inicia cu e reunion publico durante cual prome minister Mike Eman (AVP), minister di Relacionnan den Reino, Gerlien Croes y minister di Finanzas Geoffrey Wever (Futuro) a duna un splicacion y actualisacion riba e topico di Rijkswet. Despues cu e reunion aki a keda posponi, riba peticion di fraccion AVP, fraccionnan MEP y PPA, cu a pidi e reunion siete luna pasa, a entrega un carta di keho oficial na Gobernador di Aruba, Su Excelencia Alfonso Boekhoudt.

Den e carta, firma pa lider di fraccion MEP, parlamentario Evelyn Wever-Croes y lider di fraccion PPA, parlamentario Otmar Oduber, nan a expresa nan preocupacionnan serio riba e curso di sucesonan rond di e concepto di Ley di Reino riba Supervision Financiero (Rijkswet).

Den e carta, e fraccionnan ta splica cu durante e reunion publico di diabierna mainta parlamento a haya sa cu gabinete AVP-FUTURO ya a aproba e concepto di Rijkswet y cu e documento aki a ser trata diabierna mainta den Conseho di Minister na Hulanda, cual a sucede sin cu ningun informacion previo a ser suministra na Parlamento di Aruba.

“E conducta aki no ta djis un asunto di mal comunicacion, pero ta mina seriamente e posicion di Parlamento como e organo di mas halto di forsanan arma y e titular di autoridad presupuestario. Parlamento asina a ser poni un banda den un proceso cu directamente ta determina Aruba su futuro financiero y politico,” Wever-Croes y Oduber a enfatisa den e carta.

Nan ta indica tambe cu presidente di Parlamento a suspende arbitrariamente e reunion publico, contra e deseonan di e gruponan parlamentario mes cu a pidi e reunion aki, cual nan ta subraya ta kita Parlamento di e derecho di debati y responsabilisa gobierno.

Mediante e carta fraccion MEP y PPA a Gobernador di Aruba pa tuma nota di e curso di sucesonan serio aki, cu ta perhudicando e relacionnan constitucional na Aruba; pa usa su influencia pa garantisa cu e gobierno ta atene na e principionan di transparencia, responsabilidad parlamentario, y suministro di informacion na tempo; y pa sigura cu Parlamento por eherce su rol constitucional den e proceso aki.

“Nos ta conta cu Bo Excelencia su vigilancia den e asunto sumamente delicado aki, cu ta fundamental pa Aruba su futuro,” e carta a finalisa.