E problematica di adictonan di caya na Aruba ta uno cu lamentablemente tur aña ta crece y te ainda no tin un solucion concreto pa yuda cu e problema aki. Hand4Addcits ta un fundacion cu ta enfoca den brinda ayudo, mas cu djis cuminda, pa e grupo aki. Fundador y presidente di e fundacion, Nicole de Cuba, ta splica di unda e idea pa lanta e fundacion a bin y ki ta e trabaonan cu e fundacion ta haci.

De Cuba a splica cu e idea a bin tempo cu e tabata boluntario pa Cruz Cora Aruba y nan tabatin un presupuesto pa duna adictonan ambulante tur siman algo di come solamente, pero despues esey a wordo elimina.

El a cuminsa brinda e ayudo riba su mes cu kipashi, juice etc. Cu iniciativa di mas hende e tempo ey, cu ya no ta biba na Aruba, nan a dicidi di haci un BBQ cu a bira un evento grandi y eynan nan hendenan a cuminsa haci donacion di loke nan tabatin mester e momento ey, manera paña, cuminda etc.

Despues di e gran evento aki, De Cuba conhuntamente cu su ekipo e tempo aya a dicidi di haci un benta di bolo pa asina recauda fondo pa por lanta e fundacion oficialmente.

Hand4Addicts tur luna, un biaha pa luna – casi semper e ultimo siman di luna pasobra e siman ey e persona no a cobra onderstand ainda – ta bay patras den Rancho, patras di e parkinglot di Mango, y nan ta yuda e adictonan.

Nan ta bay cu un baño, cu nan ta haya sponsor y ainda nan ta haya algun hende cu ta sponsor nan cu material, brandweer ta yuda cu awa, nan tin paña y nan ta bay cu cuminda.

“Nos t’ey eynan for di mainta te merdia, of for di merdia te atardi, dependiendo di e situacion. Practicamente nan ta haya un pela, nan ta come, nan ta baña. Nan tin bin combersa y nan conoce nos for di hopi tempo caba. Mi ta haciendo esaki pa mas o menos siete of ocho aña caba”, De Cuba a indica.

De Cuba a sigui conta cu december e tabata bay, y door cu e no ta come carni, e tabata traha ham pa e adictonan y e tabata sinta combersa cu nan, pasobra e ta splica cu e dianan festivo pa e adictonan ta hopi emocional door cu nan ta riba caya y nan no tin famia, nan no tabatin niun hende.

“Nos tabata bay cerca nan y haya e confiansa na unda nan ta respeta nos, nan ta defende nos full y na final di dia ora nan caba di come nan ta combersa y nan ta conta bo cosnan bon y malo cu nan a haci”, el a agrega.

Pa loke ta trata e ayudo di parti di instancianan cu ta encarga cu ayudo social, De Cuba ta expresa cu e ta haya lamentabel cu na Aruba tin un sistema cu no ta draai 100% den loke ta trata sosten pa e grupo di personanan aki.

E ta remarca cu hopi di nan tin problema di jong of nan a lanta den Casa Cuna, Imeldahof, of tin mayornan problematico, nan a wak droga for di chikito, nan wordo abusa. Mayoria ta bin cu un historia cu ta lastima nan y droga ta e unico manera cu nan por expresa nan mes.

De Cuba a subraya cu el a yega di sinta cu Gobernador, cu e tempo ey a manda yam’e; el a sinta cu diferente minister cu e partido aki, partido bieu hopi biaha y e plannan cu nan ta trece pa dilanti, el a indica, e ta wak nan manera plannan nubia, plannan cu ta bin, pero cu nunca ta wordo realisa.

El a menciona cu tin Centro Colorado, FMAA, na unda su mesun persona a haci su stage hopi tempo pasa, pero el wak e situacion y e tempo ey e luga tabata hopi deteriora, no tabatin structura, y hopi di e adictonan ta bisa cu nan ta prefera di ta riba caya en bes di ta eynan. De Cuba a enfatisa cu e no ta na altura con e situacion ta aworaki, pero na su conocemento hopi hende ta drenta y nan ta bisa nan cu un biaha so nan por comete un eror, despues nan ta afo y nan ta back riba caya.

Den casonan positivo na unda e adicto ta logra sali di e adiccion, De Cuba ta splica cu esey ta specificamente door di iniciativa di famia di e adicto. El a remarca cu no tin un instancia cu ta controla nan medicamente, hopi di nan no ta cana cu AZV, ni ID, nada. Y medicamente hopi di nan tin STD’s, diferente infeccion, nan ta corta nan man, nan ta bringa etc. Pero hopi biaha, a lo menos cu nan mes cana for di Playa pa hospital pa haya algun ayudo y despues cana bay back Playa, nan ta djis riba caya riba nan mes sin ayudo.

De Cuba a menciona tambe cu el a papia Minister di Husticia y Asunto Social, Rocco Tjon di un caso di un hoben cu ta riba caya cu nan ta purbando di saca for di caya pasobra e ta menor di edad. E hoben su tata ta un adicto tambe. El a splica cu e ta papia cu e minister di casonan specifico cu ta echt dificil, pero el a enfatisa cu no tin echt un bon cuido of ekipo alrededor di e problematica aki. Tin algun instancia cu si ta yuda nan, pero no semper e ta mescos.

“Pa añas caba e ta un grupo cu ta echt wordo neglisha y aunke mi ta compronde cu nan ta fastioso, nan ta kibra, nan ta horta, nan ta papia fresco cu hende. Mi ta compronde cu di e banda ey e ta fastioso pa nos como hende cu no ta un adicto, pero di otro banda mi ta compronde nan adiccion tambe”, el a agrega.

Nicole a conta cu e conoce un caso na unda cu un adicto a logra sali for di droga y a ricibi e ayudo necesario pa para back riba su pia. E persona aki a logra haya un trabao, pero na momento cu na trabao nan a reconoce cu e tabata un adicto di caya, un choller, nan a cuminsa bully e te na e punto cu el a bolbe cay den droga. “Aruba su problema social ta hopi mas grandi di loke nan por controla.”

Por ultimo De Cuba a comenta cu prome cu e tabata un boluntario di Cruz Cora e tabata husga e adictonan, y esey, el a subraya, ta e mentalidad cu e manera hopi hende a wordo lanta cune. Pero ora cu el a haya e otro banda di medaya y nan ta papia cune, aunke nan ta gaña algun cos, e ta echt compronde e raiz di e problema.

“Loke mi ta bisa semper ta practicamente tuma e chens prome cu bo husga un di e hendenan aki en bes di zundra nan, grita nan, halanan for di band’i bo auto, for di banda di bo. Djis trata nan como hende y bo lo wak un comportacion full diferente den ken nan ta”, el a finalisa.