Gilbert Wernert, representante di Gianni’s Group, den un conferencia di prensa a splica cu nan ta organisando nan prome Walk & Run cu e obhetivo di recauda fondo pa Fundacion Ban Uni Man pa Cria Nos Muchanan.
Wernet a splica cu tur loke nan lo recauda cu e benta di ticket di e Walk & Run ta bay 100% pa e fundacion aki, manera ta conoci e fundacion ta zorg pa duna desayuno na muchanan na scol cu ta den necesidad unda el a informa cu na e momentonan aki e cifra ta na 816 mucha rond di Aruba cu tur dia ta haya un desayuno.
“E cifra aki ta basta halto y esey ta nifica cu ta dificil e financiamento pa por support esaki”, el a bisa.
Pa e motibo aki, nan a sinta cu John Fun ken ta fungi como presidente di e fundacion aki cu e idea cu nan ta treciendo dilanti cu ta e Walk & Run cu lo tin fecha pa dia 13 di december unda lo sali di e parking lot banda di hotel Costa Linda na Eagle Beach yega na banda di Divi Phoenix y bin bek, e ora di cuminsa lo ta 5or di atardi.
E ta invita comunidad di Aruba cu su famia, amigonan y coleganan pa participa den esaki cu tin como obhetivo un noble causa.
Pa por participa mester cumpra e ticket general y tambe tin disponibel ticket di mucha di 6 pa 12 aña. Ora un persona ta cumpra un ticket general e ta yudando un mucha cu un su desayuno pa dos siman y un ticket di un mucha ta cubri desayuno pa un siman, manera Wernet a señala.
E ticketnan ta obtenibel na diferente luganan como na Gianni’s Group, Amore Mio, Garden Fresh, Citgo Boulevard, Citgo Essoville, Superfood, Botica Aloe y Botica Santa Cruz.
Wernet a informa cu nan tambe tin ‘Door Prizes’ tambe unda participantenan por gana un weekend stay, dinner pa dos persona y otro premionan mas.
Di su parti, John Fun a indica cu nan ta un grupo cu tur dia ta provee desayuno na muchanan den necesidad na scol y na e momentonan aki nan ta yudando 816 mucha cu ta haya nan desayuno na scol.
Par di luna pasa nan a dicidi di bay publico pa motibo cu ora aña escolar a cuminsa nan a cuminsa coba den nan reservanan y cu nan no ta bay logra esey pa e aña aki, pa e motibo ey nan a manda un carta na scolnan un cu nan mester a disminui e grupo pero di biaha nan a haya hopi reaccion den e comunidad mes segun Fun a sigura, companianan a saca un man pa yuda y un di e companianan ta Gianni’s Group cu a acerca pa asina organisa un Walk & Run caminda tur e entrada di ticketnan ta bay dirigi na e fundacion mes.
“Naturalmente nos ta hopi agradecido pasobra esaki ta bay yuda e muchanan directamente y nos kier stimula pueblo pa join nos pasobra fuera di ta algo pa comunidad, e ta algo tambe cu bo por bin cu bo famia, cana bo 5 kilometer cu ta bon pa salud y despues ta bay tin varios actividad na final caminda bo por pasa bon”, Fun a expresa.
Aruba Bank lo tin un stand disponibel pa personanan interesa cu lo kier haci un donacion.
Fun a recorda cu e fundacion aki a cuminsa na aña 2001, esey ta nifica cu nan tin 21 di aña di existencia cu semper a bay basta bon, prome cu pandemia Covid-19 nan tabatin 635 mucha y despues di esey e cantidad di mucha a subi drasticamente hasta 816 mucha y esey ta nos problema financiero pa motibo cu e ta costa hopi pa cada muchanan, cada mucha ta consumi 600 florin pa aña.
“Mi ta contento cu e fundacion por haci algo bon pa nos comunidad y specialmente pa mucha”, Fun a sigura.
Tambe el a bisa cu na nan manera, nan ta aporta pa e bienestar di muchanan cu no tin hopi recurso y a afirma cu ta berdad cu ora un mucha ta bay scol cu bariga yen e ta studia miho.
Ademas, Fun a afirma cu ora nan a cuminsa na 2001 el a manda carta pa tur empleadonan di hospital pa puntra nan si kier yuda un mucha y tabata consisti di 25 florin pa luna, e tempo ey mas cu 100 trahado a acepta pa duna un man pa e muchanan, poco poco e fondonan a cuminsa drenta di companianan y clubnan di servicio.
“Awor nos a cuminsa sinti e crunch, pero danki dios y na empresanan grandi manera Gianni’s nos ta sinti cu awor si, en todo caso, nos por yega te fin di aña escolar yudando e mesun muchanan”, Fun a sigura.
Pa mas informacion, por tuma contacto na e number di telefon 588.2599.
