Fransisco “Tico” Kock a nace dia 4 di maart 1959 den e bario di Paradera. Tico tabata un gran amante di e musica di steelband. Den añanan 1967/1968 Tico tabata bay wak un grupo di steelband train, cerca di su cas. El a invita su amigonan di bario pa nan tur bay wak e steelband di bario aki toca. Asina nan interes pa siña toca steelpan a bira grandi cu casi tur atardi nan tabata bula den e barak, unda e steelpannan aki tabata warda, pa nan bay practica scondi, sin cu e doño di e steelband tabata na altura.
Despues cu e grupo di bario aki a haya steelpannan nobo nan a regala e muchanan di bario (esta Tico y su amigonan) esunnan bieu y asina nan a cuminsa practica y toca hunto tur atardi despues di scol. Na aña 1970 Tico hunto cu su amigonan a lanta nan prome grupo di steelband cu ta hiba e nomber di ”Jump and Smile” y no a dura mucho cu nan a cuminsa cu nan prome shownan den hotel. Y desde e tempo ey te cu awe, Tico tabata toca den e hotelnan treciendo su musica di steelband pa tur e bishitantenan cu tabata bin Aruba. Na aña 1975 el a lanta e steelband “Sunny Island” y algun añas despues el a bira “Touch Of Steel” cu te awe ta activo den nos hotelnan.
Tico semper a yuda den e formacion di varios musico di steelpan, e la siña hopi hoben cu tabata tin e talento y e interes con pa domina e instrumento aki. Tico mes tabata toca varios instrumento y ta un musico hopi versatil den casi tur genero. Como cu Aruba ta un isla turistico mester a toca diferente genero ariba steelpan pa por complace e turista bishitante. Durante Tico su carera musical e la comparti, influencia, yuda y te hasta forma parti di diferente steelband aki na Aruba e.o Divi Divi Jumping Jewels di Savaneta, Jumping Jewels, Diamond Steelband, Aruba Invaders, Twinkling Stars, Black Diamonds, Eleven Friends, Red Stars, The J.F.K Rebels, Aruba Serenades, United Friends, Silver Stars, Red Star y Aruba Lovers.
Aruba a perde un gran pionero den e musica di steelpan den persona di Tico Kock, su legado lo keda atras na tur cu e la yuda y siña pa mantene e musica di steelpan aki bibo, su yiunan y tur su alumnonan.
Nos kier invita tur famia, musico, amigo y conocirnan pa e acto di entiero cual lo tuma lugar diamars, 28 di november 2023 saliendo for di Misa Santa Filomena na Paradera pa 4’or di atardi y despues pa Santana Catolico Pastoor Kranwinkel na Paradera. E restonan mortal lo ta reposa for di 12’or di merdia den Misa Santa Filomena na Paradera.
Cu Tico descansa den paz di nos Señor.
https://www.facebook.com/sharer.php?u=https%3A%2F%2F24ora.com%2Fa-fayece-francisco-albertico-kock%2F
https://24ora.com/a-fayece-francisco-albertico-kock/
Top of Form
Bottom of Form
