E siman aki Fundashon Ultimo Deseo Aruba a haci yamado na comunidad di Aruba pa yuda e fundacion adkiri un ambulance di deseo for di Hulanda. Den nan publicacion riba red social, e fundacion a enfatisa cu esaki ta un oportunidad pa tin su mesun ambulance pa por facilita beneficiadonan cu transporte.

E yamado aki a bin despues cu FUDA a bin na remarke pa por haya un “wensambulance” for di Hulanda, ya cu e aña aki compania di ambulance Hulandes lo cuminsa usa ambulancenan nobo y ta deshaciendo di esnan bieu.

Renate Raven, presidente di FUDA ta splica cu e ambulancenan aki ta di bon calidad, y ta adecua pa nan servicio. Sin embargo, e fundacion no ta haya esaki gratis, pues ta keda na e organisacion pa recauda fondo.

FUDA: Cumpliendo cu ultimo deseonan

Fundashon Ultimo Deseo Aruba a habri nan porta apenas 2,5 aña pasa, y te dia di awe a cumpli cu 13 deseo di personanan cu enfermedad terminal of cu no ta mobil mas y mester di transporte via ambulance. Manera Sra. Raven ta conta, e fundacion su mision ta pa brinda personanan malo of inmobil un (ultimo) oportunidad pa cumpli cu nan deseo, sea pasa dia entre famia of haci algo cu e persona semper kier a haci of lo kier haci atrobe.

Tabata un caso particular cu a duna Renate e idea pa lanta e fundacion na Aruba. Mientras e tabata traha den hospice na Hulanda, tabatin un homber cu tiki tempo pa biba y cu tabatin e deseo pa ser inclui den corant. Personal a yud’e cumpli cu e deseo aki y Renate a sinti hopi inspira pa trece esaki na e isla.

Raven ta conta Bon Dia Aruba cu e peticionnan cu e fundacion ta haya ta varia—tin hende kier bay lama pa un ultimo biaha, kier sali di hospital y pasa dia na cas, of hasta pasa un dia na casino y disfruta entre amigo y famia. Raven ta conta cu e fundacion sigur ta ofrece nan ayudo pa cualkier cos cu e beneficiado kier haci, aunke si ta reconoce nan limitacion. Por ehempel, Raven ta conta cu aunke riba e isla por haci hopi cos cu beneficiadonan, e fundacion no por brinda cosnan grandi y mucho costoso tampoco, manera regla un biahe.

Na otro banda si e ta enfatisa cu nan servicio ta disponible na tur hende, no importa di unda bo ta bin, ken bo ta of ki edad bo tin. E ta enfatisa cu e fundacion ta percura cu e beneficiadonan ta haci algo cu nan mes kier haci, en bes di loke por ehempel e famia of amigonan kier haci cu of pa e beneficiado.

E ta sinti cu e proposito di FUDA ta pa ofrece e personanan aki e ultimo momento special of yudansa pa por tuma un “break” di kico nan ta pasando den dje—di un manera lubida cu nan ta malo of nan ta discapacita. Tambe pa e famia e ta hay’e bunita e oportunidad cu nan por di nan manera bisa ayo.

Testimonio di beneficiado

Famia di dos beneficiado a comparti cu Bon Dia Aruba nan experencia cu e fundacion. E familiar, ken ta prima di un di e beneficiadonan, a conta cu e y su amiga kier a organisa un atardi riba beach cu su prima malo, como tambe su tanta cu tambe ta den ultimo etapa di cancer. Su prima tabata gusta bay wak solo baha na canto di lama, e familiar ta bisa, pues tabatin un gran deseo pa por haci esaki un biaha mas.

E familiar ta admiti cu e no tabata sa di FUDA; tabata otro persona cu a recomenda nan pa acerca e fundacion. Tabata 8or di anochi caba riba un diahuebs ora e familiar a tuma contacto cu Sra. Raven pa por organisa e encuentro lo mas liher posible. Aunke en general e fundacion tin un protocol pa sigui, Raven a bisa cu e lo haci su best. Y di berdad el a cumpli: dentro di dos ora, e familiar a haya yamada back bisando cu a logra regla tur cos pa e beneficiado y su famia.

E proximo dia, e fundacion a busca e beneficiadonan den ambulance y a hiba nan beach, unda nan a pasa un dia alegre, yena cu cantamento y momentonan precioso.

E familiar a gaba FUDA su servicio, contando cu no solamente a logra regla e encuentro di un dia pa otro, sino tambe a regla cuminda y bebida pa e famia. E famia a keda extremamente encanta y agradecido.

Esaki ta demostra e amor profundo cu e fundacion tin pa e trabao cu nan ta haci. “Nos ta hacie pa Aruba,” Sra. Raven a subraya.

FUDA su enfoke pa engrandece team y servicio

Sra. Raven ta splica cu FUDA ta den contacto cu hermana fundacionnan na Hulanda, Corsou y Boneiro, cual el a acerca na prome instancia pa averigua con e tipo di servicio aki ta hinca den otro. Raven ta expresa su orguyo cu e fundacion por a yega asina leu y cu por a depende riba sosten di varios sponsor y instancianan cu ta yuda nan, specialmente ImSan. E ta bisa e fundacion “tabatin hopi suerte” cu e instancia medico por provee de bes en cuando ambulance pa nan. Na mesun momento, Raven ta señala cu no ta tur ora nan por, claro pasobra ImSan tin nan mesun trabao y otro responsabilidad pa atende cune. Asina mes e presidente ta enfatisa su gradicimento cu tur tipo di sosten cu e fundacion ta hayando te awor.

Esaki tambe ta conta pa boluntarionan. E fundacion tin diferente boluntario, incluyendo coordinador, enfermera, chauffeurnan, pero nan tin e meta pa por tin un team mas grandi pa sigura cu por cumpli cu deseonan di beneficiado—y sin mester di depende hopi riba otro instancianan, y cu garantia cu tin suficiente personal pa yuda. Manera Raven ta splica, e boluntarionan aki tur tin nan mesun trabao, pues claro cu no tur ora lo ta disponible pa yuda. E ta enfatisa si cu e fundacion y su team tin un amor real pa loke nan ta haci. Segun Renate, e team ta sinti nan mes orguyoso y bon cu nan por nifica algo pa beneficiadonan y nan famia.

Aunke e ta sigura cu falta di personal no ta un problema grandi, e fundacion ta keda busca pa expande nan team, no solamente profesionalnan medico pero tambe personanan cu por yuda e fundacion cu su alcance na comunidad, yuda planea evento of regla otro asunto dentro di e fundacion.

Campaña pa “wensambulance”

E aña aki na Hulanda, un compania di ambulance ta cambiando pa ambulance nobo y ta bendiendo esnan bieu. Manera Sra. Raven ta conta, esakinan ta ambulancenan di bon calidad pues e kier a mira si FUDA por haya un. Pa cu esaki, el a informa cu awor e fundacion tin un campaña riba red social pa recauda donacion. Nan meta ta pa e prome cinco aña recauda AWG. 100.000 pa por busca un wensambulance.

Tambe a menciona deseo pa haci fundraising den futuro, aunke el a reconoce si cu lo mester ayudo pa esey tambe. Ademas, Renate ta busca tambe pa profesionalisa mas e fundacion. Aunke e ta expresa e ta hopi agradecido cu e donacion cu e ta haya di instancia y companianan, e no kier pidi pa sosten financiero constantemente. Pues e fundacion ta buscando manera pa por logra alcansa comunidad mas y di e manera aki sostene su operacion.

Con abo por aporta

Actualmente por haci donacion directo na FUDA via transferencia bancario:
Fundashon Ultimo Deseo Aruba
Banco: CMB #65550908
Swiftcode is CMBAAWAX

Den descripcion di e transferencia por skirbi “Gift” pa asina e suma por ta deducible for di impuesto.

Ademas, por keda al tanto di actividadnan di e fundacion riba Facebook (Fundashon Ultimo Deseo Aruba) of bishita nan website www.fuda-aruba.com

Potretnan di FUDA riba Facebook.