Fundacion Animal Welfare Alliance Aruba (AWAA) ta un fundacion nobo cu a wordo funda e aña aki den luna di juni. E fundacion a wordo funda pa representantenan di otro fundacionnan cu ta traha pa bienestar di bestianan riba caya y tin como meta yuda cu e problematica grandi na Aruba di bestianan riba caya.

Den un entrevista cu Bon Dia Aruba, Mercedes de Bruyn, miembro di e hunta directiva di AWAA cu algun di e fundacionnan di bestia na Aruba manera, Luna Foundation, Criojo Trappers Aruba, Sgt. Peppers Friends, Nine Lives Aruba y United Dogs Aruba ta sinta hunto regularmente y tin hopi aña na e isla pa adresa e gran problema di demasiado cacho y pushi ariba caya na, e abuso y negligencia di cacho y e falta di conscientisacion y educacion ariba e topico aki.

Un di e motibonan pakico a dicidi di funda AWAA ta pa bin cu un cambio di enfoke pa aborda e problema di bestia riba caya pasobra nan tin hopi aña haciendo e mesun cos y lastimamente no a logra niun avance ya cu ainda tin e problema di sobrepoblacion di cacho y pushi na e isla.

Otro motibo, de Bruyn a sigui splica, ta cu na e veterinarionan tin un escasez di tempo di cirugia. Esaki kiermen cu cada biaha cu nan bay cu un cacho of pushi, hopi biaha e veterinario ta hopi ocupa pa haci e cirugia e momento ey y tin tempo despues di un siman mas o menos. Algo cu de Bruyn ta indica ta comprendibel, pero den nan caso si nan gara un cacho di caya nan no por tene e bestia pa un siman largo y mester pa e wordo opera di biaha.

Tambe e campaña Stimami Sterilisami a stop aña pasa y a cuminsa e aña aki atrobe, pero Covid ta den un parti responsabel pa hopi di e aumento di cacho y pushi ariba caya. “Dus nos mester haci algo”, de Bruyn a comenta.

E idea di AWAA ta pa establece un clinica di sterilisacion local pa famianan di menos recurso y e enfoke principal ta sterilisacion hunto cu conscientisacion ariba e tema di con pa trata un bestia, con pa cuida un bestia, su necesidadnan, su awa, cuminda, un cura pa e cana liber of un cadena di minimo 10 meter largo.

Pa loke ta trata e veterinarionan pa realisa e cirugianan, mirando cu ya caba veterinarionan o tin suficiente tecnico di cirugia, De Bruyn a remarca cu nan mes lo realisa e cirugianan aki. Nan lo traha cu hopi boluntario pa sikiera e prome mita di aña pasobra tur e fondonan necesario pa e clinica aki lo wordo recauda y manera de Bruyn a indica nan mester hopi fondo pa por establece un proyecto manera esaki.

“P’esey mes e clinica lo wordo opera pa mas tanto boluntario nobo hunto cu boluntarionan di e fundacionnan cu ta forma parti di e organisacion nobo aki. E no ta fundacion forma pa otro fundacionnan, e ta un fundacion cu a wordo forma pa personanan cu ta involucra den otro fundacionnan”, el a agrega.

De Bruyn, ken ta forma parti di United Dogs Aruba, a splica cu inicialmente e fundacion aki ta organisa campañanan di sterilisacion anual y nan ta traha cu un setup mobil. Por ehempel, na e ex-edificio di post na Noord, nan a setup e clinica mobil y nan tabatin veterinarionan boluntario cu a bin y haci e cirugianan pa nan.

Den e caso di AWAA, el señala cu loke nan ta bay haci aworaki ta cu en bes di tin cuater of cinco veterinario den un solo biaha, nan lo tin solamente uno y e veterinario aki o t’ey durante un siman largo, di dialuna pa diabierna y nan lo bin cu nan tecnico veterinario y solamente e veterinario ey lo realisa e cirugianan.

Pa loke t e cantidad di cacho y pushi cu lo kier yena na dje cu nan clinica di sterilisacion, el a indica cu nan lo kier cuminsa cu e operacion di e clinica den luna di october, e ultimo kwartaal di e aña y nan lo desea di yega un cantidad di 1000 bestia. Pa e siguiente kwartaal basa ariba e capacidad di boluntario nan lo desea pa aumenta e cantidad ey na 1250. Pa e tempo ey nan ta spera cu nan lo recauda suficiente fondo pa idealmente contrata un veterinario y tecnico di veterinario permanente.

De Bruyn a remarca cu AWAA lo tin un ekipo di transport cu lo bay den e barionan y wak e casnan cu tin bestia basicamente y cera conoci cu e doñonan pa asina duna nan informacion tambe ariba e cuido di bestia, den ki manera e fundacionnan por yuda nan y tambe den ki manera nan por yuda e fundacion.

“E no ta un caminda di un solo direccion solamente. Nos kier crea conscientisacion y e hendenan cu nos lo yuda lo yuda nos tambe difundi e informacion y educacion di cuido di bestia”, el a enfatisa.

El a agrega cu e mester ta un grupo di hende cu e energia pa hiba e informacion y conscientisacion den e barionan ariba e cuido di bestia, dicon nan ta haci sterilisacion y dicon e ta asina importante. “E ta yuda nos preveni pa mas cacho y pushi nace of wordo abusa pasobra ainda tin asina hopi abuso di bestia ariba e isla y unda tin abuso di bestia tambe tin abuso di hende. E ta un problema cu mester wordo adresa for di un otro angulo”.

Pa loke ta cooperacion di parti di gobierno, de Bruyn a indica cu nan tabata den dialogo cu nan caba pa sikiera propone nan plan pasobra esaki tambe ta parti di nan plan nacional pa yuda cu e problematica aki na e isla. El a conta cu como AWAA nan a bisa gobierno cu nan lo kier ofrece nan clinica di sterilisacion pasobra esey ta locual nan por haci pa e isla y, segun de Bruyn ta comenta, e ta yuda nan spaar mas di un miyon di florin pa aña si nan yega na e cantidad di bestia cu nan kier yega.

Pero segun de Bruyn a compronde, no lo tin ningun ayudo financiero ni ningun otro tipo di ayudo di parti di gobierno pa e proyecto aki.

Por ultimo de Bruyn a e subraya cu si tin companianan of personanan cu lo kier acerca AWAA pa haci donacion of pa den un manera paga mensualmente pa e sterilisacion di un cantidad specifico di bestia, cu un forma di donacion cu por yuda nan dividi e gastonan. El a comenta tambe cu ainda nan ta buscando cosnan basico manera computer, laptops y materialnan administrativo pa e operacion di e clinica.

Nan mester un inventario pa e clinica y donacionnan ta mas cu bon bini. Por ehempel un compania ta bay haci donacion di dos mesa di cirugia y cashi pa e clinica. “Dus nos mester tur e tipo di e suministronan aki. Tambe si hendenan kier participa como boluntario, si hendenan kier haci donacion esey lo ta hopi bon. Manera e hospital por ehempel, si tin algun material cu nan no ta usa nos lo aprecia si nos lo por haya donacion di tipo di materialnan asina”, el finalisa.

Si cualkier persona ta interesa pa traha como boluntario of kier haci cualkier donacion na fundacion AWAA por tuma contact cu e fundacion a traves di nan pagina di Facebook of e-mail contact@awa-aruba.org

LEAVE A REPLY

Please enter your comment!
Please enter your name here