Tur compania cu tabata coba na Sero Cristal, Babijn y Jaburibari, a reanuda nan trabou despues di vakantie. Y hasta tin un peticion di un di e companianan pa haya un permiso (hindervergunning) pa cuminsa cu produccion di beton cu asfalt.

Asina e Fundacion Conserva Area Cristal ta laga sa den un e-mail manda na prensa antayera. Nan ta masha disgusta como cu minister di Infrastructura y Medio Ambiente Otmar Oduber (POR) a priminti cu lo haci algo y a instrui e departamentonan concerni pa haci trabou pa investiga e asunto y tuma medidanan. Esaki pa motibo cu e companianan no tin permiso pa haci e actividadnan.

E fundacion ta bisa cu nan no ta acepta esaki y nan ta spera cu tur nan obhecionnan ta wordo trata dentro e termino stipula como e minister a declara cu e ta actua segun e ley ROP. E fundacion ta bisa cu den e caso e departamentonan no ta actua dentro di 14 dia, esta haci control adecua y aplica e ley, nan lo sigui e caminda legal. No ta nan so cu ta rabia, pero tambe habitantenan y otro simpatisantenan, nan ta bisa. “Tin un molester grandi na Marawiel y Babijn y Jaburibari pa salud y no por biba trankilo. Tambe e ta bira hopi dificil pa bende e casnan cerca e cobamento”, asina e fundacion ta bisa.

Segun nan e biento ta trece stof y gas toxico, entre otro di e planta di asfalt direccion di dos bario di FCCA na Jaburibari, e cas di anciano di Stichting Thuiszorg y Parke Curason. Banda na tur e casnan den e area ey, nan ta bisa. E fundacion tambe ta preocupa cu e medio ambiente.

Minister
Den e ultimo relato cu nos a ricibi di minister Oduber riba e asunto aki, cual tabata na deceber, e ta informa cu el a reuni cu e departamentonan concerni. Esta DIP, DOW y Directie Natuur en Milieu (DNM). “Parce cu mayoria di e actividadnan cu tin den e area ta sosode riba terenonan priva y no di gobierno. E tipo cu actividadnan ta encera cobamento di santo y produccion di cement y bloki. Tin diferente keho cu ta drenta indicando cu lamentablemente no tabatin atencion di e minister anterior, y cu no a duna reaccion na esaki. Sinembargo tin basta bisiña cu ta irita cu e situacion aki, cual tin atencion di gobierno”, asina ta para den e relato.

“A reuni cu e diferente instancianan aki pa mira si e control debido ta tumando luga y si tur hende ta cumpli cu e leynan cu tin pa loke ta e diferente actividadnan cu ta tuma luga den e area aki. A palabra cu cada instancia lo haci un sondeo y un opname a pesar cu den pasado a bishita e sitio aki caba. Mirando cu ta trata trabou riba tereno priva, no tabata facil pa haya informacion, sinembargo a tuma decision pa instancianan cu a papia cu ne traha un nota critico y awor nan lo traha un rapport tambe di e situacion cu tin den e area aki.”

E relato ta caba tambe cu ‘gobierno no ta desea di stroba ningun actividad economico tanten cu e ta cumpli cu e leynan y reglanan vigente pa loke ta trata e tipo di actividadnan aki.”

Den e caso cu e companianan no tin un hindervergunning (permiso pa haci molester), no ta importante si e actividad ta tuma luga riba un tereno di gobierno of priva. Esta cu gobierno por actua como nan ta bay contra e ley di Hinderwet.