Durante un conferencia di prensa ayera tardi Fundacion Chico Harms hunto cu Centro di Bario Brasil a anuncia e di 53 celebracion di show di Dande di bario di Brasil. E di 53 celebracion aki ta bay ta uno completamente diferente dedica na con Dande tabata wordo celebra antes.

Sra. Inky Richardson di Centro di Bario Brasil a splica cu hunto cu Fundacion Chico Harms nan ta organisando no solamente e celebracion di show di Dande, pero tambe ta bay rindi homenahe na diferente baluarte.

El sigui splica cu Centro di Bario Brasil ta bay re-inaugura e baluartenan cu tabatin caba tempo cu Sr. Chico Harms mes a rindi homenahe na e baluartenan aki. Loke ta bay tuma luga, el a indica, ta cu ta bay renoba e potretnan di e baluartenan y e anochi aki lo honra un of dos baluarte mas. Cu esaki ta bay tin un homenahe chikito cu lo tuma luga prome cu e show di Dande cuminsa pa asina duna honor a baluartenan cu tabata t’ey y esunnan cu t’ey ainda.

Sr. Tito Tromp di Fundacion Chico Harms a splica cu e fundacion a bin cu e idea pa trece un concepto completamente nobo pa wordo hinca den e show di Dande di e aña aki.

Esaki, el a splica, ta encera cu tin un total di 18 grupo di Dande cu lo ta presentando e anochi aki y despues di e presentacion di nuebe grupo, ta bay tin un obra teatral unda ta bay presenta bibo con e Dande di antes tabata wordo celebra na Aruba cu hende bisti cu trahenan di antes, cu background cu ta refleha e tempo di antaño y tambe cu e musica di Dande manera cu e tabata wordo canta antes.

El a sigui splica cu e setup di e luga tambe ta bay cambi’e y haci’e mas familiar. E no ta bay ta estilo di teatro mas cu stoelnan banda di otro na unda hende ta sinta y wak e show, e biaha aki, el a señala, nan ta bay pone mesa pa e hendenan sinta banda di otro pa combersa y pasa un rato ameno, y na mesun momento wak e obra teatral.

Tromp a agrega cu e entrada ta bay unico no solamente den sentido cu tin un costo di solamente dos florin, pero e entrada fisico mes ta bay ta completamente cambia y ta bay ta algo full diferente compara cu otro luganan cu hendenan ta bishita pa wak show.

“E ta bay ta un surprise pa ora e hendenan yega anochi y nan ta bay wak con nan ta wordo ricibi caba na entrada,” el a indica.

El a indica cu e cushina ta bay ta diferente. Ta bay tin cumindanan di antes y no ta bay tin un cushina solamente, pero ta bay tin varios tent na unda e hendenan por purba e diferente cumindanan di antes, manera por ehemplo cabrito stoba, pisca tempera, suls, entre otro.

El a agrega cu ta bay tin cos dushi tambe di antes cu hopi hende awendia no ta custuma di come, manera e boyo di maishi rabo y ta bay tin cucuy tambe pa e hendenan purba, pasobra esey tabata loke tabatin antes pa ofrece na casnan den temporada di fin di aña.

“E luga tambe ta bay transforma completamente den cosnan di antaño. Di ora bo drenta na porta te ora bo bay sinta e ta como si fuera bo ta den un museo cu bo ta bay wak cosnan di antaño mientras bo ta cana bay na e mesa,” el a resalta.

E artista di teatro conoci como Shi Preke di Fundacion Pro Cultura Arubano a splica con e e obra teatral ta bay ta hinca den otro. El a indica cu mirando semper e dos fundacionnan tin bon relacion cu otro y traha pa engrandece cultura di Aruba, e biaha e fundacionnan a uni atrobe y a bin cu e idea pa bin cu un obra teatral di Dande di antes.

“Naturalmente nos ta un solo Aruba, pero cada bario, cada districto, ta celebra Dande na nan manera of segun e forsa di e famia,” el a remarca.

Den e caso aki, el a señala, a bin cu un obra na unda 15 hende ta bay presenta y e hendenan ta presenta un solo biaha y despues nan ta disparce pa nan prepara pa ricibi e Dande ora cu e Dande yega na porta y ta bay tin muchanan chikito di seis aña te na adultonan di tur edad cu lo ta participando den e obra.

“Lo bo bay wak hopi cosnan pret pasobra den tur ocasion, pa tristo cu e por ta, tin cosnan pret ta sosodiendo. Ora di Dande, ora e famianan ta prepara nan cas pa e anochi ey, tambe tin cosnan pret y menos pret ta pasando. Cada bario ta usa nan lenguahe na un manera y p’esey nos ta bisa e ta special cu asina ey e tabata na Aruba,” el a subraya.

For di idea aki, el a splica, Fundacion Pro Cultura Arubano hunto cu presidente di Fundacion Chico Harms, a bin cu e idea pa otro aña invita otro grupo, otro fundacion of otro bario pa nan presenta otro obra y asina pueblo por siña conoce con diferente bario of districto tabata celebra Dande e tempo ey.