Mientras cu anteriormente lider di PPA, Sr. Otmar Oduber, den un entrevista cu Bon Dia Aruba a duna su opinion tocante e situacion di candidato pa minister den Gabinete AVP-Futuro, Sr. Mike De Meza, ayera fraccionnan di AVP y MEP tambe a comparti nan posicion riba e situacion aki.

Di su banda, fraccion di AVP den un comunicado di prensa a expresa solidaridad cu De Meza.

“Den luz di e desaroyonan mas reciente rond di e retonan fiscal/legal cu nos colega di fraccion y candidato pa minister, Mike de Meza ta enfrenta, nos como Fraccion Parlamentario di AVP ta expresa nos solidaridad cu su persona, pero sigur tambe nos preocupacion profundo tocante e dificultad cu e situacion aki ta crea pa nos sistema democratico y e principio fundamental di e Trias Politica na Aruba,” e fraccion a indica.

Fraccion AVP a condena loke nan a yama “e falta di transparencia den informacion, hasta na e persona concerni” y tambe a condena “tur tipo di tardamento inusual of calcula den cualkier proceso y sigur den formacion di gobierno of nombramento di un minister.”

Manera ta conoci, intencion ta pa Sr. De Meza asumi e cartera di Infrastructura, Energia y Telecomunicacion, y fraccion AVP ta menciona cu e sectornan aki “ya pa añanan ta manca pa un serie di ley anticua, procedura lento, burocracia y te hasta investigacion administrativo”, y awo pa motibo di e problemanan cu Sr. De Meza, “ta bou un direccion ministerial temporal y limita, mientras cu tin asuntonan nacional urgente cu ta pendiente di un titular cu por dun’e su total y debido atencion.”

Teniendo cuenta cu e situacion, e fraccion den Parlamento a bisa cu nan ta sinti cu nan “tin un rol crucial” pa “asumi responsabilidad” y “urgi gobierno pa tuma accion den e asunto, dialoga cu e partidonan al caso y bin cu un resolucion pronto y definitivo.”

Alabes, Fraccion AVP a haci un yamado “cla y formal” na Ministerio Publico pa “conduci su funcion di un manera rapido, transparente y husto pasobra Aruba merece claridad y progreso y no confusion of stagnacion.”

Fraccion MEP: Preocupa tocante presion politico riba Ministerio Publico

Di nan banda, fraccion di partido MEP mediante un comunicado di prensa a informa cu ayera nan a manda un carta formal na presidente den Parlamento, den cual e fraccion a expresa preocupacion tocante e comunicado di prensa di fraccion AVP menciona ariba.

“Den e comunicado aki, AVP ta haci un “yamada formal” na Ministerio Publico pa e investigacion penal contra nan colega Mike de Meza wordo lanta “di un manera rapido, transparente y honesto.” Fraccion di MEP ta considera e tipo di expresion aki como un metemento indebido den e trabou independiente di un organo vital den nos estado di derecho,” segun e comunicado di fraccion MEP.

“Principio di separacion di poder (Trias Politica) no ta opcional, sino esencial pa un democracia funciona,” segun lider di fraccion Evelyn Wever-Croes. “Nos como Parlamento mester percura cu no ta pone presion politico riba Ministerio Publico, pa proteha e confiansa di pueblo den nos sistema di husticia.”

Fraccion di MEP ta considera e expresion di AVP como “no solamente inapropia, sino tambe dañino pa e imagen y integridad di e Parlamento di Aruba.” Den e carta, Fraccion di MEP ta pidi na Presidente pa trece e asunto aki na atencion di e lider di fraccion di AVP, pa laga cla cu metemento politico den proceso hudicial no por ta permiti.

“Ta nos deber como Parlamento pa ta para ariba di politica partidista ora cu ta trata di e fundamento di nos estado di derecho,” segun Wever-Croes. “Esey mes ta loke pueblo Arubano ta spera di nos y nan tin rason.”

Mientras tanto, Bon Dia Aruba a tuma contacto cu lider di fraccion FUTURO den Parlamento, Sr. Gino Goeloe pa pidi un reaccion riba e caso di meneer De Meza y e posicion di e otro tres fraccion den Parlamento. Sinembargo, te na ciere di edicion no a ricibi un contesta.